Zẹkaraya 6 - Ika

Isi Nke Isin Ọhụn Nke Ẹsatọ: Ụgbọ-anyịnyan Ẹnọ

¹ E lezi m ẹnya elu, m nọ hụn ụgbọ-anyịnyan ẹnọ kẹ wẹ gha ẹgbata ugu ẹbụọ pụla. Ugu ndị hụ wụ igwe-bronzu.

² Ẹshin-ododo ẹshin-ododo dọkpụnkọ ụgbọ-anyịnyan ibuzọ; ẹshin-ogi ẹshin-ogi dọkpụnkọ ụgbọ-anyịnyan nke ẹbụọ;

³ ẹshin-ọchan ẹshin-ọchan dọkpụnkọ ụgbọ-anyịnyan nke ẹtọ; ẹshin-ẹkịnịka ẹshin-ẹkịnịka dọkpụnkọ ụgbọ-anyịnyan nke ẹnọ. Wẹ ile ka-ẹhụ.

⁴ Ya m nọ sị mmọn-ozi hụn mmẹ lẹ ịya gba e ku, “Diọkpa, kị wụ ihiẹn ndịnị?”

⁵ Mmọn-ozi hụ nọ sị m, “Ndịnị wụ mmọn ẹnọ rị elu-igwee hụn gha ihun Osolobuẹ nwọn ụwa ile pụla kẹ wẹ jẹngụ n'ọ hụn wẹ!

⁶ Ụgbọ hụn ẹshin ogi ndị ahụn dọkpụnkọ shikọ alị Babilọnụ rị ẹbamịn-ugu; ẹshin ọchan ndị ahụn hụ e sọn wẹ; ẹshin ẹkịrịka ndị ahụn shikọ alị rị ẹbamịn ndịdan-mirin.”

⁷ Ogẹn ẹshin ndịnị ka ẹhụ gi pụha, ọ hụ a dụ wẹ nị wẹ jẹnmẹ ozigbo-ozigbo d'a ghahunmẹ elu ụwa. Osolobuẹ nọ sị wẹ, “Jẹnmẹ ni d'a ghahunmẹ elu ụwa!” Ya wẹ nọ jẹn d'a ghahunmẹmẹ elu-ụwa.

⁸ Ya Osolobuẹ nọ hị m, sị m, “Lee ẹ, ndị hụn shi ẹbamịn-ugu e mẹgụọ obi ru mmọn m alị ebẹhụ.”

E kin Wẹ Onyẹ Hụ Ẹfan A Wụ Agalaba Eze

⁹ Osolobuẹ nọ gwa m oku, sị m,

¹⁰ “D'e kunrun Hẹdaị lẹ Tobija lẹ Jedaya, ndịnị gha alị Babilọnụ wẹ kpụnshi wẹ lụa, y'a narịn wẹ siliva lẹ goru. Ụhụọhịn hụ ị narịn wẹ ya, y'e shi iwe Josaya nwa Zẹfanaya.

¹¹ Gi siliva lẹ goru ahụn mẹmẹ okpu-eze, y'e bu ẹ che onyẹ-isi nchụn-ẹjan wụ Joshụa nwa Jehozadakị isi.

¹² Y'a sị a, ‘Osolobuẹ ihiẹn ile rị okpuru ẹ sị: Ọnwan wụ okẹnnyẹ hụn ẹfan a wụ “Agalaba”. O sikọ d'a nọ ebe ọ rị wa agala; ịya jẹnkọ d'a tụn Ụlọ-NSỌ Osolobuẹ.

¹³ Ịya sikọ d'a tụn Ụlọ-NSỌ Osolobuẹ; o k'e nwọn ọghọ ndị-nze; o k'a nọdị ukpo ẹ, kị. Ọ k'a wụzị onyẹ nchụn-ẹjan ebe ọ rị ukpo ẹ a kị. Ọrụn a ẹbụbụọnị k'a layechanrịn.’

¹⁴ Okpu-eze hụ sikọ d'a wụrụ ihiẹn wẹ gi a nyanhan Hẹdaị, Tobija lẹ Jedaya imẹ Ụnọ-NSỌ Osolobuẹ, a nyanhanzị ọhụnmanị nwa Zẹfanaya wụ Josaya mẹ.

¹⁵ “Ndị rịdẹ ebe teni sikọ d'a bịa d'e ye ẹka tụn Ụlọ-NSỌ Osolobuẹ. Ogẹn ahụn, ụnụ e gi ẹ marịn nị Osolobuẹ lẹ enwẹn ẹ hụn ihiẹn ile rị okpuru ẹ zi m d'a gwa ụnụ oku. “Ihiẹnni k'e mẹ omẹni ụnụ hụ e mẹ ihiẹn Osolobuẹ wụ Chuku ụnụ ku, e mẹshi ẹ ikẹn.”