Samuẹlụ Nke Ẹbụọ 24 - Ika

Isi Nke Ẹnọ Kwasị Ọgụn Iwe A Bịa Osolobuẹ Nị Defidi Gụn Ndị-agha

¹ O nwọn ogẹn Osolobuẹ gi weni ndị Izrẹlụ iwe, ọ nọ nu Defidi n'o mẹ wẹ ihiẹn; ọ sị “Jẹn d'a gụn ndị Izrẹlụ lẹ ndị Juda.”

² Ya eze nọ sị Jụabụ hụn e dun'ẹ ndị-agha, “Ghagbama nị ebọn ile rị Izrẹlụ — ghakwọrị alị Danị d'e ru Biẹshẹba; gụnchanrịn nị ndị ile rugụ ogo agha, nị m hụn ụzọ marịn ole wẹ rị.”

³ Kanị Jụabụ nọ sị eze, “Osolobuẹ wụ Chuku i ya mẹ ndị-agha Izrẹlụ bawayedẹ ụzọ ọgụn-isẹn — ya mẹ ẹ nị eze nwọnni m gi ẹnya a hụn a. Kanị, kị eze nwọnni m k'e mẹni nwan ihiẹn nọ ẹnịna?”

⁴ Kanị eze nọ sị Jụabụ lẹ ndị-ndu agha a d'a gụn ọgụngụn hụ. Wẹ nọ pụ, jẹnmẹ d'a gụn ndị ile ru ogo agha imẹ Izrẹlụ.

⁵ E fetugụ wẹ Iyi-Jọdanị, wẹ nọ tumẹ ọdụ ẹbamịn ndịdan-mirin obodo Arụa hụn ru imẹ Ọdanmgbugbu Iyi udu-mirin Anọnụ, a nọ wẹ ebẹhụ gụn ndị wẹ gụn. Wẹ nọ gha ebẹhụ shi Gadị d'a gụnzị ịhịan; wẹ nọ nwan pụha Jaza d'a gụnzịkwọ ndị rị azụụn hụ.

⁶ Ya wẹ nọ shi Gilẹdị lẹ ẹgbẹrẹ Tatim-Họdishi d'a gụnzị; a gha wẹ ebẹhụ shi Dan-Jani d'a gụnzị; wẹ nọ fetuchanrịn pụha alị Sidọnụ, gụn wẹ.

⁷ Wẹ nọ gha ebẹhụ shi obodo Taya wẹ tụnhunmẹ mgbọn lẹ obodo ndị rị Hivu lẹ ndị Kenaanị. O mẹgụ, wẹ nọ nwan shi Biẹshẹba rị atụ alị-ọkpọnkụn Juda.

⁸ Ogẹn wẹ gi ghagbamagụ alị Izrẹlụ ile, wẹ nọ lụakinhẹn Jerusalẹm. Ifọn itenẹi lẹ akpọhịn ọgụn kẹ wẹ gi gụn wẹ.

⁹ Jụabụ nọ gwa eze ole ndị ru ogo agha rị: imẹ Izrẹlụ ile wụlẹni Juda, wẹ rị madụ nnụ-uku nnụ-ẹbụọ (800,000) k'a s'ẹka gi ọpịa-agha lụ ọgụn; imẹ Juda, wẹ rị nnụ-uku ọgụn-isẹn-kwasị-nnụ (500,000).

¹⁰ Defidi a gụngụ ndị-agha, obi nọ gbumẹ ẹ mgbu ọda-ọda, ọ nọ sị Osolobuẹ, “Okẹn njọ kẹ m mẹ ihiẹnni. Dodo Osolobuẹ, m rị nwan a rịọ ị, gbagharị odibo i. E mẹgụọ m ẹregede ihiẹn-nzuzu.”

¹¹ Kẹ Defidi lihi ọtọ ụzụtụntụn, oku Osolobuẹ a bịagụọnị onyẹ-amụma wụ Gadị, hụn a gwa Defidi uche Osolobuẹ:

¹² “Jẹn d'a gwa Defidi, ‘Lee ihiẹn Osolobuẹ ku: Ihiẹn ẹtọ kẹ m rị e butọn'ị. Hanrịn ohu imẹ wẹ hụn m k'e mẹ i.’ ”

¹³ Ya Gadị nọ jẹn d'e kunrun Defidi, sị a, “Nị ụnwụn mụ alịnị ọrọgbọ ahụa ẹtọ? Ra n'i gi ifọn ẹtọ gbanị ndị-iṅẹnrẹn i ọsọ ebe wẹ n'a chụ ị? Ra nị eje-emu gbu ịhịan imẹ alịnị akp'ọhịn ẹtọ? Rokpọ a nwan n'ị hanrịn, nị m marịn ihiẹn m'a gwa onyẹ zini m.”

