Rẹvẹleshọnụ 20 - Ika

Isi Nke Ọgụn Ahụa Nnụ-uku Hụ

¹ Ya m nọ hụn mmọn-ozi ohu k'ọ gha elu-igwee hidanla, o gi ịsanhan okẹn-mgbugbu ahụn lẹ ẹgan hi-ogbe.

² Ọ nọ nwụndọn dragọnụ hụ, agwọ mbụ-mbụ hụ wụ Ekwensụ, hụn wụzịkwọ Setanị, kẹn ẹ ẹgbụn jẹnkọ d'a nọru ahụa nnụ-uku;

³ ọ nọ tụ a ye imẹ mgbugbu hụ migbu enwẹn ẹ, kpọkin mgbugbu hụ, fidọn ẹ, amamgbe o dufiezi alị ichẹn-ichẹn. Wẹ k'e dọnmẹ ẹ ebẹhụ d'e ru ni ahụa nnụ-uku hụ e zu. Ọhụn mẹgụ, wẹ k'a hatuzịrịrị a ẹkẹrẹ ogẹn.

⁴ Ya m nọ hụn ukpo-eze ndị rị ebẹhụ. Wẹ nọ tumẹ ndị rịsọnmẹ ukpo ndị hụ ndị ọkịkị. M nọ hụnzịkwọ umẹ-ndụn ndị wẹ gi ufiri ozi Jizọsị lẹ oku Osolobuẹ bepụ isi. Ndịnị jụ nị efekọ wẹ eje-anụ hụ lẹ enwẹn ẹ mọbụ hụn wẹ leri ẹ kpụ, jụzị nị anarịnkọ wẹ ahịma eje-anụ hụ ezimezi ihun wẹ mọbụ ẹka wẹ. Wẹ nọ nwan gha ọnwụn lihi, rịzị ndụn, sọn Kraịstị kị ahụa nnụ-uku hụ.

⁵ Ọhụn wụ ịgha ọnwụn lihi nke ibuzọ. (Ndị ọzọ nwụnhụnnị aghanị ọnwụn lihi d'e ru nị ahụa nnụ-uku ahụn e zu.)

⁶ Ndị k'a gha ọnwụn lihi olihi ibuzọnị e nwọnkẹ ngọzi; wẹ rị nsọ. Ọnwụn nke mgbe ẹbụọ erukọ wẹ ẹhụ, kama, wẹ k'a wụ ndị nchụn-ẹjan Osolobuẹ lẹ Kraịstị, wẹ k'e sọn Kraịstị kị ahụa nnụ-uku.

Nke Ekwensụ A Gụ!

⁷ Ahụa nnụ-uku hụ zugụ, a tọpụ wẹ Ekwensụ, wepụha a ngan ọ rị.

⁸ Ọ k'a pụ nwan d'e dufie alị ile, ẹbamịn ẹnọ ụwa. Gọgụ lẹ Magọgụ kẹ w'a kpọ wẹ. Ọ k'e wegbama wẹ d'a lụ agha, wẹ ile bu ọda kẹ ẹjan rị mkpẹnrẹn ohimin.

⁹ Wẹ nọ ghakwọrị ebe wẹ rị fetu alị ichẹn-ichẹn rị elu-ụwa bịa d'e fihunmẹ ebẹhụ ndị nke Osolobuẹ rị lẹ obodo ahụn a sụọ Osolobuẹ; kanị, ọkụn nọ gha elu-igwee hidan, bu wẹ ile ri.

¹⁰ Wẹ nọ tụ Ekwensụ hụn dufieni wẹ ye imẹ odiyiri ọkụn lẹ nsịn-ẹnyanwụn, ebẹhụ eje-anụ hụ lẹ onyẹ amụma-ntụ hụ rị. Wẹ k'e ye wẹ afụnfụn uhinhin lẹ efinnaị jẹnrin ejẹn.

Okinkin-ikpe Ikpanzụụn

¹¹ Ya m nọ hụn ukpo-eze ọchan hi-ogbe lẹ onyẹ nọdị alị elu ẹ. Ụwa lẹ elu-igwere nọ gbaman'a ọsọ, onwọnzini ebe wẹ k'a nọdị.

¹² M nọ hụn ndị nwụnhụnnị kẹ wẹ turu nwan ihun ukpo-eze hụ, kẹ onyẹ-uku kẹ onyẹ-nta. E kpupụsọnmẹ wẹ ẹhụhụọ bu ọda; ya wẹ nọzị kpupụ ẹhụhụọ ọzọ, hụn wụ ẹkụkwọ ndụn-itẹbitẹ. Wẹ nọ gi ihiẹn wẹ detọsọnmẹ imẹ ẹhụhụọ ndị hụ kin onyẹ-onyẹ ikpe ihiẹn o mẹ.

¹³ Ohimin nọ wepụha ndị nwụnhụnnị rị imẹ ẹ, Ọnwụn lẹ Alị-mmọn nọ wepụhazị ndị nwụnhụnnị rị imẹ wẹ. Wẹ nọ gi ihiẹn onyẹ-onyẹ mẹ kin ẹ ikpe.

¹⁴ Ya wẹ nọ tụ Ọnwụn lẹ Alị-mmọn ye imẹ odiyiri ọkụn hụ. Odiyiri ọkụnnị wụ ọnwụn nke mgbe ẹbụọ.

¹⁵ Onyẹ ọwụlẹ wẹ hụnlẹni ẹfan a imẹ ẹkụkwọ ndụn-itẹbitẹ, a tụ w'a ye imẹ odiyiri ọkụn hụ.