Pita Ibuzọ 5 - Ika

Isi Nke Isẹn Ndị-isi Ụka Lẹ Ndị Wẹ Buche Wẹ Ẹka

¹ M rị nwan a rịọ ndị-isi rị imẹ ụnụ, nọkẹ onyẹ-isi ibe ụnụ lẹ onyẹ gi ẹnya a hụn afụnfụn Kraịstị ta lẹ onyẹ rị ndị k'e nwọnhẹn ọghọ ahụn lalanị: dodo ni,

² e lepụ nị atụnrụn Osolobuẹ wẹ buche ụnụ ẹka ẹnya; e du ni wẹ, ẹlẹ nke ndị wẹ wa a ye olu, kanị nke ndị gi obi wẹ a rụn — hụn wụ ihiẹn Osolobuẹ chọ; egilẹ ni ẹkpịrị egho mẹ ẹ, kama ya wụrụ ihiẹn a dụ ụnụ omumẹ.

³ Akịgbulẹ ni ndị rị ụnụ ẹka, ka a wụ nị ndị w'e leri,

⁴ kẹni, Onyẹ-isi ndị-ndu atụnrụn bịa, o gi okpu-eze ọghọ ahụn ghalẹni a fapụ tu ụnụ ugọn.

⁵ Ẹrịrazịkwọ, ụnụ ndị rị ibe alị, e humẹni ni ndị-isi ụnụ isi. Ụnụ ile, e welụanị enwẹn ụnụ alị ebe ibe ụnụ rị. Makẹni, Ẹkụkwọ-nsọ sị, “Osolobuẹ a nọkin onyẹ mpache ụzọ, kanị, o yeni onyẹ e welụa enwẹn ẹ alị ẹka.”

⁶ E welụanị nwan enwẹn ụnụ alị ebe Osolobuẹ nọ e gi ẹka zeni e sọn ụnụ, kẹn'o bushi ụnụ elu ogẹn ru —

⁷ lachanrịn nị mkpa ụnụ tọn'a, makẹni ụnụ rị a mkpa.

⁸ E dọnrin ni ẹnya; e che ni nche. Makẹni eṅẹnrẹn ụnụ wụ Ekwensụ rị a ghahunmẹ nọkẹ ẹwọrọ rị e dẹnni, a chọ onyẹ o k'a nwụn ri.

⁹ Chekẹnmẹ n'ẹ nwan ọgụn, e turu ọhụnma imẹ okukwe ụnụ, ebe ụnụ marịn nị ndị Itu-Kraịstị ibe ụnụ ile rị elu-ụwa rị a tazị ụdị afụnfụn ahụn.

¹⁰ Kanị, ụnụ tagụ afụnfụn ẹkẹrẹ ogẹn, Osolobuẹ onyẹ okẹn ẹfọma, hụn kpọ ụnụ d'e du ẹ nwọnrin ọghọ-itẹbitẹ ẹ hụn rị imẹ Kraịstị Jizọsị, k'e dọnzichanrịn nị ụnụ ihiẹn wiwini, mẹ ụnụ turu, mẹ ụnụ ze, mẹ ukun ruchanrịn ụnụ alị.

¹¹ Ikẹn ile wụ nke ẹ jẹnrin ejẹn! Isẹẹ.

Ekele Ikpanzụụn

¹² Sivanọsụ yeni m ẹka de ẹkụkwọ-ozini mẹ ẹkẹrẹ; nwẹnẹ ẹnyi hụn m weri n'o furu wẹ gi e dọn ẹnya k'ọ wụ. M de ẹkụkwọ-ozini kẹni m gi ẹ gba ụnụ umẹ, gizi ẹ ku nị ụzọ-Kraịstị wụ ezigbo ẹfọma ahụn Osolobuẹ mẹni ịhịan; turukẹnmẹ ni nwan imẹ ẹ.

¹³ Ụka rị Babilọnụ, hụn wụzị ndị nke Osolobuẹ, e zighọ ekele ụnụ. Makị nwa m e kelezịghọ ụnụ.

¹⁴ Dide ni ibe ụnụ odide ihiẹn-ọsụsụọ. Udọn ya rịnị ụnụ ile rị imẹ Kraịstị.