¹⁴ Defidi nọ sị Gadị, “Ezigbo nsọngbu kẹ m rị imẹ ẹ. Nị ẹnyi danban nwan ẹka Osolobuẹ, makẹni omikẹn ẹ e hikẹ ogbe; ka anịlẹ m danban ẹka ịhịan.”

¹⁵ Ya Osolobuẹ nọ zi eje-emu e gbuni ye imẹ Izrẹlụ gha ụtụntụn hụ d'e ru ogẹn o ku, madụ nnụ-uku iri-kwasị-ọgụn-ẹtọ (70,000) nọ nwụnhụn imẹ alị Izrẹlụ, ghakwọrị Danị d'e ru Biẹshẹba.

¹⁶ Ogẹn mmọn-ozi hụ rị e gbuni wẹ gi tịnpụ ẹka n'o tikpọ Jerusalẹm, ọnwụn hụ rị e gbuni e mẹtụ Osolobuẹ ọda-ọda; ọ nọ sị mmọn-ozi hụ gbugụ ndị bu ọda, “O higụọ! Seri ẹka ị.” Ogẹn ahụn, mmọn-ozi Osolobuẹ hụ rị ebe Araụna onyẹ Jebusu a nọdị a kụkpọ ọka.

¹⁷ Mgbe Defidi gi hụn mmọn-ozi hụ rị e gbuni wẹ, ọ nọ sị Osolobuẹ, “Lee nwan: Mmẹ mẹ njọ; mmẹ mẹfie. Atụnrụn wẹ rị e du kẹ ndịnị wụhụ. Onwọnni ihiẹn wẹ mẹ. Mẹshi mmẹ lẹ ikpụlọ nẹdi m ikẹn.”

Defidi A Rụn Ukpo Nchụn-Ẹjan

¹⁸ Ụhụọhịn ahụn, Gadị nọ jẹn d'e kunrun Defidi, sị a, “Shi elu òke hụ d'a tụnnị Osolobuẹ ukpo nchụn-ẹjan ye ebẹhụ Araụna onyẹ Jebusu a nọ a kụkpọ ọka.”

¹⁹ Ya Defidi nọ shi elu òke hụ nọkẹ kẹ Osolobuẹ dọn zi Gadị zi ẹ.

²⁰ Ogẹn Araụna gi lee ẹnya, legha eze lẹ ndị ya lẹ wẹ wị kẹ wẹ lala ebe ọ rị, ọ nọ pụha d'e gbuni eze osekpu.

²¹ Araụna nọ sị, “Kị eze nwọnni m bịanị d'e kunrun mmẹ wụ odibo ẹ?” Defidi nọ sị a, “M bịa d'e ṅọnrin ebe ị nọ a kụkpọ ọka, nị m hụn ụzọ tụnnị Osolobuẹ ukpo nchụn-ẹjan, kẹni eje-emuni rị e gbuni kụsị.”

²² Araụna nọ sị Defidi, “Eze nwọnni m ya weri ihiẹn ọwụlẹ sụọn'a ebeni gi chụn ẹjan hụ. Lee okẹn-efin m, ya gi ẹ chụn ẹjan w'a dụn ọkụn; lee ibe osisi ndịnị m gi a kụkpọ ọka lẹ osisi ndịnị rị ebeni wẹ gi e kẹngbama efin rị a rụn ọrụn ebeni — wẹ gi wẹ fiye ọkụn.

²³ Eze, dodo, Araụna rị e yechanrịn eze ihiẹn ndịnị ile.” Araụna nọzị sị a, “Osolobuẹ wụ Chuku i ya nabanhan oyiye i-oo.”

²⁴ Kanị Defidi nọ sị Araụna, “Mba. M chọ nị m ṅọn ẹ. A chụnyẹkọnị m Osolobuẹ wụ Chuku m ẹjan w'a dụn ọkụn nwọnlẹni ihiẹn o ri m.” Ya Defidi nọ ṅọnrin ebẹhụ wẹ nọ a kụkpọ ọka lẹ okẹn-efin ndị ahụn — akpụrụ siliva iri kwasị ọgụnnaị.

²⁵ Defidi nọ tụnnị Osolobuẹ ukpo nchụn-ẹjan ebẹhụ, nọ ebẹhụ chụn ẹjan w'a dụn ọkụn lẹ ẹjan-ekele w'e rigbama. Ya kẹ Osolobuẹ nọ za ekpere, mẹ ihiẹn wẹ rịọnị alị Izrẹlụ, eje-emu hụ e gbuni rị e gbu ndị Izrẹlụ nọ kụsị.