Samuẹlụ Nke Ibuzọ 3 - Ika

Isi Nke Ẹtọ Osolobuẹ A Kpọ Samuẹlụ

¹ Ogẹnni, nwata ahụn wụ Samuẹlụ rị okpuru Ẹlaị a rụnnị Osolobuẹ ọrụn. Osolobuẹ ara gwaka ịhịan oku ogẹn ahụn, w'a ra hụnka ọhụn.

² Uhinhin ohu, Ẹlaị, hụn kayemẹgụ ẹnya, rịzịlẹni a sa ẹka e legha ụzọ, e dinẹgụọ;

³ ukpẹ hụn a rị Ebẹhụ Kachanrịn Nsọ imẹ Ụlọ Chuku eke nyụnhụn; Samuẹlụ nkẹ rị ụran imẹ Ụlọ-Osolobuẹ ebẹhụ Ẹkpẹti Osolobuẹ rị.

⁴ Ya Osolobuẹ nọ hị Samuẹlụ. Samuẹlụ nọ za, “E lee m!”

⁵ Ọ gbashi ebe Ẹlaị rị, sị a, “Lee m; ị hị m ahị.” Kanị Ẹlaị nọ sị a, “Ahịnị m'ị; kin azụụn d'e dinẹ.” Ya Samuẹlụ nọ jẹn d'e dinẹ.

⁶ Osolobuẹ nọ hịzị, “Samuẹlụ!” Samuẹlụ nọ lihi, buru Ẹlaị, sị a, “Lee m; ị hị m ahị.” Ẹlaị nọ sị a, “Ahịnị m'ị nwa m; kin azụụn d'e dinẹ.”

⁷ Ogẹnni Samuẹlụ eke marịn Osolobuẹ, Osolobuẹ eke gwatu ẹ oku.

⁸ Osolobuẹ nọzị hị Samuẹlụ nke mgbe ẹtọ, Samuẹlụ nọ lihi, buru Ẹlaị, sị a, “Lee m; ị hị m ahị.” Ebẹhụ kẹ Ẹlaị nọ ghọta nị onyẹ rị a hị nwata ahụn wụ Osolobuẹ.

⁹ Ya Ẹlaị nọ sị Samuẹlụ, “Jẹn d'e dinẹ; ọ hịzị ị, y'a sị a, ‘Osolobuẹ, kumẹ, odibo i hụ e gọn ntịn.’ ” Ya Samuẹlụ nọ kin azụụn d'e dinẹzi ebe ọ ranhịn.

¹⁰ Osolobuẹ nọ bịa d'e wuzo ebẹhụ, hịmazị k'o dọn hị mbụ, “Samuẹlụ! Samuẹlụ!!” Ya Samuẹlụ nọ sị, “Kumẹ, odibo i hụ e gọn ntịn.”

¹¹ Osolobuẹ nọ sị Samuẹlụ, “Lee ẹ, m jẹnkọ nwan d'e mẹ ihiẹn m k'e mẹ imẹ Izrẹlụ, onyẹ nụ a ọ dan ntịn ‘taị’,

¹² O ru ụhụọhịn hụ, m k'e mẹ Ẹlaị ihiẹn ile m ku ni m k'e mẹ ikpụnọ a — mẹchanrịn wẹ ile.

¹³ Makẹni a gwatọgụọ m'a nị m k'e gi ihiẹn ikpụlọ a mẹ sọnferi wẹ, makẹ njọ hụn ọ marịn; ụmụ a hụ e mẹ arụ, ọ jụgbọnị wẹ.

¹⁴ M nọ nwan kụn isi m, sị ikpụlọ Ẹlaị ‘Kẹ ẹjan kẹ oyiye, onwọnni hụn sikọ d'a saẹka finchanpụ njọ ikpụnọ Ẹlaị.’ ”

Samuẹlụ A Gwa Ẹlaị Ihiẹn Osolobuẹ Gwa A

¹⁵ Samuẹlụ nọ dinẹ eki e we fọn. Eki e fọn, ọ gụnpụsọnmẹ ụzọ Ụlọ-Osolobuẹ k'o mẹ mbụ. Egun anịn'a gwa Ẹlaị ihiẹn ọ hụn, ihiẹn Osolobuẹ gwa a.

¹⁶ Kanị, Ẹlaị nọ hị a, “Samuẹlụ nwa m!” Samuẹlụ nọ za, “Ee!”

¹⁷ Ẹlaị nọ jụ a, sị a, “Kịnị k'ọ gwa ị? Ezuemẹkwọlẹni m'ẹ. Osolobuẹ ya mẹ i ihiẹn, mẹkẹnmẹ y'ẹ, i zuemẹni m ihiẹn ọwụlẹ ọ gwa ị!”

¹⁸ Ya Samuẹlụ nọ gwachanrịn Ẹlaị ihiẹn ile, onwọnni ihiẹn o zuemẹn'ẹ. Ẹlaị nọ sị, “Osolobuẹ rọ: ya mẹ ihiẹn rị mma ẹnya.”

Ẹka Osolobuẹ A Rịsọnmẹ ndụn Samuẹlụ

¹⁹ Samuẹlụ hụ e sue, Osolobuẹ hụ a nọyen'ẹ. Onwọnni ihiẹn ọwụlẹ Samuẹlụ ku hụn Osolobuẹ mẹlẹni n'ọ bụn.

²⁰ Ọ nọ we ndị Izrẹlụ ile ẹnya, gha Danị d'e rukwọrị Biẹshẹba, nị Samuẹlụ wụ ọnụ Osolobuẹ nke-esi.

²¹ Osolobuẹ hụ a pụha imẹ Shilo, a nọ ebẹhụ e gi oku ẹ e we enwẹn ẹ a ghọsị Samuẹlụ.