1 Samuweli 17 - Mazu Otchena a Mulungu

Goliya ohopokiha nikuru na anyakondo a aIzarayeli

¹ Mwa tempu yenne aFilistewu kohomaruwaga ira kadowe kawane kondo na aIzarayeli. Aliwa kohodowaga gumana Soko, sidadi imohi ya Juda. Kagagumanne, kohodowa manga misasa diwa nimburo nimohi eni naitaniwa Efesi-Damini, wu ilambo ya Azeka, wu ilambo ya Soko vari viwa.

² Eto mwene Sawuli vamohi na aIzarayeli atene kohodowaga kunga misasa diwa wandamelana ndabo na Karvaliyo. Evale kohoroma tandana ira kawane na aFilistewu.

³ Fwanyeya ira aFilistewu ale kaimenle mwango mmohi afwanyeya pandi imohi ya wu. Eto aIzarayeli kaimenle mwango mmohiwa, afwanyeya pandi ya wu. Vari viwa vale vohokala ndabo eni, aliwa ing'ananaga.

⁴ Mwa enne ohokalagawo munyakondo mmohi wa kopolo akumilege vakapamentoni va aFilistewu vale wenno aitaniwa Goliya. Waniwa ali ilambo ya Gate. Liye ali mulombwana olapa okwakwana mameturu mararu.

⁵ Liye owaretcha kapaseti wa mukuwa eto owaretcha kamiza yokana magoru a mukuwa, yenno yanyemela kilu 60.

⁶ Mmendoni mwaye, owarihamo jengo jobarela mendo daye, jagali ja mukuwa eto ohokana mwanango mung'onong'ono wa mukuwa akapatcha liye unduli waye.

⁷ Liye ohokana eto mwanango mulukulu onyemela. Woxongowa uwa ule ali wa momba wanyemela kilu tanu na mbinli. Liye awendaga, omukana munyakondo mmohi akala sogolro waye, liye hidedaga defeza yaye.

⁸ Evale mulombwana Goliya ohozaga wali aIzarayeli, liye imela roma kuwa eraga: <<Mwasiwa gwa nni nyo mwatene muvitandaga nnga munafuna muwane? Miyo dili nFilistewu eto nyo muli anamalaba a Sawuli! Miyo nnafuna mmusakulre mulombwana mmohi muwari mwa nyo ira aze awane na miyo.

⁹ Liye awanda digondjiha afiyeda dipa, era eno, hiyo nnokala azari enyu. Mbwenye miyo dimugondjiha, difiyeda mpa, nyo munakala azari ehu, munilabege.>>

¹⁰ NFilistewu ule ohowongagave eraga: <<Miyo peno nnaona ira nyo alombwana atene a aIzarayeli, kamuli yengo. Mmusakulre mutu mmohi ira aze awane na miyo.>>

¹¹ Evale mwene Sawuli na aIzarayeli atene kagavwile mazu awongaga nFilistewu ule, kohorendjeyaga, aliwa roma kana ova wohokala wa masika.

¹² Ora yenno Davi akumbuza mabila a Babaye. Babaye ali Jese, nkuda Efarayimi eto akala tatamo ya Beleme muwari mwa ilambo ya Juda. Eto Jese anna anapongwe atanu na araru. Tempu yatonga Sawuli nnga mwene wa aIzarayeli, mulombwana Jese afwanyeya agali mundimuwa oulula bure aganna yaka didjindji.

¹³ Eto ahimaye araru arandji kohodowa kondoni na mwene Sawuli. Maziniwa ba ala: Mwana oroma aitaniwa Eliyabe, wanembinli aitaniwa Abinadabe, waneraru aitaniwa Sama.

¹⁴ Davi ali wa itongohiwa. Abalaye araru oroma ale kakala na mwene Sawuli malambo matene.

¹⁵ Davi mbwenye adowetcha vakapamento va Sawuli, liye labaga wewule. Amala laba, liye dowaga vande, dowa kumbuzaga mabila a babaye ilambo ya Beleme.

¹⁶ Mulombwana Goliya nFilistewule, va kada siku odowetcha wa aIzarayeli na mabebehene na ntana liye wongaga mazu mamohive anne fiyeda malambo 40 aapudjagave enne.

