1 Amwene 2 - Mazu Otchena a Mulungu

Davi amulanyaga mwanaye Salomawu.

¹ Malambo a ukwa wa Davi kawandamelaga, ohoroma muwandela mwanaye Salomawu mazu eraga:

² <<Miyo tchineneva eni nnodowa wewo unadowa atu atene a mwilamboni ya vati. Mwa eno, inafwanela weyo ukale olimba murima eto ukale mwanapongwe!

³ Eto uharihegemo yenno inaurumege Yehova Mulugu wawo. Uwendege na ndila yaye, uvwelelege mangano aye na malamulo aye, na jotonga jaye, na jowelruza jaye nnga mwemo mulrembiwele atu mmalamuloni a Mozeji ira jinahindege we vamohi na mwatene mwene munawendege we, jatene juwendelege pama.

⁴ Weyo wakala onvwelela Yehova, liye unokwakwaneliheda yenno ipanganne liye na miyo. Tchoira liye ohopangana na miyo ira: <Ahimawo kakana mawendelo apama, kawendaga vamentoni vaga mororomeleya, na mmirimani mwewa mwatene, no kalawo wewa watene, aliwa banaze kaatongege aIzarayeli malambo a mukalakala.>

⁵ <<Eto weyo mwanaga uhumala iziwa jejo jadiirele mulombwana Jowabe mwana Zeruwiya. Liye wahapa asogolrelri ambinli a anyakondo a Izarayeli, Abineri mwana Neri na Amasa mwana Jeteri. Weyo uhuiziwa, liye aapile aliwa tempu ya murendele muwari mofuna aweliheda kunyakunya zela atu kaapile atu tempu yowana kondo. Jowabe ohotakaliha sintu nafwanyeya mmwinini mwaye na xineli da manyalo aye na sangiri newa.

⁶ Weyo uirena nnga muiziwele we muwari mwa zelru dawo. Kumuhiye adowa Nimburo na Anokwa mwa murendele agamanle ulula bure.

⁷ <<Mbwenye inafwanela wairelege upama ahima a mulombwana Barizilayi, wenno uli nkuda Jileyadi eto wahiye ira aliwa kadjege meza imohive na weyo. Tchoira aliwa kohodiirela upama miyo tempu yamutawa miyo mbalawo Abisalawu.>>

⁸ Davi ohowongagave eraga: <<Eto kumudiwale mulombwana Simeyi, mwana Jera wa sidadi ya Bawurimi wa nlogo na Benjami. Liye ohoditembelrelraga na matembelrelro abure, tempu yadowaga miyo Mahanayimi. Mbwenye diwelagawo, liye agazile gumana na miyo wandamelana muhindje Jordawu, miyo doholumbela na nzina na Yehova ira: <Kadiza dupiha na supada.>

⁹ Mbwenye weyo umbalre nnga mutu okana mulandu. Tchoira weyo uli mulombwana wa toto, unoiziwa inafuna we muirela. So mbwenye masiki agalive mutu oulula enne, inafwanela umpe ira adowe Nimburo na Anokwa muwari mopiwa.>>

Kwa wa mwene Davi

¹⁰ Noira eno, Davi ohokwa, liye dowa vuma na makolo aye, liye koyiwa sidadi ya Davi.

¹¹ Liye atongile sidadi ya Eboroni yaka tanu na mbinli. Eto muJeruzalemu atongilemo yaka 33. Gumaniha yaka datene da umwene waye, Davi aatongile aIzarayeli yaka 40.

¹² Mulombwana Salomawu ohokala mwene vamalroni va babaye Davi eto umwene waye wohogarateya pama.

Piwa wa mulombwana Adoniya

¹³ Siku nimohi mulombwana Adoniya mwana Ajite, ohodowaga wa Bateseba, mmaye Salomawu. Agazile, Bateseba ohonfukaga eraga: <<Kodi za wenyu kwa murendele?>> Liye ohowakulaga eraga: <<He, za waga kwa murendele.>>

¹⁴ Evale mulombwana Adoniya ohowongaga eraga: <<Dihikana yengo inafuna miyo wonga na nyo!>> Liye ohowakulaga eraga: <<Kawonga!>>

¹⁵ Evale Adoniya ohoromaga wonga eraga: <<Nyo muhumala iziwa ira miyo gwafuna kala mwene eto aIzarayeli atene kadediha ira unafuna hambihiwa umwene gu miyo. Mbwenye jiireyile ti jimohi jiwa jene jejo jahaing'anela hiyo, mbalaga uhambihiwa mwene wa aIzarayeli, mwasiwa ali funa wa Yehova.

