1 Samuweli 11 - Mazu Otchena a Mulungu

Sawuli ohavunela akuda Jabeji

¹ Sawuli agahambihiwe umwene, mutu mmohi wa aAmoni, aitaniwa Nasi, ohomaruwaga vamohi na atwaye, aliwa dowa sidadi ya Jabeji-Jileyadi, aliwa rindja sidadile ira kaibwanyule. Mbwenye alombwana a sidadi ya Jabeji kagaonne enne, kohowongaga na mulombwana Nasi keraga: <<Hiyo nnafuna nisakanye yopangana yowandana na nyo eto nnorumela ira nyo munitongege.>>

² Mbwenye mulombwana Nasi nkuda Amoni ohowongaga eraga: <<Miyo ira disakanye yopangana na nyo, malringana murumele yenno inafuna miyo wonga. Miyo nnafuna didule niso na muwononi odjana na kada mutu muwari moyeviha mulogo watene wa aIzarayeli. Mwarumela yenno iwongile miyo, pinafuna miyo sakanya nipangano na nyo.>>

³ Evale andimuwa a ilambo ya Jabeji kagavwile mazu anne, kohowongaga keraga: <<Ii, mubabihe nihiya malambo matanu na menli ira nirumihe milanyo wa aIzarayeli atenene ira nione akala muwari mwa malambo anna aliwa anoza kanikamihede. Mbwenye nirumiha milanyo, vimala malambo matanu na menli aliwa kahazawo, hiyo nnovivelela mmandani mwinyu ira muniirena nnga mwemo munawongela nyo!>>

⁴ Noira eno, koharuma atu, aliwa dowa Jibeya, Sawuli waniwa. Atu a wewule kagawandeliwe, kohotomolaga kuto.

⁵ Tempu yazilege aliba rumiwa ale kaawandelaga atwale mazu anne, Sawuli akumaga minda na ng'ombe daye. Afiyaga vande ohofuka eraga: <<Kodi mwasiwa gwa nni nyo atene munanlela nyo eni?>> Evale aliwa kohomuwandelamo mulombwana Sawuli zela jatene jawandeliwe atu na alombwana karumiwe Jabeji ale.

⁶ Sawuli agavwile enne, mobaranya ohozeliwaga Munemba wa Mulugu, mwa enne ohotakaleliwaga na makalelo ohokala a masika.

⁷ Evale liye ohotukulaga ng'ombe mbinli, liye mala gwadanya. Agairile enne, oharuma atu ira kadowena nyamiwa ilambo yatene ya Izarayeli, liye ira: <<Mwaawandelege aIzarayeli ira mutu wenne ahanamuhare Sawuli na Samuweli kondoni, ng'ombe daye nnogwadanyiwa na makalelo nnga digwadanyiwile ng'ombe mbinli di!>> Evale aliba rumiwa ale kagadowile, kagawongile jatene ejo, atu atene kagavwile mazu anne, Yehova ohosakanya ira aliwa kakayena ova ulukulu. Mwa enne atene kohozaga na mirima dimohive.

⁸ Evale Sawuli ohagumanihaga alombwanaye atenene mwilamboni mwa Bezeki. Muwari mwa alombwana atene aagumanihile liye kali alombwana okwakwana 300.000 a Ana Izarayeli eto amohiwa 30.000 a aJuda.

⁹ Noira enne, kohawandelaga aliba rumiwa kakumile ilambo ya Jabeji ale keraga: <<Mudowe mwaawandele akuda Jabeji ira: <Hiyo metchelo ora ya ntana yahanafiye, nnoza ira nuvuneleni.> >> Evale aliwa kagadowile awandela akuda Jabeji-Jileyadi ale, akuda Jabeji vavwile atu mazu anne, kohoziveliwaga valukulu.

¹⁰ Mwa enne kohoviraga, aliwa dowa anyenga aAmoni ale, aliwa awandela ira: <<Hiyo metchelo nnovivelela mmandani mwinyu ira muniirena yenno inafuna nyo niirana.>>

¹¹ Mmetcheloni muwa unde wahanatche pama, mulombwana Sawuli ohagawa alombwana anna liye makuru mararu. Unde utchaga aliwa kohovenyihanaga, aliwa dowa vamisasani vevo vakala aAmoni, aliwa roma wana. Ante fiyeda ora ya ntana kohomalaga apa akuda Amoni adjindjene. Mbwenye ale kavuluwile kahapiwa kohomwadeyaga kada mutu ayaga waye wene, aliwa tawa.

¹² Evale aIzarayeli kohowongaga na mulombwana Samuweli keraga: <<Kodi ale kawonga ira: <Hiyo Sawuli kannanfuna ira akale mwene wehu>, kali waani? Hiyo nnafuna mwaazena ira hiyene naape tchineneva.>>

¹³ Mbwenye Sawuli ohowongaga eraga: <<Peno kalivo unafuna piwa mwasiwa peno Yehova uhavunela atwaye aIzarayeli.>>

¹⁴ Evale Samuweli ohowongaga na atu atene eraga: <<Nivenyeni niyeni Jiligali ira namuhambiheni pama pama Sawuli ira akaleve mwene wehu.>>

¹⁵ Evale atenene kohovenyihanaga, aliwa dowa Jiligali. Kagadowile wewule kohomuhambiha pama pama mulombwana Sawuli ira akaleve mwene wewa vamentoni va Yehova. Nomala eno, kohokutaga jovelela ja murendele vamentoni va Yehova eto Sawuli vamohi na atu atene a Izarayeli kohoteyela valukulu zela jatene jaireyile.