1 Samuweli 19 - Mazu Otchena a Mulungu

Sawuli ofuna jompa Davi

¹ Siku nimohi Sawuli ohomuwandela mwanaye Jonata vamohi na asogolrelri aye atene ira: <<Miyo nnafuna mudowe mwampe Davi!>> Mbwenye voira mulombwana Jonata omuziveliwetchetcha Davi,

² ohomaruwaga, liye dowa muwandela mulombwana Davi ira: <<Eni baba unafuna aupe. Nona inafwanela weyo metchelo uvenye muwari mozemba na mabebehene, udowe wavitale nimburo nohooneya na atu.

³ Miyo metchelo evo nnodowa danvepe babaga ira dimuzena munda wenno unafuna we vitala ira ditapanyevo zela weyo. Eto jinawonge baba, miyo nnoza duwandele.>>

⁴ Nomala eno, mulombwana Jonata ohovenyaga, liye dowa nfwanya babaye, aliwa dowa wandamelana nimburo neno navitanlege mulombwana Davi. Kagafiyile vevale, mulombwana Jonata ohoromaga muwandela babaye ule zela japama jaira Davi eraga: <<Babani, kinafwanela nyo mmutegele Davi mwasiwa liye kanarome utegelani. Eto jatene jinaira liye, unasakanyetcha muwari moukamihedani.

⁵ Liye ohovilevela kwa, liye dowa wana na nFilistewu ule Goliya fiyeda mpa eto Yehova ohonikamiheda hiyo aIzarayeli atene fiyeda agondjiha aFilistewu na mwasa wa mulombwana Davi. Nyo eto muhuona jatene jejo. Mwagaonne, muhuziveliwa. Nnga mwasiwa gwa nni babani inafunela nyo irana yengo yotega nnga yenno, mufunaga joira mumpe Davi, liye ahautegenleni?>>

⁶ Mwa enne mulombwana Jonata agamanle muwandelamo babaye zela japama jaira Davi, Sawuli ohovwaga yovepa ya mwanaye Jonata, liye fiyeda lumbela ira: <<Miyo nnawonga vamentoni va Yehova okalawo ira miyo kannampa Davi.>>

⁷ Nomala eno, Jonata ohomuitanaga Davi, liye muwandelamo jatene jawongile babaye. Mwa enne ohomutukulaga Davi, liye mudowana wa babaye. Evale Davi ohowelelaga mulaba Sawuli nnga jeretcha liye voroma vene.

⁸ Noira eno, yohooneya kondo imohiwa aIzarayeli akokene na aFilistewu. Evale Davi na anyakondo aye kohodowaga wana na aFilistewu ale. Muwari mowana mule, kohapaga aFilistewu adjindji, amohiwa kohotawaga.

⁹ Siku nimohi niwa, Sawuli agali ogaratene mmba mwaye agahidedile mwanango mmandani mwaye, Yehova ohomurumaga munemba wabure, liye muzela akoka. Mwa enne Davi ohotukulaga arpa waye, liye imbaga.

¹⁰ Evale Sawuli ohonvokagana Davi mwanango wenne ahidedile liye mmandani mwaye mule ira amulatena, amuwambe na ntchihi. Mbwenye Davi ohorambaga. Evale mwanangole adowilege lata vantchihini. Nomala eno, mahiyu amohive anne Davi ohovuluwaga, liye tawela vande vaye.

¹¹ Noira eno, siku nimohive nenne natawenlege Davi vande vaye, Sawuli oharumaga alombwanaye ira: <<Mudowe mwanvitalele vaniwa ira metchelo na mabebehene mumpe!>> Mbwenye Davi muhiyanaye wenno aitaniwa Mikali, ohomuwandelaga mamunaye ule, liye ira: <<Kavenya utawe. Tchoira mahiyu anna wahatawe, metchelo unopiwa.>>

¹² Evale Mikali ohomutitihedaga vajanelani, liye dowaga jaye. Mwa enne ohotawaga, liye vuluwa.

