Samuẹlụ Nke Ẹbụọ 1 - Ika

Isi Nke Ohu Defidi A Nụ Nị Sọlụ A Nwụnhụn

¹ Sọlụ a nwụnhụngụ, ogẹn Defidi nkẹ gi gha ebe ọ nọ mẹri ndị Amalẹki lụaha, ọ nọ nọdị Zik'lagị. Ọ nọpụ akpọhịn ẹbụọ,

² hụn mẹ ẹ akpọhịn ẹtọ, okẹnnyẹ ohu nọ gha azụụn nke Sọlụ bịa: ọ dọwagụọ ẹwuru ẹ, kpọn ntụn ye isi nke onyẹ ihiẹn mẹ. Ogẹn o gi ru ebe Defidi rị, ọ nọ dann'a alị.

³ Defidi nọ sị a, “Ebe ị gha bịa?” Ọ nọ sị, “M wụ onyẹ agha Izrẹlụ, m gha ọnụ agha gbapụha.”

⁴ Defidi nọ sị a, “Kị mẹ? Gwa m nwan.” Ọ nọ sị Defidi, “Ndị nke ẹnyi gha ọnụ-agha gbapụ; ndị bu ọda nwụntọ imẹ agha ahụn; Sọlụ lẹ Jonatanị nwa a a nwụnhụngụọ.”

⁵ Defidi nọ sị a, “Nanị k'i dọn marịn nị Sọlụ lẹ Jonatanị nwụnhụn anwụnhụn?”

⁶ Okorọbịa hụ nọ sị a, “M rịhụ elu Ugu-Gil'bụa, m nọ hụn Sọlụ k'ọ danbemẹ obo ẹ — ndị-agha Filistia hụn gi ụgbọ-anyịnyan zụnla e d'e kunrun ẹ;

⁷ ogẹn o gi gbehutọ, hụn m, ọ nọ kpọcheni m. M nọ sị a, ‘Elee m! K'ị sị m mẹ?’

⁸ “Ọ sị m, ‘Onyẹ k'ị wụ?’ “M nọ sị a, ‘M wụ onyẹ Amalẹki.’

⁹ “Ya ọ nọ sị, ‘Dodo, nọzụnhan n'i gbupụ m! M rị a lụ ọnwụn ebeni, ọ sụọn'a nị m hụ ndụn.’

¹⁰ “Ya m nọ nọkunmẹ ẹ, gbu ẹ, makẹni a marịngụọ m n'ọ dịnhịnkọ. M nọ weri okpu-eze rị a isi lẹ ihiẹn-ẹka o yi; uwẹ kẹ m wẹhẹni i, di-nwọnni m.”

¹¹ Ya kẹ Defidi lẹ ikẹnnyẹ ile ịya lẹ wẹ wị nọ dọwa ẹwuru wẹ.

¹² Wẹ nọ sụkụrụ, a kwan ẹkwan, e bu ọnụ d'e ru ogẹn ẹnyasị, gi ẹ kwan Sọlụ lẹ Jonatanị nwa a lẹ ndị-agha Osolobuẹ lẹ ndị Izrẹlụ, makẹni ọpịa-agha e rigụọ wẹ.

¹³ Defidi nọ sị okorọbịa ahụn bịa d'a gwa a ihiẹn mẹni, “Ebe i gha bịa?” Ọ nọ sị, “M wụ nwa onyẹ Amalẹki bi alị Izrẹlụ.”

¹⁴ Defidi nọ sị a, “Kị haịn egun gi n'ị tịnpụ ẹka gbu onyẹ Osolobuẹ tumẹ?!”

¹⁵ Ya Defidi nọ kpọ onyẹ itu ẹ ohu, sị, “Nọzụnhan; gbu ẹ!” Ya ọ nọ gbu onyẹ Amalẹki hụ.

¹⁶ Defidi a sịgụọ onyẹ Amalẹki hụ, “Ẹdeke i rị ị isi. Ọnụ ị a shịagbugụọ ị ẹri ebe i nọ sị, ‘Mmẹ gbu onyẹ Osolobuẹ tumẹ.’ ”

Ẹbụ Defidi Gi Kwan Sọlụ Lẹ Jonatanị

¹⁷ Defidi nọ gi ẹbụ kwan Sọlụ lẹ Jonatanị nwa Sọlụ,

¹⁸ sị wẹ kuzi ndị Juda ya. (Ọ rị nwan imẹ Ẹhụhụọ Jasha.) Ọnwan wụ ẹbụ hụ:

¹⁹ “Euu Izrẹlụ, ọghọ ị rị nwan alị ebe wẹ nọ gbu ẹ elu-ugu! Euu, ndị dikẹn a dan!

²⁰ Ekukwọlẹ n'a imẹ Gatị! Amakwọlẹ nị ọkwa a ọgbara-ogbe Ash'kẹlọnụ! Amamgbe ẹfọ a sụọma ndị Filistia ụsụọ; amamgbe ndị wụlẹni ndị nke Osolobuẹ a ghọghọma!!

²¹ “Euu Ugu Gil'bụa, kẹ igirigi kẹ mirin-ozuzue eruzilẹ i; ugbo i y'e mẹzilẹ ihiẹn-ugbo hụn w'e gi ye oyiye. Makẹni elu i ebẹhụ kẹ wẹ nọ mẹrụ akpaịn ndị dikẹn, akpaịn Sọlụ; w'a ra fichanzị akpaịn Sọlụ, w'a ra tezi ẹ udẹn.

²² Kẹ ebe igbu ndị-agha rị kẹ ebe igbudẹ ndị dikẹn rị, ụta Jonatanị alanị azụụn; ọpịa-agha Sọlụ erini wẹ rihọdụ.

²³ Sọlụ lẹ Jonatanị arịka mma, ihiẹn wẹ a sụọka m! Kẹ ọnwụn kẹ ndụn ekebeni wẹ. Wẹ benahịn ugọn nkanran; wẹ zenahịn ẹwọrọ.

²⁴ Euu ikpoho Izrẹlụ, kwan nị nị Sọlụ ẹkwan — onyẹ hụn yimẹ ụnụ ẹkwa ṅanrannị lẹ ihiẹn-mma, hụn gi ihiẹn-goru chọ ẹwuru ụnụ mma.

²⁵ Euu, ndị dikẹn a dan imẹ agha! Jonatanị e fiẹnrin elu i, ugu Gil'bụa.

²⁶ Y'a fụka m-o, Jonatanị nwẹnẹ m! Ihiẹn i a sụọka m. Ihiẹn-ọsụsụọ i nwọnni m ehikẹ, ọ kadẹ nke ikpoho.

²⁷ Euu, ndị dikẹn a dan!! Ihiẹn-ọgụn a la iwi!”