Samuẹlụ Nke Ẹbụọ 20 - Ika

Isi Nke Ọgụn Shẹba A Jụ Ọkịkị Defidi

¹ Onyẹ ohu e mẹ oku rị ebẹhụ kẹ wẹ rị e kpe imẹ Gil'galụ; ẹfan a wụ Shẹba nwa Bikri, onyẹ ebọn Bẹnjamini rọ. Ọ nọ gbu opi, yi, “Onwẹni hụn runi ẹnyi ebe Defidi rị; onwẹni hụn wụ nke ẹnyi ebe nwa Jese rị! Onyẹ ọwụlẹ lashikwọ iwe ẹ-oo ụnụ ndị Izrẹlụ wụlẹni Juda!”

² Ya kẹ ndị Izrẹlụ ile wụlẹni ndị Juda nọ la Defidi tọ, sọnrin Shẹba nwa Bikri. Kanị ndị Juda nọ nọyekwọnị eze wẹ, ghakwọrị Iyi-Jọdanị d'e ru Jerusalẹm.

³ Mgbe Defidi gi lụaha Jerusalẹm, ọ nọ bu ndị mgba a iri hụ ọ latọ nị wẹ lepụ obi-eze ẹnya che ụzọ ohu, ndị hụ Absalọm mẹ mgba wẹ. Defidi nọ butọnị wẹ ndị k'a rị e che wẹ nche. Ọ hụ e ye wẹ ihiẹn wẹ gi e bi, kanị o duzini wẹ ranhịn. Wẹ nọ bu wẹ tọ okpuru ndị nche ebẹhụ, wẹ hụ e bi kẹ ndị di wẹ nwụn — e we wẹ nwụn.

⁴ Eze nọ sị Amasa onyẹ-ndu agha ọhụn a, “Kpọ ndị Juda nị wẹ bịa d'e kunrun m akpọhịn ẹtọ gini d'a ghafe; ịyụ lẹ enwẹn i k'a rịzịkwọ a.”

⁵ Kanị ogẹn Amasa gi jẹn d'a kpọ ndị Juda, ọ nọ nọkarị ogẹn eze ye ẹ.

⁶ Defidi nọ sị Abishaị, “Shẹba nwa Bikri k'e mẹ ẹnyi tan ihiẹn karị hụn Absalọm mẹ. Kịrị nwan ndị-agha di-nwọnni i, n'ị chụ a ozigbo, amamgbe ọ kẹrẹn'a banye obodo wẹ tụnhunmẹ mgbọn, o weri ọnọdị ebẹhụ, gbanahịn ẹnyi.”

⁷ Ya Abishaị nọ kịrị ndị-agha Jụabụ lẹ ndị Kẹrẹtị lẹ Pẹlẹtị, ndị nche pụ-ichẹn Defidi lẹ ndị odogun-agha wẹ marịn amarịn. Wẹ nọ gha Jerusalẹm buli d'a chụ Shẹba nwa Bikri.

⁸ E ru wẹ ẹhụ ọmụma-uku rị Gibiọnụ, Amasa nọ bịa d'e kunrun wẹ. Jụabụ yi ẹwuru-agha a, agbada a hụ ọbụọ a rị akpụkpọ-ukun ẹ. Hụn Jụabụ gi hụ jẹnpụha ihun, tu udọn mịrịn agbada a.

⁹ Jụabụ a sị Amasa, “Nanị ị rị nwẹnẹ m?” Jụabụ nọ gi ẹka-nni kwọndọn Amasa ẹtu n'o susu ẹ ọnụ kẹ w'e mẹ.

¹⁰ Ẹnya Amasa arị agbada hụ Jụabụ gi ẹka, ọ marịn mgbe Jụabụ gi zu ẹ y'ẹ ẹfọ, akụ-ẹfọ a nọ yọye alị; o zuzin'ẹ ọzọ. Ẹrịra kẹ Amasa dọn nwụnhụn. Jụabụ lẹ Abishaị nwẹnẹ ẹ nọ chụrụ Shẹba nwa Bikri.

¹¹ Onyẹ ohu imẹ ndị-agha Jụabụ nọ wuzo ebe Amasa rị alị, sị, “Onyẹ ọwụlẹ rị azụụn nke Jụabụ lẹ onyẹ ọwụlẹ rị azụụn nke Defidi ya sọnrin Jụabụ!”

