1 Peduru 2 - Mazu Otchena a Mulungu

Nibwe na ingumi

¹ Mwa eno, inafwanela muhiye makalelo matene oairela atu ubure, muhiye jonyenga jatene, muhiye ungongomwa, muhiye kalelana nrima eto muhiye jowamba jatene.

² Mukale nnga ahima atete. Mufunege mazu a Mulugu anno anakala nnga mukaka. Mwera eno, munerege ulukula muwari movulusiwa wenyu.

³ Mwasiwa nyo muhulawiha ira Nabwiya gwapama.

⁴ Nabwiya Yesu unafwanyeya agali nibwe na ingumi neno nakondile atu. Mbwenye vamentoni va Mulugu, Yesu unafwanyeya agali nibwe nosakulriwa eto nofuneya. Nyo muwari moza wa liye,

⁵ na nyenne eto muli nnga mabwe a ingumi anno Mulugu unamangana liye nyumba ya Munemba ira mukale anamakuta otchena okana mabasa ovelela mikuto dozela ja Mulugu, mikuto dedo nnarumeliwa na Mulugu mwa Yesu Kiristu.

⁶ Kalaga nnga mazu anafwanyeya mMazuni oira: <<Kaing'anani, miyo nnohela mwango Siyawu nibwe na vamwendoni, nosakulriwa eto nofuneyetchetcha. Mutu wenne unaroromele nibwe neno, kaza anyaswa.>>

⁷ Zela wa nyo munaroromela nibwe no, nibwe neno tofuneya. Mbwenye zela atu anne kahanaroromela, mazu anawonga ira: <<Nibwe neno nalramwisile aliba manga nyumba, peno ti nibwe na vamwendoni.>>

⁸ Mazu anawonga eto ira: <<Nibwe neno nnafwanyeya nagali nibwe noagwagwadutcha atu adjindji eto ti nibwe nnafuna agwihaga.>> Muwari mohovwelela mazu, aliwa anogwagwaduwa ira kagomele nnga mwemo mwamalele atu balriwa wanle.

⁹ Nyo mbwenye muli nlogo nosakulriwa, muli anamakuta a Umwene, muli ziza notchena, muli atu a ibaribari a Mulugu ira muwandege laleya undimuwa wa wenne uitanneni ira mukume isini mwafwanyeya nyo ira muze muvolowe wareyani waye wotikiniheya.

¹⁰ Nyo wanle kamwali nlogo na Mulugu. Mbwenye peno va muli nlogo naye. Wanle nyo kamwawatchenle tangaranga, mbwenye peno va muhuwatchela tangaranga daye.

Mawendelo a atu omuroromela Yesu vari va atu ohomuroromela Yesu

¹¹ Afwaga anaaziveliwa miyo, muumbuwele ira nyo peno muli anowenda, muli atu oza mwilamboni muno. Nona miyo nnoukokomezani ira mukonde jabure jejo jinaziveliwa maningo enyu jiwanaga na minemba denyu.

¹² Mwawendaga na atu a unde, muwendege na makalelo apama. Masiki aliwa kawongege zela nyo ira muli atu abure, inafwanela mwaairelegeve upama ira aliwa kagaonne makalelo apama munna nyo, siku neno nnafuna liye za nipanda, na aliwene kafwanyeye kagali atu omutitimiha Mulugu.

Zela avwelela aguverno

¹³ Na mwasa omuhara Nabwiya, inafwanela mwaavwelelege aliba tonga atene. Masiki perezidenti nnga mundimuwa wa ilambo,

¹⁴ nari andimuwa anarumiwa na perezidenti ira kawandege aoniha goyi atu anne anairana jabure eto kaarihedege atu anne anairana upama, atenene inafwanela mwaavwelelege.

¹⁵ Tchoira ili yofuna ya Mulugu ira nyo muwari moirana upama, muwande miyaliha johokana mabasa jinawonga azimora.

¹⁶ Nyo muwendege nnga atu okutchiwa. Mbwenye muwari mowenda nnga atu okutchiwa, kamunukede kutchiwa wenyu ira ukale dugumento noirana jabure. So inafwanela mukale azari a Mulugu.

¹⁷ Mwaarihedege atu atene. Mwaaziveliwege adibilinyu. Mmuovege Mulugu. Mmurihedege eto perezidenti.

Jokokomeza jimohi jiwa

¹⁸ Nyo azari, inafwanela mwaavwelelege apatarawu enyu no ariheda na makalelo matene. Kamwaavwelelege apamave owu opwaseyave. Mbwenye inafwanela eto mwaavwelelege na anne ali orutcha.

¹⁹ Nyo mwaonihiwaga goyi dohiyana-hiyana mwahategileve yengo, mwawanda vilela muwari momuumbuwela Mulugu, muiziwe ira yenno tchi yengo yofwanela vamentoni va Mulugu.

²⁰ Tchoira nyo mwabubudiwaga na mwasa wa jabure jinera nyo, amala muvilelaga, kodi yowatchela nni inafuna nyo za kana? Mbwenye nyo akala muonihiwaga goyi muwari moirana upama, muvilelaga muwari mwa goyi dile, inakala yengo yapama vamentoni va Mulugu.

²¹ Mwasiwa nyo muitaniwele ira muze muonihiwe goyi dedo. Tchoira Kiristu na liyene ohoonihiwa goyi dohokala da masika na mwasa wa hiyo vano. Airaga eno, anihiyeda yofwalrafwaniha ira niwandege hara manyalo aye.

²² Liye kategile, nne wanoni waye kwakumile mazu onyenga.

²³ Liye aruwaniwaga, kaanna zelru doweliha eto aonihiwaga goyi, kawongile miririmuwo zela wa atwale kamuoniha goyi. Liye mbwenye ovivelela mmandani mwa wenno unatonga mokwakwanela.

²⁴ Liye mwinnya atomeyiwaga vaimirini, ohotukula jotega jihu mmaningoni mwaye. Airaga eno, airela ira nikale okwene zela jotega mbwenye ingumi yehu ikale para niiregena upama. Nyo muhuvulumutchiwa na mwasa wa vilonda daye.

²⁵ Tchoira nyo mwali nnga mabila opupuruwa. Mbwenye peno va muhuwelela wa Namakumbuza wenno unaing'anela minemba denyu.