Samuẹlụ Nke Ẹbụọ 6 - Ika

Isi Nke Isin E Buhẹ Wẹ Ẹkpẹti-nsọ Osolobuẹ Jerusalẹm

¹ Defidi nọzị gha imẹ ndị Izrẹlụ ile wẹ marịn amarịn họrị madụ nnụ-uku iri-kwasị-ọgụn (30,000) pụ ichẹn.

² Ịya lẹ ndị hụ ile ya lẹ wẹ wị nọ gha Baala wụ Kiriatị-Jiarim hụn rị Juda buli kẹni wẹ buhẹ Ẹkpẹti Chuku, Ẹkpẹti hụ wẹ gi Ẹfan Ahụn marịn, Ẹfan Osolobuẹ ihiẹn ile rị okpuru ẹ, Onyẹ hụn ukpo ẹ rị ẹgbata chẹrobu ẹbụọ hụ wẹ kpụye elu Ẹkpẹti hụ.

³ Wẹ dọ Ẹkpẹti Osolobuẹ hụ ye elu trọkụ ọhụn, gha iwe Abinadabụ, hụn rị elu òke, buru ẹ. Ụmụ ikẹnnyẹ Abinadabụ ẹbụọ wụ Uza lẹ Ahio dukọ trọkụ ọhụn hụ efin dọkpụnkọ

⁴ lẹ Ẹkpẹti Chuku hụ rị elu ẹ; Ahio rị a ihun.

⁵ Defidi lẹ ndị Izrẹlụ ile hụ e gi ikẹn wẹ ile a ghọghọ ihun Osolobuẹ, a bụ ẹbụ, a kpọ ụbọ-mmaka lẹ ụbọ-layẹ, ẹgede-chakachaka, chakachaka mmaka lẹ kpajaị.

⁶ E ru wẹ ẹhụ ebe Nakọnụ a nọ a fụchanpụ ọka, Uza nọ tịnpụ ẹka, ghọdọn Ẹkpẹti-nsọ Osolobuẹ, makẹni okẹn-efin dọkpụnkọn'a kpọgburu akpọgburu.

⁷ Osolobuẹ wụ Chuku nọ gi ọnụma sọn Uza makẹni o yen'ẹ mgbaye — Chuku a kụtu ẹ, ọ nọ nwụntọ ụsụọ Ẹkpẹti-nsọ Chuku ebẹhụ.

⁸ Iwe nọ we Defidi makẹni Osolobuẹ gi ọnụma sọn Uza. Ihiẹn w'a kpọkwọ nwan ebẹhụ d'e ru tannị wụ Pẹrẹzi-Uza.

⁹ Egun Osolobuẹ nọ tụ Defidi ụhụọhịn ahụn, ọ nọ sị, “Nanị kẹ Ẹkpẹti-nsọ Osolobuẹ a dọnzi nwan bịa nke m?”

¹⁰ Ọ nọzilẹni chọ n'o buhẹ Ẹkpẹti Osolobuẹ ebe ya nwẹn rị imẹ obodo hụ ọ tụn, Obodo Defidi. Ọ nọ bugụ a che iwe Obẹdi-Ẹdọm onyẹ Gatị.

¹¹ Ẹkpẹti nkwa Osolobuẹ nọ nọdị iwe Obẹdi-Ẹdọm onyẹ Gatị ifọn ẹtọ, Osolobuẹ nọ gọzi Obẹdi-Ẹdọm lẹ ikpụlọ a ile.

¹² Wẹ nọ sị Defidi, “Osolobuẹ wụ Chuku a gọzigụọ ezi-lẹ-ụlọ Obẹdi-Ẹdọm lẹ ihiẹn ile o nwọn — makẹ ufiri Ẹkpẹti-nsọ Chuku.” Ya Defidi nọ jẹn nke Obẹdi-Ẹdọm, gi mmẹmmẹ lẹ ịghọghọ bulụa Ẹkpẹti-nsọ Chuku Obodo hụ Defidi tụn.

¹³ Ndị bu Ẹkpẹti-nsọ Osolobuẹ hanpụ amụkụ isin, Defidi e gi okẹn-efin ohu lẹ nwa-efin ohu wẹ zụntọ chụnyeni Osolobuẹ ẹjan.

¹⁴ Defidi yi ẹfọdụ, ẹwuru ndị nchụn-ẹjan wẹ gi linẹni kwa; ọ hụ e gi ikẹn ẹ ile e tẹnni Osolobuẹ egu,

¹⁵ ya lẹ ndị Izrẹlụ ile gi oro lẹ igbu-opi bula Ẹkpẹti-nsọ Osolobuẹ.

¹⁶ Kẹ Ẹkpẹti-nsọ Osolobuẹ banla imẹ Obodo Defidi, nwunyẹ Defidi wụ Mikalụ nwa Sọlụ hụ windo e lee ile. Ogẹn o gi hụn kẹ Defidi wụ Eze rị a tụshi elu e tẹnni Osolobuẹ egu, ọ nọ lelịa Defidi imẹ obi ẹ.

¹⁷ Wẹ nọ bubanhan Ẹkpẹti-nsọ Osolobuẹ, dọ a ye ọnọdị a imẹ ọdụ hụn Defidi mẹmẹn'ẹ; Defidi nọ nọ ihun Osolobuẹ chụn ẹjan w'a dụn ọkụn lẹ ẹjan-ekele wẹ gi e rigbama.

¹⁸ Ọ chụngụ ẹjan ahụn w'a dụn ọkụn lẹ nke ekele hụ w'e rigbama, ọ nọ gi ẹfan Osolobuẹ ihiẹn ile rị okpuru ẹ gọzi ndị Izrẹlụ.

¹⁹ Ya ọ nọ ye onyẹ-onyẹ rị igunrun Izrẹlụ ile hụ ogbe brẹdi ohu-ohu, kẹ ikẹnnyẹ kẹ ikpoho, o yezi wẹ ọkpụkpụ deti ohu-ohu wẹ pịngbama kikọ lẹ ọkpụkpụ vaịnị ohu-ohu wẹ pịngbama kikọ. Omẹgụ, wẹ ile nọ lashi iwe wẹ.

²⁰ Ogẹn Defidi nkẹ gi lụaha d'a gọzi ikpụlọ a, Mikalụ nwa Sọlụ nọ pụha d'e kunrun ẹ, sị, “Eze Izrẹlụ e mẹ ihiẹn a kpọnị tannị — gba enwẹn ẹ ọtọ nọkẹ obolo idẹnya igbọn-ikpoho ndị ọ rị a kị!”

²¹ Defidi nọ sị Mikalụ, “Osolobuẹ kẹ m tẹnn'ẹ, onyẹ hụn họrịnị m latọ nẹdi i lẹ ikpụlọ a ile, tumẹ m onyẹ-ọkịkị ndị nke ẹ wụ Izrẹlụ; m k'a gha a ghọghọ ihun Osolobuẹ.

²² M k'e budandẹ enwẹn m karị ọhụn: m k'e budandẹ enwẹn m ẹnya mmẹ lẹ enwẹn m. Kanị, o mẹ nke igbọn-ikpoho ndị hụ i ku oku wẹ, ọghọ kẹ wẹ k'e ye m.”

²³ Mikalụ nwa Sọlụ amụnị nwa o we nwụn.