¹³ Noira eno, Mikali ohotukulaga ikwamutu yosema, liye dowa igonantiha vakamani vagonetcha Davi. Ohotukulaga eto musamelro asakanyiwe na mawoya a mbuzi, liye dowa sameliha muru wa yosema ile. Nomala eno, ohoikunelaga na lensori.

¹⁴ Evale alombwana karumiwe na Sawuli ale kagadowile ira kamuhinde Davi, Mikali ohawandelaga ira: <<Mamunaga uli mmba mu, unabulela.>>

¹⁵ Sawuli agavwile mazu anne, ohawongagana alombwanale ira: <<Kadowani mwamutukule na kamayene mmuzena uno ira dimpe.>>

¹⁶ Evale alombwanale kagadowile, funa volowa mmba ira kamutukule, vakamani vale kafwannyegevo ikwamutu yosema ile eto miruzuni uwa kafwanyilewo musamelro wenno asakanyiwe na mawoya a mbuzi.

¹⁷ Sawuli agavwile jejile, ohonfukaga mwanaye Mikali, liye ira: <<Kodi mwasiwa gwa nni udinyengaga, umuhiya mwidanaga atawa?>> Evale Mikali ohowakula, liye ira: <<Liye ere diwandela ira: <Wahaditawihe, miyo nnoupa weyo!> Nona miyo dimuhiya atawa.>>

Sawuli agali na anamafiyiheda

¹⁸ Evale Davi agatawile, adowilege ilambo ya Rama, liye dowa fiya vande va Samuweli muwandelamo jatene jamuirela mwene Sawuli. Noira eno, Samuweli ohomutukulaga Davi, aliwa dowa kalaga Nayoti.

¹⁹ Evale Sawuli ohovwa ira: <<Eni Davi unakala tatamo ya Nayoti muwari mwa sidadi ya Rama.>>

²⁰ Agavwile enne, oharuma alombwanaye ira: <<Kadowani mwamuhinde mulombwana Davi, wewo unafwanyeya liye wo.>> Aliba rumiwale kagafiyile wewule, kafwanyilege nikuru na anamafiyiheda neno nasogolrelriwa na mulombwana Samuweli kafiyihedaga ja Mulugu. Evale Mulugu ohomuruma Munemba waye dowa kala na alombwana a Sawuli ale, na aliwene roma wongaga ja Mulugu.

²¹ Mwa enne Sawuli agavwile ira: <<Atu waarumile we ale eni anawonga ja Mulugu>>, oharumaga amohiwa. Eto na anne kagadowile, kohoroma wonga ja Mulugu. Evale oharuma atu amohiwa fendo yaneraru, na aliwene eto kohovolowaga nikuru na afwiwa ale, aliwa wongaga ja Mulugu.

²² Evale Sawuli ohovenyaga liyene mwinnya adowaga ilambo ya Rama. Agafiyile vaisimeni ilukulu yafwanyeya ilambo ya Seko, ohofukedaga ira: <<Kodi Samuweli na Davi anafwanyeya waani?>> Atu kohomuwakulaga ira: <<Samuweli na Davi anafwanyeya Nayoti, sidadi ya Rama.>>

²³ Evale Sawuli ohovenyihanaga, adowaga Nayoti muwari mwa sidadi ya Rama. Adowaga, Munemba wa Mulugu ohozaga kala na liye, evale ohoromaga wonga ja Mulugu na ndila adowaga, ante liye fiya Nayoti ule awongagave ja Mulugu.

²⁴ Agafiyile vande vali anamafiyiheda vale, ohowungulaga jowara jaye, liye roma wonga ja Mulugu vamentoni va Samuweli. Noira eno, ohogonanti vati mandave, liye kalave ogonantene siku natene fiyeda mahiyu atenene, unde fiyeda tcha agalive ogonantene mandave. Nona ante peno atu kawongaga ira: <<Kodi na Sawuli wenne gu namafiyiheda?>>