¹⁷ Muwari mwa malambo anne mulombwana Jese ohomuwandela mwanaye Davi, liye ira: <<Kavenya mobaranya, utukule kilu kumi da tirigu owaringa ula, na pawu kumi di udowena waavahe abalawo kapamentoni wewo unafwanyeya atu.

¹⁸ Eto utukule jodja kumi ji jisakanyiwe na mukaka, udowe wanvahe musogolrelriwa wenno unaasogolrelra anyakondo 1.000. Udowe waaone abalawo akala kali apamene, wamala uzena yengo yodivaha ibaribari ira waafwannye apamene.

¹⁹ Tchoira abalawo na mwene Sawuli vamohi na alombwana a aIzarayeli atenene anafwanyeya ndabo na Karvaliyo, anawana na aFilistewu.>>

²⁰ Evale mmetcheloni muwa muzombwe Davi ohovenyihanaga na mabebehene, liye muhiyeda mabila ale mutu mmohiwene ira aing'anelege. Liye ohotukulaga mivaho dile, liye maruwa dowaga nnga mwemo babaye Jese mwamurumele liye. Mwa enne liye afiyaga wene vakapamentoni vale, erege alinganana aIzarayeli kavenyihanaga no kuwa ira kadowege kondoni.

²¹ Evale aIzarayeli na aFilistewu kohatanda anyakondo ewa ira kawane, ala wu, ala wu.

²² Mwa enne Davi ohodowaga muhiyeda jengo jile mundimuwa aing'anela mitolro, liye tamanga dowa sogolro wa kondo. Liye dowa fiya vali abalaye, liye alondjela.

²³ Davi awongagave na abalaye ale, mulombwana Goliya, munyakondo mundimuwa wa aFilistewu wenno akuma ilambo ya Gate ule ohozagave akoka, liye roma wonga mazu mamohive nnga molemelela. Davi mbwenye ohonvuruwanaga.

²⁴ Eto aIzarayeli kagamuonne mulombwana Goliya awongaga mazu anne, kohomuovaga, aliwa roma tawa, keraga:

²⁵ <<Alombwana, munomuona mulombwanole?! Liye uhuza nipokiha hiyo aIzarayeli. Mutu wenne unampe mulombwana wenne, mwene Sawuli unonvaha jorayela eto unonvaha mwanaye ira amutele. Eto abalaye atene a babaye, kiza kasokiwaga misoko.>>

²⁶ Mwa enne Davi ohafukaga alombwana aawandamenlege liye, eraga: <<Kodi mutu wenne unampe nFilistewu ule, amaliha manyazo anna hiyo aIzarayeli, unavahiwa nni? Kodi nFilistewu mutu ohoineliwa nnga wenna bani ira liye aze apokihege na makalelo anna nikuru na anyakondo a Mulugu Okalawo?>>

²⁷ Evale anamwindji kohomuwandelaga mazu mamohive anne kawongaga keraga: <<Hiyo niwongile ira mutu wenne unampe mulombwanole, mwene Sawuli unonvaha jorayela eto unonvaha mwanaye ira amutele. Eto abali atene a babaye, kiza kasokiwaga misoko.>>

²⁸ Evale Davi vaafukaga liye anyakondo ale zela jejile, kamuwandelagamo, mbalaye wa mulukuluwa wenno aitaniwa Eliyabe, aganvwile Davi awongaga enne, ohotakaleliwaga na makalelo ohokala a masika zela Davi, liye nfuka eraga: <<Kodi weyo wazelawo nni uno? Nnga mabila a vang'ono ale umuhiyedile ani muisalesaleni? Miyo dihiiziwa makalelo awo na ibure ya murimawo uyo. Weyo eno wazela ira uone kondo bahi!>>

²⁹ Evale Davi ohonfuka mbalaye ule, liye ira: <<Kodi fendo ila miyo diirile yabure nni? Kodi ditegile fuka bahi?>>

³⁰ Nomala eno, Davi ohorungunuwa, liye nfuka munyakondo mmohiwa zela yotambilra ya mutu wenne afune mpa nFilistewu ule. Evale atwale kohomuwandelaga akoka zela yotambilra ya mutu wenne afuna wanda mpa Goliya.

