Timoti Nke Ẹbụọ 4 - Ika

Isi Nke Ẹnọ

¹ M rị a gwa ị ya, a gwashi i ikẹn idẹnya Osolobuẹ lẹ Kraịstị wụ Jizọsị hụn jẹnkọ d'e kin ndị rị ndụn lẹ ndị nwụnhụnnị ikpe; m rịzị a gwa ị ya makẹ ọbịbịa Kraịstị lẹ Alị-eze ẹ, a sị ị,

² e ku oku-Chuku; e ku ẹ ogẹn ile, kẹ ọnọdị rị mma kẹ ọnọdị jọ njọ; a gwapụ ịhịan njọ wẹ, a jụgbọ, a kasị obi, e gichanrịn ndidin lẹ nkuzi e mẹ ẹ.

³ Makẹni ogẹn lala hụn ịhịan jẹnkọlẹni d'e kweri ezigbo nkuzi. Kama, ebe ntịn wẹ rị a chọsọnmẹ n'ọ nụ ihiẹn a sụọnị wẹ, wẹ k'a chọrị ndị k'a kuzi wẹ ihiẹn wẹ chọ nị wẹ nụ.

⁴ Wẹ k'a gbakitọ ezioku azụụn, sọnmẹ ilu.

⁵ Kanị, ịyụ nwẹn, dọnrin ẹnya e leban ihiẹn ile ẹnya; e dingbu afụnfụn; a rụn ọrụn onyẹ e zisọnmẹ oziọma. Mẹchanrịn ihiẹn ile ọrụn ị chọ.

⁶ Mmẹ nwẹn, wẹ rị nwan e hupụ m kẹ manya wẹ gi a chụn ẹjan; ogẹn m'e gi lama e rugụọ.

⁷ A lụgụọ m ezigbo ọgụn ahụn! A gbagụọ m ọsọ ahụn! E sọngụọ m ụzọ okukwe Kraịstị!

⁸ Ihiẹn rị nwan e cheni m wụ ugọn ezi-omumẹ, hụn Onyẹ-nwọnni-ẹnyi, Ọka-Ikpe ahụn ghalẹni a tụ ntụ, jẹnkọ d'e tu m Ụhụọhịn hụ. Ẹlẹ mmẹ sụọ, kanị ndị ile buchanrịn obi wẹ che ọbịbịa a.

Pọlụ E Ku Oku Enwẹn Ẹ

⁹ Lịlịma n'ị bịa d'a hụn m ẹgwa,

¹⁰ nị Dẹmasị a lagụọ m tọ shi Tẹsalonika, makẹni ihiẹn ụwanị rị a sụọ a; Krẹsẹnsị nkẹ e shigụọ Galeshịa, Taịtọsụ e jẹnmẹ Damashịa.

¹¹ Luku sụọ sọn m nọdị. Chọ Makị n'i wẹhẹ ẹ ị lalanị, makẹni o yeni m ẹka ọda-ọda.

¹² E zigụọ m Taịkikọsụ shi Ẹfẹsọsụ.

¹³ Ị lalanị, wẹhẹ ẹwuru hụ w'e yiye elu ẹ hụn m latọ ẹka Kapọsụ imẹ Trasị; wẹhẹzi ẹkụkwọ ndị ahụn, tụmadụ ndị hụn wẹ gi akpụkpọ-anụ mẹmẹ.

¹⁴ Alẹzanda hụn a kpụ ụzụn kọpa mẹ m eje-ihiẹn ọda-ọda. Di-nwọnni-ẹnyi jẹnkọ d'a kụ a ụgwọ ihiẹn o mẹ.

¹⁵ Ịyụ lẹ enwẹn i k'a kpachanpụkwọn'a ẹnya ọda-ọda makẹ ọgụn ile ọ lụsọn ozi ẹnyi.

¹⁶ Kẹ m bu ụzọ za ikpe, onwọnni onyẹ pụha d'e kuyeni m, ịhịan ile la m tọ. Osolobuẹ ya dodo agụnl'a yeni wẹ!

¹⁷ Kanị Di-nwọnni-ẹnyi nọyeni m anọyeni; ọ nọ ye m ikẹn, kẹni m hụn ụzọ ziru oziọma alị, zi ẹ nị ndị alị ndị ọzọ ile wụlẹni ndị Ju nụ a. Ọ zụọpụha m ọnụ ẹwọrọ ahụn.

¹⁸ Di-nwọnni-ẹnyi jẹnkọ d'a gbapụha m imẹ eje-ihiẹn ile wẹ rotọnị m, ọ zụọ m, hụn a nị m banye Alị-eze ẹ rị elu-igwee. Ọghọ ya rịn'a jẹnrin ejẹn! Isẹẹ.

Ekele Ikpanzụụn

¹⁹ Kele Priska lẹ Akwila lẹ ikpụlọ Onẹsiforọsụ.

²⁰ Ẹrastọsụ hụkwọ Kọrẹntị; m la Trofimọsụ tọ imẹ Miletusu — emu rị a kụ a.

²¹ Lịlịma n'ị bịa ogẹn-oyi gini d'e ru. Yubulọsụ lẹ Pudẹnsi lẹ Laịnusu lẹ Klọdịa lẹ umunẹ ẹnyi ile e zighọ ekele.

²² Di-nwọnni-ẹnyi ya nọyeni mmọn ị. Ẹfọma Osolobuẹ ya rịnị ụnụ.