Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 Korinto 4 - Mazu Otchena a Mulungu


Mabasa a anamarumiwa

1 Nyo mwaniona hiyo anamarumiwa, inafwanela muwande iziwa ira nili anamalaba a Kiristu, nili atu ovahediwa jokoyeya ja Mulugu.

2 Muwari movahediwa, mutu ovahediwa mabasaye ku irana jejo jivahediwe liye.

3-4 Para miyo, makalelo anafuna nyo ditonga nari makalelo anafuna andimuwa a ilambo ya vati ditonga kahi yengo. Eto miyo meka kannawanda vitonga. Tchoira mwilamboni ya vati muno, miyo meka daing'anamo, nnaviona nnga kadinna mulandu. Masiki eno afwase dihikana mulandu dahaiziwile miyo. Nabwiya eka mbwenye gunafuna za ditonga.

5 Nona kakalevo mutu unafuna nitonga hiyo anamarumiwa zela jengo johooneya tempu yahanafiye, Nabwiya ahanaze. Tchoira aza, liye gunafuna vitula jengo johooneya jejile jaireya muisini eto unokumiha vatando joumbuwela ja kada mutu. Pa evale vanafuna za Mulugu mutambilriha kada mutu upama wenno unafuna liye vahiwa.

6 Jatene ejo nnawonga zela miyo na Apolo ira nyo abalaga mukayena ibaribari, mufundje mwa hiyo ira mwahakwaranye yenno ilrembiwe ira mwahakale ovitukulela, nyo nfunaga mutu mmohi mukwaranya nfwaye.

7 Kodi usakannye ira nyo mukale oakwaranya atu amohiwa ali ani? Kodi ikala yengo inna nyo mwahairile nyo vahiwa? Nari. Akala jatene jinna nyo mwere vahiwa, munawanda avi vititimiha ira: <<Yengwela disakannye meka.>>? Kalaga nnga kamuire vahiwa.

8 Nyo munaviona nnga mumala kana jatene jinafuna nyo eto mumala rayela, hiyo anamalaleya naharayenle. Munaviona nnga muli amwene. Mwahakanlege amwene a ibaribari, na hiyene nogokala. Nipevo niwa nerege nifwanya, hiyo eto nerege sogolrelra vamohi na nyo!

9 Mbwenye dionne ira Mulugu usakannye ira atu kaniona, kanionege nnga atu ohokana mabasa. Mulugu usakanya ira atene anafwanyeya mwilamboni ya vati muno nari atu nari angelro kaniing'ana hiyo anamarumiwa, kanionege nnga nili atu ogondjihiwa odowa mapiwelo.

10 Atu kaniona hiyo anamarumiwa nikalelaga ntindi laleya nzina na Kiristu, ananiona nnga nili azimora. Nyo eto mwaviona, munaviona nnga muli aKiristawu a toto. Hiyo atu kaniona, ananiona nnga nili ovuta. Nyo eto mwaviona, munaviona ira: <<Nili atu olimba.>> Nyo munoteteliwa. Hiyo nnapetiwa.

11 Malambwala nnawenda na ntona na ndala na usiwa. Nnovahiwa makofi eto kaninna vande vehu.

12 Ira nidje, nnalaba mabasa na mandihu. Napetiwa, nnomureliha wenno unipetile. Naharahariwa, nnovilela.

13 Mutu aniluluviha, nnomuwakula mwapama. Roma wanle pakana na vanove, atu kaniona, ananiona nnga makata a mwilamboni ya vati, jengo jinatatileliwa vazunguni.


Pawulo awenda na aKorinto nnga mutu na ahimaye

14 Daulrembelagani jeji eni, kannalrembela ira munyaswe, nari. So nnalrembela ira dukokomezeni nyo nnga anaga anouziveliwani miyo.

15 Tchoira masiki mukayena aliba venda joufundjihani ja Kiristu oindjiva ohowanda kontareya, ababinyu kinakala adjindji, nari. Tchoira miyo gunafwanyeya dagali babinyu muwari mwa Yesu Kiristu mwasiwa uwandile ulaleyani Muselu Wapama gu miyo.

16 Muwari mokala babinyu, miyo nnoukokomezani nyo anaga ira mudisazihege miyo vano babinyu.

17 Ira muwande disaziha miyo, nnomuruma Timoteyo ira aze wa nyo, auwumbutchedeni makalelo anawenda miyo muwari mwa Kiristu. Timoteyo gu mutu unamuziveliwa miyo eto gu mwanaga ororomeleya mwa Nabwiya. Liye unouwandelani makalelo aga owenda muwari mwa Kiristu nnga nnafundjiha miyo mwa kada nikuru na atu omuroromela Yesu mwatene mwene munavira miyo.


Yofuna ya Pawulo yoapanda aKorinto

18 Miyo dihiiziwa ira muwari mwa nyo kohokalamo atu amohiwa anavitukulela, umbuwelaga ira: <<Pawulo kaza awelela za nipanda akoka.>>

19 Mbwenye Nabwiya afuna, tchineneva nnoza dupandeni wewo. Miyo dagazile, kannakukumuwa na mazu anawonga atu ovitetela ayo, nari. So nnafuna dione kopolo dinna atu.

20 Mwasiwa Umwene wa Mulugu kahi yengo yowonga jengo jidjindji mbwenye tchi yengo ya kopolo daye.

21 Nnga nyo munafuna dazaga dizena makalelo bavi? Dizena imiri ira duwaxuleni owu dizena makalelo ouziveliwani no pwaseya?

© 2018 Visão Integral

Global Partners
ကြှနျုပျတို့နောကျလိုကျပါ:



ကြော်ငြာတွေ