Davi ohovivelela ira awane na mulombwana Goliya

³¹ Evale atwale kagavwile mazu afukaga Davi, kohoviraga, aliwa dowa muwandela mwene Sawuli, zela jawongilege muzombwe Davi. Evale Sawuli agavwile ohowongaga, liye ira: <<Kadowani mwamuwandele ira afiye uno.>>

³² Davi ohofiyaga evale, liye muwandela Sawuli ira: <<Kakalevo unafune muova nFilistewu ule. Miyo namalaba wenyu nnodowa dawane na liye.>>

³³ Evale Sawuli ohomuwakulaga, liye ira: <<Nari, weyo kudowe wawana na nFilistewu ule, tchoira weyo uli muzombwe eto kunna kopolo dowanana mundimuwa nnga ha ule. Liye eto gu munyakondo, uromile wana na atu romela uzombweni waye.>>

³⁴ Davi ohomuwakulaga eraga: <<Miyo namalaba wenyu danna mabasa okumbuza mabila a babaga. Muwari mokumbuza mabila mule, akala aza ali podogoma nari urusu atukula nibila naga,

³⁵ miyo domuhara miyo mbubuda, muwaka mwana nibila nne. Eto liye adirungunuwela, miyo damuhinda ndevu, miyo mbubuda, liye kwa.

³⁶ Miyo namalaba wenyu, dahaapa apodogoma na aurusu. Eto nnafuna dimusakanye na makalelo amohive nFilistewu ule, mutu ohoineliwa, mwasiwa liye upokihile nikuru na anyakondo a Mulugu Okalawo.

³⁷ Yehova wenno udiwombonle mmandani mwa apodogoma na mmandani mwa aurusu, gu mmohive unere adiwombole mmandani mwa nFilistewu ule.>> Davi agawongile mazu anne, Sawuli ohowakula, liye ira: <<Tabo, ihikala pama! Venya udowe eto Yehova akale na weyo!>>

³⁸ Mwa enne Sawuli ohomuwariha Davi jowara jaye ja kondoni. Liye tukula kapaseti wa mukuwa, liye muwariha eto ohomuwarihaga kamiza ya mukuwa.

³⁹ Evale Davi ohotukulaga supada na Sawuli, liye soleda musintuni neno nafwanyeya mmwinini mwaye, unde wa jowara ja kondo jejo jawarile liye. Nomala ohoxixeda wendana, mwasiwa ali ahanairegena. Agawendilena vang'onove, Davi ohomuwandela Sawuli, liye ira: <<Ii, miyo kannawanda wendana, mwasiwa kadilemenle.>> Mwa enne ohowungulaga jatene jejile.

⁴⁰ Nomala eno, liye tukula ikumbuzo yaye mmandani mwaye, liye dowa mwana muhindje eni, adoda mabwe matanu opelrepeteya pama, liye ahela mutumbani mwaye. Nomala eno, ohotukulaga yavokana liye mabwe mmandani mwaye, liye maruwa ira adowe awane na nFilistewu ule.

Davi ohompa mulombwana Goliya

⁴¹ Evale nFilistewu wenno aitaniwa Goliya ohoromaga za waligi Davi ule, nkamihedaye wenno atukuletcha defeza yaye agali vasogolro.

⁴² Afiyaga vali Davi vale, ohoromaga muing'ana, liye roma mulramwisaga, mwasiwa Davi alive muzombwe eto ali muzombwe oriya, wa makalelo apama.

⁴³ Mwa enne nFilistewu ule ohonfukaga Davi eraga: <<Kodi imiri unna we mmandani mwawo unaumbuwela ira: <Wenne gu mwanambwa, nnafuna dinkomena?> >> Nomala eno, nFilistewu ule ohomutembelrelraga muzombwe Davi na mazina a amilugu aye.

⁴⁴ Evale ohowongagave eraga: <<Kafiya uno ira miyo ditukule maningo awo, divahe mbalrame dovava zulu na anavinyama a mukokolani ira kaudje.>>

⁴⁵ Evale Davi ohowongaga na Goliya eraga: <<Weyo unaza wa miyo na supada na mwanango vamohi na mwanango wawo mung'onong'ono. Mbwenye miyo nnafuna dize wa weyo na nzina na Yehova wa Makuru Matene, Mulugu wa nikuru na anyakondo a aIzarayeli anno unaapokiha we.

