1 Peduru 1 - Mazu Otchena a Mulungu

Malondjelo a Peduru

¹ Unalremba gu miyo Peduru, namarumiwa wa Yesu Kiristu. Nnoulrembelani nyo atu osakulriwa na Mulugu munafwanyeya omwadeyene, mutawenle vilambo da unde maporovinsiya a Ponto, Galasiya, Kapadosiya, Aziya na Bitiniya,

² musakulriwe na Mulugu Baba nnga mwabalrele liye wanle ira mwa Munemba waye Otchena muwande kala atwaye otchenihiwa ira muwari mokala atwaye, muwandege nvwelela Yesu Kiristu eto mukale atu owokeliwa sangiri naye. Malondjelo anaurumihedani miyo ba ala. Difunne ira sayi na murendele jiwendjediwe wa nyo.

Mulugu atamaleliwe zela yoing'anela ya ibaribari inavaha liye

³ Otamaleliwa akale Mulugu, Baba wa Nabwiya wehu Yesu Kiristu mwasiwa na tangaranga daye dilukulu, ohonibala akoka ira niwande kana yoing'anela ya ibaribari yokumela muwari movenya wa Yesu Kiristu mokwani.

⁴ Liye ohonibala akoka ira nize niwatchele mareliho ohowanda vunda, ohowanda takalihiwa, ohoduwa anno Mulugu uukoyenleni liye ilambo ya zulu.

⁵ Muwari mwa kopolo da Mulugu nyo munokoyiwa na nroromelo nenyu eto ira muze muwatchele vulusiwa wenyu wewo unafuna za oneyihiwa tempu yogomiheda.

⁶ Muwari moira muhumala iziwa makalelo anafuna nyo gomela, munowanda hagalala masiki ikale yofuneya ira muzuzumihiwe muwari mwa makatamiho ohiyana-hiyana para tempu ya vang'ono.

⁷ Tchoira nnga jinaireya na oru agalive yengo inaing'anela nongeya mbwenye unobabiha xixiwa na munlo, na makalelo mamohive nroromelo nenyu nnafwanyeya nagali yengo yofuneya kwaranya oru, nnafuna nixixiwe muwari mwa makatamiho anno ira niwande oneya pama pama ira ta ibaribari. Nroromelo nenyu nnaxixiwa ira Yesu Kiristu aza aoneyihiwa, nifwanyeye nagali nroromelo nnaziha tamaleliwa, rihiwa no titimihiwa.

⁸ Masiki nyo malambo a mundulrimu mwahamuonileve Yesu, munowanda muzivela. Eto nyo masiki peno va mwahamuonagave, munowanda muroromelave eto munowanda kana hagalala wohowanda wongeya, hagalala wohokala wa masika.

⁹ Muwari mwa emule, munoza muwatchele yenno yasaka nyo muwari mwa nroromelo nenyu, inafwanyeya yagali vulusiwa wa minemba denyu.

¹⁰ Zela vulusa wewo, anamafiyiheda wanle kohofiyiheda mazu a Nabwiya kawongaga zela sayi da Mulugu dedo dafuna liye za uvahani. Kagamanle fiyiheda, aliwa kohoroma fuka, kasakasakaga iziwelamo pama pama jafiyiheda atu jile zela makalelo bavi wafuna za vulusiwa wehu.

¹¹ Na mwasa oira Munemba wa Kiristu ali muwari mwa aliwa, kohofiyiheda mazu a Mulugu kawongaga zela makatamiho afuna Kiristu ona na upama wafuna liye watchela magomelo wa goyi danna liye. Aliwa eto mutuwa kamuwonga atu tchawandile muiziwa. Evale aliwa kohosakasaka ira kaiziwe ira: <<Kodi mutu guvi unafuna za eto tempu tchivi inafuna liye fiya?>>

¹² Evale Mulugu ohowanda aoniha anamafiyiheda ale ira: <<Jejo jafiyiheda nyo kajinalaba tempu yenyu mbwenye jinafuna jize jaafwanye atu amohiwa sogolro.>> Atu a sogolro kawongiwa gu nyenne. Tchoira muwari mwa kopolo da Munemba Otchena wenno ukumenle zulu, kohokalawo kazile ulaleyani ibaribari zela japama jawongiwa wanle, aliwa ulaleyani Muselu Wapama, jejo jinavenda angelro ira kaiziwe.

Mulugu uniitanne ira niwende na makalelo otchena

¹³ Na mwasa wenno inafwanela mmirimani mwenyu mukale mosakanyedeya mwene eto mukayena muru wapama. Yodediheda yenyu yatene ikale sayi dedo nnafuna nyo za vahiwa na Yesu Kiristu tempu inafuna liye za oneyihiwa.

¹⁴ Mukale nnga ahima ovwelela. Kamuwendegena jofuna ja maningo jejo jawendetchana nyo wanle tempu yali nyo mwahanaiziwe yengo tchivi.

¹⁵ Mbwenye mofutukula, nnga wenno uuitanileni gotchena, na nyenne mukale otchena muwari mwa jatene jinera nyo.

¹⁶ Tchoira mazu a Mulugu anawonga ira: <<Mukale otchena, mwasiwa na miyene dili Otchena.>>

¹⁷ Akala nyo munowanda muira Baba wenno unatonga mohokana nsakulro molingana na mabasa analaba kada mutu, inafwanela muwendege momuova Mulugu malambo matene anawenda nyo nnga alendo mwilamboni muno.

¹⁸ Tchoira nyo muhumala iziwa ira muhuwomboliwa mwa makalelo enyu ohokana mabasa anno mwalandihiwe nyo na makolo enyu. Eto nyo muhuiziwa ira kamuwomboliwe na jengo jowanda nongeya nnga parata owu hehi oru.

¹⁹ Mbwenye nyo muwomboliwe muwari mwa sangiri nofuneyetchetcha na Kiristu, nnga sangiri na mwana nibila nohorangala eto nohokana yodugudela.

²⁰ Liye asakulriwe na Mulugu, zulu na ilambo ya vati jahanapandutchiwe, mbwenye tempu yogomiheda ila Mulugu uhuwanda muoneyiha ira muone upama wenyu.

²¹ Muwari mwa Kiristu nyo munowanda muroromela Mulugu wenno anvenyihile Yesu mokwani, anvaha undimuwa. Jejo Mulugu airilena ira nroromelo nenyu no ing'anela wenyu jiwande kala na liye.

²² Nyo muhuvitcheniha minemba denyu muwari movwelela ibaribari, eto peno muhukana zivelana wa ibaribari nnga anazivelana atu a muibalini mmohive. Nona inafwanela muwendegeve no zivelana wewo mohokayikela eto na mmirimani mwenyu mwatene.

²³ Mwasiwa nyo muhubaliwa akoka. Dawongaga ira muhubaliwa akoka, kamubaliwe na mbewu inamela, amala ivunda, nari. Mbwenye baliwa wenyu, mubaliwe na mbewu yohoing'anela vunda. Mubaliwe muwari mwa mazu a Mulugu anno kanna ingumi eto anno kahanna goma uwa.

²⁴ Kalaga nnga mazu a Mulugu oira: <<Atu atene analingana na mpinda. Undimuwa wewa unalingana na folori da mpinda. Tchoira mpinda unonyala eto folori nnovareya.

²⁵ Mbwenye mazu a Nabwiya ba mazu a mukalakala.>> Mazu a mukalakala anawongiwa gu Muselu Wapama ulaleyiwe nyo.