1 Samuweli 27 - Mazu Otchena a Mulungu

Davi ohotawa dowa kala na aFilistewu

¹ Jagamanle jejile, mulombwana Davi ohoumbuwelaga mmirimani mwaye ira: <<Miyo eni vasogolro nnoza dipiwe na mwene Sawuli. Mbwenye ira mwene Sawuli ahadipe, inafwanela dikumemo mwilamboni muno, didowe dakalege mwilamboni mwa aFilistewu. Dadowa wewule, Sawuli unogoma disaka muwari mwa Izarayeli, era eno, nnovuluwa, kannakwa.>>

² Mwa enne mulombwana Davi ohovenyihanaga vamohi na atwaye 600 anna liye, aliwa dowa sidadi ya Gate yenno yatongiwa na mwene Akiji mwana Mawoki.

³ Mwa enne Davi vamohi na alombwana atene anna liye, kada mutu na muhiyanaye na ahimaye, kohoroma kala ilambo ya Gate ule vamohi na mwene Akiji. Eto Davi ohatukulaga ahiyanaye ambinlene, Ainowa wa ilambo ya Jezereli, na Abigayeli wenno ali mwadi marafula Nabali, nkuda Karimele.

⁴ Evale Sawuli agavwile ira: <<Mulombwana Davi uhutawela sidadi ya Gate mwilamboni mwa aFilistewu!>>, kawelenle muhara Davi akoka.

⁵ Evale Davi ohomuwongana mwene Akiji, liye ira: <<So mwene akala munodifwewela murima, nnouvepani ira mudivahe sidadi ing'ining'inive ira miyo dikalegemo. Kahi pama ira miyo dikalege vamohi na nyo sidadi ya umwene ila.>>

⁶ Mwa enne mwene Akiji ohonvaha Davi sidadi yaitaniwa Zikalagi. Sidadi yenne fiyeda siku na peno inafwanyeya yagali ya amwene a aJuda.

⁷ Davi agadowile mwilamboni mwa aFilistewu mule, amanlemo yaka imohi na medi minnayi.

⁸ Muwari mwa tempu yamanle liye muwari mwa aFilistewu, Davi vamohi na atwaye kodowetcha labaga ja umadjuba mwilamboni mwa akuda Jesuri, akuda Jirizi na akuda Amaleki. Atene anna kakala pandi da ilambo ya Suri ante ilambo ya Ijipitu romave wanle.

⁹ Mwa enne Davi na atwaye kadowa sakanya ja umadjuba jile, koapetcha alombwana atene na ahiyaniwene, aliwa awakaga mabiliwa, ng'ombe diwa, aburu, na akamelo, vamohi na jowara jiwa jene. Kamala, kovenyihana aliwa welela Gate wali Akiji wakoka wene.

¹⁰ Evale Akiji oafuka eraga: <<Kodi fendo ila mwadowile wana na akuda ani?>> Davi owakula anamaga eraga: <<Fendo ila niwanile ilambo youmma ya akuda Juda.>> Owu hehi: <<Nali ilambo youmma ya akuda Jerameli.>> Owu hehi: <<Nali ilambo youmma ya aKeni.>> Mbwenye wewo wawana atu, Davi karomolawo.

¹¹ Davi aapetcha alombwana atene na ahiyaniwene tawiha ira unaze akalevo mmohi afune venya adowe Gate awonge na Akiji zela jejo jaira liye na atwaye ale. Ayo ba makalelo aira liye malambo matene amanle liye akalaga mwilamboni mwa aFilistewu.

¹² Mwene Akiji ule omuroromela Davi, mwasiwa liye aumbuweletcha ira: <<Davi unosimbwa harahara nlogo naye na aIzarayeli. Eni atu a nlogo naye anomwida. Na mwasa wenno uneregeve dilaba miyo kala no kala.>>