¹⁶ Mbwenye eni miyo nnafuna duvepeni yengo imohi bahi eto nnavepa ira murumele yovepa yaga.>> Evale Bateseba ohomurumelaga ira: <<Kawonga.>>

¹⁷ Liye ohoiraga: <<Miyo dafuna ira mudowe mwanvepe mwene Salomawu ira adivahe Abizage nkuda Sunemi ule ira akale muhiyanaga. Tchoira miyo dihiiziwa ira nyo mudowa mwanvepa, liye kaza akonda yenno ivepile nyo!>>

¹⁸ Evale Bateseba ohowakulaga eraga: <<Tabo, ihikala pama. Miyo nnodowa danvepe mwene inafuna we.>>

¹⁹ Noira enne, Bateseba ohovenyaga, liye dowa wa mwene Salomawu ira avepe jejo jawongile Adoniya. Mwene Salomawu agamuonne mmaye ule azaga, ohovenyaga ira amuwatchele, liye dowa mukokorela mmaye ule. Nomala eno, ohodowaga, liye garati vampandoni vaye va umwene, liye aruma atu ira kazena mpando mmohiwa para mmaye ule agarativo. Evale mmayele ohogaratigi muwononi odjana wa Salomawu.

²⁰ Evale Bateseba ohowongaga eraga: <<Miyo dihikana yengo imohi ing'ining'inive ira duvepeni, so mwene! Dera murumele yovepa yaga.>> Evale mwene Salomawu ohowongaga eraga: <<Kawongani mmani, miyo kannakonda yovepa yenyu!>>

²¹ Evale Bateseba ohowongaga eraga: <<Miyo nnavepa ira mbalinyu Adoniya avahiwe Abizage nkuda Sunemi ule ira akale muhiyanaye.>>

²² Evale mwene Salomawu ohomuwakulaga mmaye ule eraga: <<Kodi mwasiwa gwa nni nyo vepaga ira Adoniya avahiwe Abizage nkuda Sunemi? Afwanele nyo mudivepaga ira miyo dinvahe Abizage vamohi na umwene watene. Tchoira liye unafwanyeya agali mbalaga wa mulukulu eto namakuta Abiyatare vamohi na Jowabe mwana Zeruwiya anafwanyeya pandi yaye.>>

²³ Noira enne, mwene Salomawu oholumbela na nzina na Yehova eraga: <<Adoniya ahakwele yovepa ivepile liye, Mulugu aditonge na makalelo anafuna liye!

²⁴ Yehova udivahile umwene wa babaga Davi. Liye uhukwakwaneliheda yopangana yaye, liye divaha umwene miyo vamohi na ahimaga. Miyo nnawonga vamentoni va Yehova okalawo ira Adoniya unokwa peno eva eni!>>

²⁵ Noira enne, mwene Salomawu ohomurumaga mulombwana Benaya mwana Joyada, liye dowa, mpa Adoniya.

Piwa wa mulombwana Jowabe

²⁶ Noira eno, mwene Salomawu ohomuwongagana namakuta Abiyatare, liye kwi: <<Umaruwe udowege vande vawo ilambo ya Anatoti. Tchoira weyo uhufwanela kwa zela joira jawo. Mbwenye miyo kannaupa peno, mwasiwa weyo wagali na babaga Davi, wohotukula Kaxa ya Yopangana ya Nabwiya Yehova eto weyo wohovira mmakatamihoni mwatene mwemo mwavira babaga.>>

²⁷ Mwa enne mwene Salomawu ohomukumihagamo mulombwana Abiyatare mabasa ahinda liye a unamakuta wa Yehova. Mwa enne kohokwakwanela mazu awongile Yehova ilambo ya Silo zela nkani wa namakuta Eli vamohi na atu a muibalini mwaye.

²⁸ Fwanyeya ira mulombwana Jowabe aharetcha jofuna ja mulombwana Adoniya, agali voroma vene ohokonda muhara Abisalawu. Mwa enne liye agavwile zela jejo jamuireyele namakuta Abiyatare na Adoniya, liye ohotawaga dowa mMusasani mwa Yehova, liye dowa hinda nnyanga na ibuwa ya mukuto.

²⁹ Evale mwene Salomawu ohowandeliwaga ira: <<Eni Jowabe utawenle mmusasani mwa Yehova eto uhidedile nnyanga na ibuwa!>> Noira enne, mwene Salomawu ohomurumaga mulombwana Benaya mwana Joyada, liye ira: <<Kadowa wampe!>>

³⁰ Mwa enne mulombwana Benaya ohozaga mMusasani mwa Yehova mule, liye muwongana Jowabe kwi: <<Mwene Salomawu udirumile ira: <Udowe wamuwandele akumemo mmusasani mwa Yehova!> >> Evale Jowabe ohowakulaga eraga: <<Miyo kannakumamo! Nnafuna dikwele mwemu.>> Evale mulombwana Benaya ohowelaga, liye dowa muwandelamo mwene Salomawu jejo jawongilege Jowabe.

