Zẹkaraya 14 - Ika

Isi Nke Mmẹnọ Ụwa Ile K'a Kụnị Osolobuẹ Isi-alị

¹ Lee ẹ, ogẹn Osolobuẹ lala alala, hụn wẹ k'e gi maye i, Jerusalẹm, kwanarịn ị ihiẹn i, nọ imẹ i keri ẹ.

² Makẹni, m k'a kịha alị ile d'a lụsọn Jerusalẹm agha, e mẹri wẹ obodo ahụn. Wẹ sikọ d'a kwarị ihiẹn rị ụlọ ndị rịn'a, kwọn ikpoho rịn'a, mẹ mgba wẹ, kebe ndị rịn'a ụzọ ẹbụọ, kpụnrụn ụzọ ohu shi alị ọzọ; kanị e wepụkọ wẹ ndị họdụnị imẹ obodo hụ.

³ Ogẹn ahụn kẹ Osolobuẹ k'e gi lihi d'a lụsọn alị ndị hụ agha k'o dọn e mẹ ụhụọhịn agha.

⁴ Ụhụọhịn ahụn, Osolobuẹ k'e gi ụkụ a ẹbụbụọ wuzo elu Ugu Olivu hụn rị ẹbamịn ọwụwa-ẹnyanwụn Jerusalẹm, Ugu Olivu e kewa ẹbụọ, gha ẹbamịn ọwụwa-ẹnyanwụn a d'e ru ẹbamịn ọdịdan ẹnyanwụn a, ọdanmgbugbu shịagbu enwẹn ẹ a pụha etintin Ugu Olivu. Azụụnnị e shi ẹbamịn ugu, azụụnnị e shi ẹbamịn ndịdan;

⁵ ụnụ a gha ọdanmgbugbu ahụn pụhanị gbapụ, makẹni ọdanmgbugbu hụ k'e rukwọrị Azalụ. Ọsọ ụnụ k'a gba ụhụọhịn ahụn sikọ k'a nọ kẹ hụn ndị nke ụnụ gba kẹ alị mẹhunmẹ ogẹn Uzịa eze Juda. Ogẹn hụ kẹ Osolobuẹ wụ Chuku m k'e gi bịa — ịya lẹ ndị-nsọ a.

⁶ O ru ogẹn hụ, ukpẹ arịkọ, makẹni onwọnni ukpẹ rị igwere k'e tini.

⁷ Ụhụọhịn hụ k'a rị ichẹn; Osolobuẹ marịn k'o k'a rị. Efinnaị arịkọ; uhinhin arịkọ — makẹni o rudẹ ẹnyasị, eki k'a rịzịkwọ elu.

⁸ O ru ogẹn ahụn, mirin e ye ndụn k'a gha Jerusalẹm e hupụha: azụụn ohu k'a rị e hushi Ohimin rị ẹbamịn ọwụwa-ẹnyanwụn, azụụn ohu e hushi Ohimin rị ẹbamịn ọdịdan-ẹnyanwụn. O hubehikọ, kẹ ọhọhị kẹ udu-mirin.

⁹ Osolobuẹ k'a wụrụ eze ụwa ile. Osolobuẹ sụọ kẹ wẹ k'a gha e fe ogẹn ahụn, ẹfan Osolobuẹ sụọ kẹ wẹ k'a gha a kpọku.

¹⁰ Alịnị ile k'e hutọ, wụrụ alị aradan: ghakwọrị Gẹba d'e ru Rimọnụ hụn rị ebe Jerusalẹm ru ẹbamịn ndịdan-mirin. Kanị, Jerusalẹm nkẹ k'a rị elu, ebe ọ rị ushin: O k'a gha Ọnụ-mgbọn Bẹnjamini pụ ọnụ-mgbọn Ibuzọ, pụzị ọnụ-mgbọn rị Ntugi, pụzị Ụlọ-nche Hananẹlụ, pụzị ebe w'a nọ a pịnpụhanị eze manya-vaịnị.

¹¹ Ịhịan k'e bisọnmẹ imẹ Jerusalẹm; onwọnzini ogẹn w'e gi tikpọ a ru alị; onwọnzini ihiẹn k'e mẹ Jerusalẹm.

¹² Ọnwan wụ emu Osolobuẹ k'a tụ ndị ile lụsọn Jerusalẹm agha hụ: uru ẹhụ wẹ k'e rehi ebe wẹ rị ndụn! Ẹnya k'e retọ wẹ mgbugbu-ẹnya, ire e retọ wẹ ọnụ.

¹³ Osolobuẹ k'e bu okẹn isusu che imẹ igunrun wẹ, onyẹ-onyẹ a mayemẹ ibe ẹ;

¹⁴ Juda k'a lụdẹni Jerusalẹm agha. Ndị nke Osolobuẹ k'e kpọnrin akụ-lẹ-ụba alị nọkunmẹni wẹ ọhụnma-ọhụnma, kẹ goru kẹ siliva kẹ ẹwuru.

¹⁵ Emu hụ Osolobuẹ tụ ndị ahụn k'o k'a tụzị ẹshin lẹ anyịnyan-mulu lẹ kamẹlụ lẹ jaki lẹ anụmanụ ile wẹ gi bịa agha.

¹⁶ Omẹgụ, ndị wẹ gbuhọdụ imẹ alị ile lụsọn Jerusalẹm agha e jẹnmẹ Jerusalẹm ahụa-ahụa d'e fe Eze, Osolobuẹ ihiẹn ile rị okpuru ẹ, lẹni wẹ d'e mẹ mmẹmmẹ Ibi-imẹ-ọdụ.

¹⁷ Alị ọwụlẹ rị elu-ụwa hụn jụ n'e jẹnkọ wẹ Jerusalẹm d'e fe Eze, Osolobuẹ ihiẹn ile rị okpuru ẹ, mirin ezuekọnị wẹ.

¹⁸ Omẹni alị Ijiptu ejẹnni, Osolobuẹ a tụ wẹ emu hụ Osolobuẹ k'a tụ alị ndị jẹnlẹni d'e mẹ mmẹmmẹ Ibi-imẹ-ọdụ.

¹⁹ Ịya wụ afụnfụn Osolobuẹ k'e ye alị Ijiptu lẹ alị ile jẹnlẹni Jerusalẹm d'e mẹ mmẹmmẹ Ibi-imẹ-ọdụ.

²⁰ O ru ogẹn hụ, mgbịrịgban mmaka ẹshin yi olu k'a wụ “Ihiẹn Wẹ Gi Kwanị Osolobuẹ”; ite wẹ gi e shi ihiẹn-oriri imẹ Ụlọ Osolobuẹ k'a rị nsọ kẹ afẹrẹ-nsọ rị ihun Ukpo nchụn-ẹjan;

²¹ ite ile wẹ gi e shi ihiẹn-oriri imẹ Jerusalẹm lẹ Juda k'a rị Osolobuẹ ihiẹn ile rị okpuru ẹ nsọ, nke wụnị ndị a chụn ẹjan k'a ghadẹ e gi wẹ e shi anụ wẹ gi chụn ẹjan. O ru ogẹn hụ, ndị-afịa arịkọzị Ụlọ Osolobuẹ ihiẹn ile rị okpuru ẹ.