Rutu 1 - Ika

Isi Nke Ohu Kẹ Ẹlimẹlẹki Lẹ Ikpụlọ Dọn Kwashi Mụabụ

¹ Ogẹn hụ ndị ọhan-eṅẹn wụlẹni ndị-nze gi rị a kị, o nwọn ogẹn ụnwụn gi rị alị Izrẹlụ. Ya kẹ okẹnnyẹ ohu, onyẹ obodo Bẹt'lẹhẹm alị Juda nọ kwashi alị Mụabụ d'e biri, ịya lẹ nwunyẹ ẹ lẹ ụmụ a ikẹnnyẹ ẹbụọ.

² Ẹfan okẹnnyẹ hụ wụ Ẹlimẹlẹki; ẹfan nwunyẹ ẹ wụ Nahomi; ẹfan ụmụ a ikẹnnyẹ ẹbụọ hụ wụ Malọnụ lẹ Kiliọnụ. Wẹ wụ ndị ebọn Ẹfratị imẹ Bẹt'lẹhẹm alị Juda; wẹ nọ shi alị Mụabụ d'e biri.

³ Ọ nọbe, Ẹlimẹlẹki di Nahomi nọ nwụnhụn, ọ nọ họdụ Nahomi lẹ ụmụ a ẹbụọ hụ.

⁴ Ọ nọbe, ụmụ a ẹbụbụọ hụ nọ lụrụ ikpoho Mụabụ: ẹfan ohu wụ Ọpa, ẹfan hụn ẹbọ wụ Rutu. E bipụ wẹ alị Mụabụ ihiẹn nọkẹ ọrọgbọ ahụa iri,

⁵ Malọnụ lẹ Kiliọnụ nọzị nwụnhụn, ọ họdụ Nahomi sụọ, di arịa, ụmụ arịa.

Nahomi Lẹ Inyẹnmẹ Ụmụ A

⁶ Ọ nọbe, Nahomi nọ kwademẹ, ya lẹ inyẹnmẹ ụmụ a nọ buli n'ọ gha alị Mụabụ lakin alị a, makẹni ọ nụgụọ kẹ wẹ ku ẹ imẹ ugbo alị Mụabụ nị Osolobuẹ e mẹgụọ ọhụnma ye ndị nke Osolobuẹ wụ Izrẹlụ ihiẹn w'e ri.

⁷ Ya kẹ ọ nọ gha ebẹhụ o bi buli, ịya lẹ inyẹnmẹ ụmụ a ẹbụọ, lakinkọ alị Juda; kanị e jẹnbe wẹ,

⁸ Nahomi nọ sị inyẹnmẹ ụmụ a ẹbụọ hụ, “Kin ni azụụn; onyẹ-onyẹ ya lama iwe nnẹ ẹ. Osolobuẹ ya mẹni ụnụ ọhụnma kẹ ụnụ dọn mẹni ndịnị nwụnhụngụnị lẹ mmẹ nwẹn.

⁹ Osolobuẹ ya yezi onyẹ-onyẹ imẹ ụnụ di, mẹ n'ọ rịnị ụnụ mma iwe di.” Ya kẹ Nahomi nọ dide wẹ, wẹ nọ kwan ezigbo ẹkwan hụn ịhịan a nụ.

¹⁰ Wẹ nọ sị a, “Mba, ẹnyi k'e sọn i laburu ndị nke i.”

Rutu A Jụ N'ọ Latọkọ Nahomi

¹¹ Kanị, Nahomi nọ sị wẹ, “Kin ni azụụn ụmụ m. Kị ụnụ k'e sọnmẹni m? Nị m sazị ẹka mụ ikẹnnyẹ hụn k'a lụrụ ụnụ?

¹² Mba ụmụ m! Kin ni azụụn n'e mẹkẹ m ẹgẹdi ịlụzị di. O te sụọn'a nị m rị a tụ ẹnya ịlụ di, ọsụọn'a nị m lụ di uhinhinni, mụ ikẹnnyẹ,

¹³ nị ụnụ cheri mgbe wẹ kara? Nị ụnụ sị nwan nị ụnụ alụkọzị di ọzọ? A la nị-ị-ị ụmụ m! Nke ụnụ hụghọ mma, ọ nọnị kẹ nke m — nị Osolobuẹ e mẹgụọ m ihiẹn.”

¹⁴ Ya wẹ ile nọzị kwanma ẹkwan. Ọpa nọ dide nnẹ-di ẹ, lama; kanị Rutu ekweni hapụ a.

¹⁵ Ya kẹ Nahomi nọ sị, “Rutu, lee ẹnya, nwunyẹ-di i a laburugụọ ndị nke ẹ lẹ mmọn ndị w'e fe. Sọn ẹ nwan kin azụụn.”

¹⁶ Kanị, Rutu nọ sị a, “A gwazịlẹ m hapụ ị mọbụ sọnbehi i! Ebe ọwụlẹ i jẹn kẹ m k'e jẹn; ebe ọwụlẹ i bi kẹ m k'e bi; ndị nke i k'a wụrụ ndị nke m, Chuku i a wụrụ Chuku m.

¹⁷ Ebe i nwụntọ kẹ m k'a nwụntọ; ebe wẹ litọ ị kẹ wẹ k'e litọ m. Osolobuẹ ya mẹ m eje-ihiẹn, mẹshi m'ẹ ikẹn omẹni e gi m ufiri ihiẹn ọwụlẹ la ị tọ — ọ sụọdẹn'a ufiri ọnwụn!”

¹⁸ Ogẹn Nahomi gi hụn nị Rutu e kuọl'a nị isi-wụ-isi n'o k'e sọn ẹ, ọ nọ gwabehi ẹ.

¹⁹ Ya wẹ ẹbụbụọ nọ wịrị jẹnsọnmẹ d'e ru obodo Bẹt'lẹhẹm. Ogẹn wẹ gi ru Bẹt'lẹhẹm, ọlụlụa wẹ nọ kpọgbarị obodo hụ ile, tụ ndị ile rịn'a ẹnya. Ikpoho Bẹt'lẹhẹm hụ a jụ “Ọnwan wụzị Nahomi?!”

²⁰ Kanị Nahomi e sị, “Akpọzilẹni m Nahomi; kpọmanị m ‘Elumilu’ makẹni Onyẹ nwọn ikẹn ile e mẹgụọ m ihiẹn, mẹ m'ẹ hụn elu m gi nwan rị e lu m ilu.”

²¹ Ẹka m jun e jun kẹ m gha ebeni pụkọ, kanị Osolobuẹ e mẹgụọ m gba ẹka lụaha. Kị ụnụ rịzị nwan a kpọnị m Nahomi bụ Osolobuẹ a shịagbugụọ m ẹri, Onyẹ ahụn nwọn ikẹn ile e yegụọ m ụya ri?

²² Ẹrịra kẹ Nahomi dọn lụaha; ya lẹ Rutu onyẹ alị Mụabụ hụ wụ nwunyẹ-nwa a wị lụaha. Ogẹn wẹ gi a ghọ ọka-bali kẹ wẹ gi lụaha Bẹt'lẹhẹm.