1 Samuweli 7 - Mazu Otchena a Mulungu

¹ Evale alombwana a Kiriyati-Jeyarimi kagavwile mazu anne, kohovenya, aliwa dowa tukulawo Kaxa ile, dowana waniwa ilambo ya Kiriyati-Jeyarimi, aliwa hiya vande va mulombwana Abinadabe, wenno vande vaye vali vankumani eni. Nomala eto komuhambiha mwanaye Eliyazari ira aing'anelege Kaxa ya Yopangana ya Yehova ile.

Samuweli ohoroma atonga aIzarayeli

² Kaxa ya Yopangana ya Yehova ile yagafiyile sidadi ya Kiriyati-Jeyarimi wewule, aIzarayeli atene kohoroma nvepa Yehova ira aakamihedege mukondoni mwewa, aavunelege mmandani mwa amwidani ewa. Kagamanle yaka 20 kanvepaga Yehova,

³ Samuweli ohowonga na aIzarayeli atene, liye ira: <<Akala munafuna muwelele kala na Yehova na mmirimani mwenyu mwatene, mwaatatile amilugu enyu atene na josema ja amilugu a Axitaroti jejo jinatamaleletcha nyo, mudowe wa Yehova mmohive eto mmuharegeve liyene bahi. Mwairana eno, liye unouvunelani mmandani mwa aFilistewu.>>

⁴ Evale Ana Izarayeli kohatatila amilugu ewa aBaali na aAxitaroti, aliwa roma muhara Yehova bahi.

⁵ Evale Samuweli ohawandela eraga: <<Hiyo aIzarayeli atene nidowe nagumaneni ilambo ya Mizipa ira didowe daulobeleleni wa Yehova.>>

⁶ Noira eno, siku niwa nagafiyile, atenene kohogumanelaga ilambo ya Mizipa, aliwa runga mahindje roma akutulela vati vamentoni va Yehova. Siku nenne kohovireliwaga eno kajejuwarigi, eto kowongaga keraga: <<Hiyo nihimutegela Yehova.>> Tempu yenne kagali Mizipa wewule Samuweli paromile liye asogolrelra Ana Izarayeli atene.

⁷ Mwa tempu yenne aFilistewu kagavwile ira Ana Izarayeli anafwanyeya Mizipa, aliwa na amwene ewa kohovenyaga ira kadowe kawane na aIzarayeli. Evale Ana Izarayeli kagavwile ira aFilistewu anaza, kohokagana ova ulukulu.

⁸ Evale Ana Izarayeli kohowonga na Samuweli keraga: <<Mukaleleve nilobelela wa Yehova Mulugu wehu, munvepege ira liye anivunele mmandani mwa aFilistewu.>>

⁹ Noira eno, Samuweli ohotukula mwana nibila ning'onong'ono nowamwa, liye pa, mala tumeya natene nenne, sakanya mukuto wa Yehova. Liye nvepa Yehova ira aakamihede aIzarayeli. Evale Yehova ohorumela yovepa ya Samuweli.

¹⁰ Fwanyeya ira tempu yenne mulombwana Samuweli avelelaga mukuto otumeya ule, ahanamaleve, tchi tempu yafiyaga aFilistewu ira karome wana na aIzarayeli. Mbwenye kahanaromeve wana, Yehova ohorumihaga ndari dilukulu, arendjetchaga aFilistewu eto ohosakanya ira aliwa kakale zagi zagi. Evale aliwa kohoroma tawa vamentoni va Ana Izarayeli.

¹¹ AFilistewu ale katawaga, akuda Izarayeli kohokumaga Mizipa ule, aliwa roma ahara, kaatamangihaga, aliwa roma apaga na ndila fiyeda Bete-Kari.

¹² Mwa enne mulombwana Samuweli ohotukulaga nibwe, liye dowa imetcha vari va Mizipa na Semi, liye kwi: <<Ante va mbwenye Yehova uhunikamiheda.>> Mwa enne, ohovaha nibwe nne nzina na Ebenezeri [ku wonga Nibwe Nonikamiheda].

¹³ Mwa enne aFilistewu kohogondjihiwa eto tchawelenle volowa ilambo ya aIzarayeli ira kaawake jengo jiwa. Tchoira Yehova ohela ndanda ira aFilistewu kahawande kana kopolo yaka datene datonga Samuweli.

¹⁴ Sidadi datene dedo datukunle aFilistewu, romana Ekoromi ante Gate, kohomala aweliheda annya aIzarayeli. Mwa enne aIzarayeli kohowelihediwa vilambo diwa datene. Vamohive vevo eto, aAmore kohowandana na aIzarayeli.

¹⁵ Samuweli alive namasogolrelra wa aIzarayeli kalawo waye watene.

¹⁶ Yaka datene liye odowetcha Beteli, amala liye dowa Jiligali, amala liye dowa Mizipa, atongaga milandu dedo dafwanyeyana aIzarayeli.

¹⁷ Amala tonga milandu dile, owelela waniwa sidadi ya Rama eto wewule oasogolrelra aIzarayeli. Eto Samuweli ohomangawo ibuwa ya Yehova ilambo ya Rama ule.