⁴⁶ Peno eva Yehova unodivaheda weyo mmandani mwaga eto miyo nnoupa, digwade muru wawo. Miyo peno nnotukula maningo a anyakondo a aFilistewu, daavahe mbalrame dovava zulu na anavinyama a mukokolani. Jaireya eno, pa evo vanafuna atu atene a mwilamboni ya vati kaiziwe ira Mulugu wa Izarayeli ukalawo.

⁴⁷ Eto atu atene anafwanyeya eva anoiziwa ira Yehova kanagondjiha muwari mwa supada nne muwari mwa mwanango. Mwasiwa unawana gu Yehova! Eto liye unonivaheda nyo aFilistewu atene mmandani mwihu.>>

⁴⁸ Goliya ule aromaga za wali Davi ule, Davi ohotamangaga, liye dowa pandi yafwanyeya liye ule ira awane na Goliya.

⁴⁹ Davi ohotukulaga ndanda naye volotchiha mutumbani mwaye, liye tukulamo nibwe nimohi, liye hela muwari mwa yovokana mabwe yaye, liye nvokana mulombwana Goliya. Evale nibwe nne nohodowaga nkoma vakoveni, aliwa fiyeda volowa vakoveni vaye. Noira eno, Goliya ohogwelaga vati na koveni.

⁵⁰ Mwa enne Davi ohomugwiha Goliya na yovokana mabwe anna liye na nibwe nimohi bahi. Nomugwiha, Davi ohompa. Mpa uwa, Davi mmandani mwaye nne supada kaanna.

⁵¹ So agaonne ira Goliya uhugwa uli vati, Davi ohotamangaga, liye dowa valigi Goliya vale, liye pulula supada na mwinnya wenne, liye mpana, gwada muru waye. Evale aFilistewu kagaonne ira: <<Munyakondo namuroromela hiyo uhukwa>>, kohotawaga.

⁵² Nomala eno, alombwana a aIzarayeli na a Juda, kohoromaga kuwa, aliwa aharaga aFilistewu katawa ale. Kohoromaga ahara kaapaga, ante aliwa afiyana sidadi ya Gate, ante vamulangoni va Ekoromi. Evale dofwanyeyaga mitembo gwembelre gwembelre da aFilistewu kakwile, romela Sarayimi fiyeda sidadi da Gate na Ekoromi.

⁵³ Evale Ana Izarayeli kohowelaga atamangiha waatamangiha atu aFilistewu, aliwa dowa vamisasani vevo vali aFilistewu, aliwa tukulavo jengo jiwa jatene.

⁵⁴ Evale Davi ohotukulaga jowanana ja mulombwana Goliya, liye volotchiha mmusasani mwaye. Nomala liye tukula muru agwadile liye ule, mudowagana Jeruzalemu.

Sawuli ohonfukeda Davi zela babaye

⁵⁵ Fwanyeya ira Davi ahanampe nFilistewu Goliya ule, amaruwaga wene ira amuwanena, Sawuli agamuonne Davi adowaga ira awane na Goliya, ohonfukaga Abineri, musogolrelri wa nikuru na anyakondo, liye ira: <<Abineri, kodi muzombwe ule babaye bani?>> Evale Abineri amuwakunlege, liye ira: <<Miyo nnolumbela na nzina nenyu mwagali mwene ira babaye miyo kadimuiziwile!>>

⁵⁶ Noira eno, Sawuli ohomuwongana Abineri, liye ira: <<Udowe wanfukede muzombwe ule babaye ira dimuiziwe.>>

⁵⁷ Mwa enne Davi agampile Goliya, awelelaga vamusasani, Abineri ohomutukulaga Davi aganna muru wa Goliya mmandani mwaye, liye mudowana wa mwene Sawuli.

⁵⁸ Sawuli ohonfuka, liye ira: <<Muzombwe we, kodi babawo bani?>> Liye ohowakulaga, liye ira: <<Miyo dili mwana wa namalaba wenyu Jese nkuda Beleme!>>