1 Samuweli 21 - Mazu Otchena a Mulungu

Namakuta Aimeleki ohonvaha Davi pawu na supada

¹ Nomala enne, Davi ohomaruwaga adowaga sidadi ya Nobe. Agafiyile wewule, ohodowaga wa namakuta mmohi wa ilambo ya Nobe ule, aitaniwa Aimeleki. Davi aganfwanyile, Aimeleki ule ohorendjeyaga valukulu, liye roma ngurumelaga. Nomala enne, ohonfukaga Davi, liye ira: <<Kodi mwasiwa gwa nni we zaga wekave eni?>>

² Davi ohowakulaga anamaga eraga: <<Ira dize mekave eni uno, mwene Sawuli gudirumile ira: <Uvenyihane udowe eto wadowaga kumuwandele mutu mmohiwa zela mabasa anauruma miyo ala!> Nona miyo uno dahazawo na mutu mmohiwa, so daawandenle azombwe anawendetcha na miyo ira nidowe nagumane nimburo nimohi niwa nene.>>

³ Nomala eno, Davi ohomuwongagana namakuta Aimeleki ule, liye ira: <<Kodi veva muhukanavo yodja ira mudivahe? Miyo dera mudivahe pawu tanu. Eto mwahakayenavo, nyo podi divaha yodja ili yatene munna nyo veva.>>

⁴ Mbwenye namakuta Aimeleki ohowakulaga eraga: <<Vano kaninnavo yodja ili yatene. So yodja ninnavo hiyo vano, ti pawu dotchenihiwa bahi. Akala alombwana anaawendetchana we kinagone na ahiyana tchineneva, we podi tukula ira mudje.>>

⁵ Evale Davi ohowakulaga eraga: <<Nari, miyo azombwe dinna miyo nalabaga mabasa ali matene masiki mabasiwa kakale a vang'onove, aliwa kinagonetcha na ahiyaniwa. Eto ikalele peno mabasa malukulu ninna hiyo ala, aliwa nne awandama wene ahiyana tchaawandamile! Aliwa kalive apamene.>>

⁶ Evale namakuta ule ohotukulaga pawu dotchenihiwa dile, liye nvaha Davi. Mwasiwa tempu yenne pawu annavo liye dali pawu dotchenihiwa dedo datapulela ira Yehova uli vamohi na atwaye. Pawu dile dakumihiwege vameza yafwanyeya Nimburo Notchena ira katchindje kahelevo pawu dimohi dixa dasakanyiwe siku nenne.

⁷ Siku nairaga atu enne, ohokalagavo namalaba mmohi wa mwene Sawuli wenno aitaniwa Dowege. Liye ali nkuda Edomu eto ali musogolrelri wa anamakumbuza a mwene Sawuli. Mwa tempu yenne Dowege ule kawandile kumavo mwasiwa liye ali muwari mokwakwaneliheda sanganiko daye vamentoni va Yehova.

⁸ Mwa enne mulombwana Davi ohowongaga na namakuta ule, liye ira: <<Kodi nnga veva muhukanavo supada owu mwanango? Mwasiwa miyo dirumiwaga na mwene, dere rurumutchiwa. Mwa eno, dereve venya wene kapataku miyo zaga, kadanna tempu yowanda tukula supada naga na jowanana jaga.>>

⁹ Namakuta Aimeleki ule ohowakulaga, liye ira: <<So supada ninnavo miyo ti nenne na mulombwana Goliya nFilistewu wenne wampile we ndabo na Karvaliyo. Supada nenne nili wewuno nopitikelrelra nene unduli wa kuleti ya unamakuta. Wafuna supada neno nnouvaha, tchoira vano kanilivo supada nimohi niwa nahali neno.>> Evale Davi ohowongaga eraga: <<Kavali supada nimohi niwa nokwaranya neno. Kadivaheni!>> Mwa enne ohonvahaga.

Davi ohovikaliha nnga namihala vamentoni va mwene wa aFilistewu

¹⁰ Davi agavahiwile supada nne, siku nimohive nenne ohovenyaga mobaranya amutawaga mwene Sawuli, liye venyihana dowa ilambo ya aFilistewu ira adowe agumane na Akiji, mwene wa sidadi ya Gate.

¹¹ Mwa enne Davi aganfwannye mwene Akiji, asogolrelri atene a mundimuwa Akiji kohoromaga muwandela keraga: <<Andimuwa, kodi wenna kahi Davi mwene mundimuwa wa Izarayeli? Kahi wenna ahiyana kamuimbetcha atu keraga: <Sawuli uhapa atu tchikwi, mbwenye Davi uhapa atu matchikwi na matchikwi!>?>>

¹² Mwa enne Davi agavwile mazu anne, ohorendjeyaga valukulu. Na mwasa wenne, ohoromaga muova Akiji mwene wa Gate.

¹³ Evale Davi ohosandutcha joira jaye, liye roma vikalihaga nnga namihala. Liye roma wangaga misuwo da sidadile eto liye kumihaga mare, aliwa teleleyaga ante fiyedaga nyetihaga ndevu.

¹⁴ Evale mwene Akiji agaonne enne, ohoroma wonga na asogolrelri aye ale eraga: <<Kodi wenna kahi namihala? Nnga mwasiwa gwa nni mmuzagana uno?

¹⁵ Ira nyo mmuzena vamentoni vaga namihala nnga wenna, kodi miyo vano dera asauwela anamihala? Kodi nyo munaonamo ira mutula gofwanela volowa mmba mwaga?>>