¹² Kẹ Amasa rị imẹ ẹdeke ẹ, a rụtụ etintinnaị ụzọ ebẹhụ, okẹnnyẹ hụ ku ihiẹn hụ a hụn a nị onyẹ ru ebahụn, ọ kụsị, ọ nọ gha ụzọ ebahụn dọkpụn ozun Amasa ye ọfịa, yọ ẹwuru kpu ẹ — makẹ ndị-agha hụ rị a kụsịnị.

¹³ Ogẹn o gi dọrị Amasa ụzọ ebẹhụ dọkpụnpụ a, ịhịan ile nọ sọn Jụabụ chụrụ Shẹba nwa Bikri.

¹⁴ Shẹba e te ghagbamachanrịngụọ ebọn ile rị Izrẹlụ wụlẹni Juda d'e ru Ebẹlụ rị Bẹt-Maaka lẹ azụụn nke ndị Bẹri, ndị sọnmẹn'ẹ nọ sọnmẹ ẹ.

¹⁵ Ndị-agha ile wẹ lẹ Jụabụ wị nọ bịa d'e kehunmẹ Shẹba ye Ebẹlụ-Bẹt-Maaka. Wẹ nọ rụn mkpọnyin ye mgbọn ibuzọ rị obodo hụ — mkpọnyin w'a nọ a lụsọn obodo nwọn mgbọn agha. Ogẹn wẹ gi rị e gi ihiẹn e ti mgbọn hụ nị wẹ titu ẹ,

¹⁶ ya kẹ okpoho ohu nwọn uche ọda nọ gha imẹ obodo hụ hị wẹ, sị, “Gọn ni ntịn-o! Gọn ni ntịn-o! Sị nị Jụabụ nọzụnhan nị m gwa a oku.”

¹⁷ Jụabụ nọ nọzụnhan; ọ nọ sị Jụabụ, “Yụ wụ Jụabụ?” Ọ nọ sị a, “Mmẹ rọ.” Ọ nọ sị Jụabụ, “Gọn ntịn ihiẹn odibo i jẹnkọ d'e ku.” Jụabụ nọ sị a, “M hụ e gọn ntịn.”

¹⁸ Okpoho ahụn nọ sị, “Mbụ-mbụ, wẹ sịhụ, ‘Nị ẹnyi jẹn nwan Ebẹlụ d'a jụ ajụjụ’ oku e bi.

¹⁹ Ẹnyi wụ ndị-udọn lẹ ndị wẹ gi e dọn ẹnya imẹ Izrẹlụ. Obodo hụn nọkẹ nnẹ imẹ Izrẹlụ kẹ ị rị nwan a chọ n'i tikpọ. K'ị rị a chọnị n'ị tikpọ ihiẹn wụ nke Osolobuẹ?”

²⁰ Jụabụ nọ sị, “Ẹlẹ mmẹ! Ẹlẹ itikpọ mọbụ iwiwi ihiẹn kẹ m chọkọ!

²¹ Ẹlẹ ẹrịra. O nwọn okẹnnyẹ ohu w'a kpọ Shẹba nwa Bikri, onyẹ alị ugu Ifrem hụn bunụmanị ọkịkị eze wụ Defidi. Wepụha nị hụ akpụ okẹnnyẹ ohuni, a gha m obodoni pụ.” Okpoho hụ nọ sị Jụabụ, “Wẹ k'a gha elu mgbọn tụtun'i isi ẹ.”

²² Okpoho ahụn nọ jẹnburu ndị obodo hụ ile, dụn wẹ ọdụn hụn jẹnkọ d'e yeni wẹ ẹka, wẹ nọ beri Shẹba nwa Bikri isi, tụyeni Jụabụ. Jụabụ nọ gbu opi-agha, wẹ nọ gha obodo hụ pụ, onyẹ-onyẹ nọ la iwe ẹ. Jụabụ nọ lakin Jerusalẹm d'e kunrun eze.

Ndị-isi Ndị-Ọrụn Defidi

²³ Jụabụ wụ hụn a kị ndị-agha Izrẹlụ ile; Bẹnaya nwa Jehoyada wụ hụn a kị ndị Defidi gi e che ẹhụ, ndị Kẹrẹtị lẹ ndị Pẹlẹtị;

²⁴ Adoram (hụn wụzị Adoniram) wụ hụn a kị ndị ile wẹ gi a rụn ọrụn eze; Jehoshẹfatị nwa Ahiludu nwọn e dọnmẹ ẹkụkwọ;

²⁵ Shẹva wụ akanwe; Zadọkụ lẹ Abiata wụ ndị nchụn-ẹjan;

²⁶ Ira onyẹ Jaịrị wụ onyẹ nchụn-ẹjan a chọpụhanị Defidi uche Osolobuẹ.