³¹ Evale mwene Salomawu ohomuwakulaga kwi: <<Kadowa wairena nnga mwemo muwongele liye. Udowe wampele mwemo, unkoye ira miyo na abali a babaga Davi nahakayena mulandu zela sangiri natatinle Jowabe vahali mwasa.

³² Yehova unamuweliheda kunyakunya zela sangiri natatila liye. Tchoira Jowabe ohapa na supada alombwana ambinli ofuneya eto apama omukwaranya liye, ahali mofuna mwa babaga Davi. Liye umpile mulombwana Abineri mwana Neri wenno ali musogolrelri mundimuwa wa anyakondo a Izarayeli na mulombwana Amasa mwana Jeteri wenno ali musogolrelri mundimuwa wa anyakondo a Juda.

³³ Mwa eno, mulandu wa sangiri na atu ambinli ale, unafuna welihediwa kunyakunya gu mulombwana Jowabe vamohi na ahimaye kala no kala. Mbwenye Yehova uneregeve nvaha murendele Davi na ahimaye na vande vaye vamohi na umwene waye kala no kala.>>

³⁴ Noira enne, mulombwana Benaya mwana Joyada ohodowaga mMusasani mwa Yehova mule, liye mpa mulombwana Jowabe. Jowabe agakwile, kohomutukula, aliwa mukoya kokola ya waniwa.

³⁵ Evale mwene Salomawu ohomuhambiha mulombwana Benaya mwana Joyada ira akale musogolrelri mundimuwa wa anyakondo vamalroni va Jowabe eto ohomuhambiha namakuta Zadoki, liye kala vamalroni va Abiyatare.

Piwa wa mulombwana Simeyi

³⁶ Noira eno, mwene Salomawu ohomuitanihaga mulombwana Simeyi. Agazile ohomuwandelaga eraga: <<Umange nyumbawo muJeruzalemu muno. Wagamangile, inafwanela ukalege musidadi mwemuno, nne kukumemo.

³⁷ Mbwenye siku nnafuna we kumamo musidadi mu, ulambuwa ndabo na Sedoromi, uiziwe ira na ibaribari unokwa. Eto wagakwile, mulanduwa zela ukwa wawo unaugwela wa mwinnya.>>

³⁸ Evale mulombwana Simeyi ohowakulaga eraga: <<Iwongile nyo ihikala pama. Miyo namalaba wenyu nnoirana nnga mwemo munadiruma nyo mbwiyeni so mwene.>> Mwa enne mulombwana Simeyi ohoroma kalaga muJeruzalemu emule tempu ilukulu.

³⁹ Vagamanle yaka taru, mulombwana Simeyi ule, azari aye ambinli kohomutawaga, aliwa dowa wa mulombwana Akiji mwana Maka, mwene wa ilambo ya Gate. Mwa enne mulombwana Simeyi ohowandeliwaga ira: <<Azari awo anafwanyeya sidadi ya Gate.>>

⁴⁰ Evale Simeyi agavwile enne, ohelaga yogaratela vaburuni vaye, liye gwela dowa wa mwene Akiji ilambo ya Gate ira aawelihewo azari aye. Mwa enne ohafwanyaga, liye aweliheda vande vaye akoka.

⁴¹ Mwene Salomawu ohowandeliwa ira: <<Eni mulombwana Simeyi ohokuma muJeruzalemu, liye dowa Gate eto eni uhuwelawo.>>

⁴² Evale liye ohomuitanihaga mulombwana Simeyi, liye nfuka eraga: <<Kodi miyo kadulumbelihile na nzina na Yehova diwonga ira: <Siku nnafuna we kuma musidadi mu udowa pandi imohiwene na ibaribari unokwa?> Eto kodi weyo kwadiwakunle ira: <Mazu divwile miyo bapama, nnovwelela.>?

⁴³ Nnga mwasiwa gwa nni uza wahawandaga harihamo yolumbela yenno yasakanyaga weyo wa Yehova, nne nlamulo neno nauvahile miyo?>>

⁴⁴ Mwene Salomawu ohowongagave eraga: <<Weyo uhumala iziwa pama na mmirimani mwawo ubure watene wamuirele we babaga Davi. Nona eni Yehova gunasakanya ira ubure watene wasakanyile we uwande ugwela wa mwinnya.

⁴⁵ Mbwenye miyo dagali mwene Salomawu nnorelihiwa eto umwene wa Davi unokala wogarateya pama vamentoni va Yehova malambo a mukalakala.>>

⁴⁶ Evale mwene Salomawu ohomurumaga mulombwana Benaya mwana Joyada ira ampe Simeyi. Evale Benaya ohompa. Mwa enne umwene wohogarateya pama mmandani mwa Salomawu.