Pita Ibuzọ 1 - Ika

Isi Nke Ohu

¹ Mmẹ wụ Pita hụn wụ onyẹ-ozi pụ-ichẹn Jesu Kristi de ẹkụkwọ-ozini. M rị e dejẹnni ndị Chuku họrị rị alị ichẹn-ichẹn rịsọnmẹ Ẹgbẹrẹ Pọntusu, Galeshịa, Kapadoshịa, Eshịa lẹ Bitinia,

² ndị Chuku Nẹdi họtọ, gi Mmọn-nsọ dọn wẹ nsọ, kẹni wẹ hụn ụzọ humẹni Jizọsị Kraịstị isi, wụrụ ndị wẹ gi ẹdeke ẹ fepụ ẹhụ njọ. Ẹfọma lẹ udọn ya rịnị ụnụ mmagi-mmagi.

Olilẹnya Ahụn Rị Ndụn

³ Ọjịja-mma ya rịnị Osolobuẹ hụn wụ Chuku lẹ Nẹdi Onyẹ-nwọnni-ẹnyi wụ Jizọs Kraịstị! O gigụọ okẹn omikẹn ẹ mụdọnzi ẹnyi, mụ ẹnyi ye imẹ olilẹnya ọhụn rị ndụn ghahanị ịgha ọnwụn weli Jizọsị.

⁴ Ọ mụrụngụọ ụnụ d'e nwọnrin ukuu ghalẹni e rehi mọbụ e wiwi mọbụ a fapụ, ukuu o butọnị ụnụ elu-igwee.

⁵ O gi nwan ikẹn o gi wụrụ Osolobuẹ e dọnmẹ ụnụ, ghahanị okukwe ụnụ, kẹni nzụọpụha o wela ọgụgụ-ogẹn hụn ụzọ ru ụnụ ẹka.

Osolobuẹ Gi Afụnfụn E Lele Okukwe

⁶ Ọ hụ nwan a sụọ ụnụ, ọsụọn'a nị ụnụ rị nwan a hụnjun ẹnya yeni nlele ichẹn-ichẹn jẹnkọlẹni d'e bie hụn wẹ rị e lele ụnụ makẹni ọ rịka mkpa nị wẹ lele ụnụ;

⁷ wẹ rị e gi wẹ a ghọsị nị okukwe ụnụ wụ ezigbo ẹ, makẹni okukwe ụnụ ka goru mkpa bụ wẹ e gidẹ ọkụn e lele goru — ọsụọn'a nị goru e wiwi ewiwi! Wẹ rị e lele okukwe ụnụ, kẹni wẹ ja ụnụ mma ogẹn Jizọsị e gi bịa, ye ụnụ ọghọ lẹ mgbaye.

⁸ Ihiẹn Jizọsị rị nwan a sụọ ụnụ, ọsụọn'a nị ụnụ eleghatun'ẹ; ụnụ kwerin'ẹ, ọsụọn'a nị ụnụ arị nwan e legha a; ụnụ hụ nwan a ghọghọ ọda-ọda, okẹn ịghọghọ ọnụ ghalẹni a s'ẹka a kọwa,

⁹ e ri erere rị okukwe ụnụ: erere ahụn wụ nị wẹ hụ a zụọpụha umẹ-ndụn ụnụ.

¹⁰ O mẹ nke nzụọpụhanị, ndị-amụma hụn Osolobuẹ gi kutọ oku ẹfọmanị ru nwan ụnụ ẹka ete chọka nị wẹ ghọha a, a chọ wẹ ntan chọ imọn,

¹¹ a jụ enwẹn wẹ ihiẹn Mmọn Kraịstị rị imẹ wẹ rị e ku ebe ọ nọ gwatọ wẹ afụnfụn Kraịstị k'a ta lẹ ọghọ k'e sọnn'ẹ, a jụ enwẹn wẹ onyẹ ọ rị e ku lẹ ogẹn o jẹnkọ d'e gi mẹ.

¹² Osolobuẹ nọ ghọsị wẹ nị ẹlẹ wẹ, nị ụnụ kẹ wẹ rị e zitọnị ozi. Ụnụ a nụgụọ a nwan ọnụ ndị wẹhẹni ụnụ oziọma ghahanị ikẹn Mmọn-nsọ ahụn Osolobuẹ gha elu-igwee zihẹ. Ndị mmọn-ozi nkẹ a chọka nị wẹ leghadẹ ihiẹn ndịnị!

Wẹ Kpọ Ụnụ D'e Bi Obibi Rị Nsọ

¹³ Kwademẹ ni nwan obi ụnụ, e dọnrin ẹnya; buchanrịn nị obi che ọhụnma hụ Osolobuẹ k'e mẹni ụnụ ogẹn Jesu Kristi e gi bịa.

¹⁴ Nọkẹ ezi ụmụ hụn e humẹ isi, mẹbehi ni ihiẹn ndị hụ te rị a gụn ụnụ kẹ ụnụ kelẹni marịn Jizọsị.

¹⁵ Ka bi ni obibi rị nsọ ụzọ ile kẹ Osolobuẹ hụn kpọ ụnụ dọn rị nsọ.

¹⁶ Makẹni Ẹkụkwọ-nsọ sị, “Rị nị nsọ, makẹni mmẹ nwẹn rị nsọ.”

¹⁷ Ebe ụnụ rị a kpọ Onyẹ hụn ghalẹni e gbeyeni ịhịan Nẹdi ụnụ, Onyẹ hụn e gi ihiẹn onyẹ mẹ e kin ẹ ikpe, gikwọ nị nwan egun ẹ bichanrịn ogẹn họdụ ụnụ k'e bi elu-ụwanị ụnụ wụ itumunyẹ.

Kẹ Wẹ Dọn Gbapụha Ẹnyi

¹⁸ Ụnụ a marịngụọ nị ẹlẹ siliva mọbụ goru e wiwini kẹ wẹ gi gbapụha ụnụ imẹ eje-ihiẹn ndị ahụn ụnụ mụnarịn ndị nẹdi ụnụ,

¹⁹ kanị ẹdeke Kraịstị rịgbu enwẹn ẹ mkpa, hụn rị kẹ nwa-ebulu zu oke nwọnlẹni ntụpọ,

²⁰ hụn Osolobuẹ họtọ n'o d'e ke ụwa, gi ufiri ụnụ wepụha a ogẹn ikpanzụụnnị.

²¹ Ụnụ a ghagụọ nwan ẹka Kraịstị kwerini Osolobuẹ hụn gha ọnwụn weli Kraịstị, ye Kraịstị ọghọ. Ya wụ nị Osolobuẹ kẹ ụnụ kwerini; Osolobuẹ kẹ ụnụ gi dọn ẹnya.

Onyẹ Kwọnkẹnmẹ Oku-Chuku E Nwọn Ezigbo Ihiẹn-ọsụsụọ

²² Ebe o mẹ ni ụnụ a chanchangụọ nwan obi ụnụ ghahanị ịgbaye ezioku Osolobuẹ, ụnụ sikọ d'a saẹka e nwọn ezigbo ihiẹn-ọsụsụọ ibe ụnụ. E gi ni nwan obi ụnụ ile, obi rị ọchan, e nwọn ihiẹn-ọsụsụọ ibe ụnụ —

²³ makẹni ụnụ a wụrụgụọ ndị wẹ mụdọnzi. Ẹlẹ mkpụrụ a nwụnnị kẹ wẹ gi mụdọnzi ụnụ, kanị oku-Osolobuẹ, oku ahụn rị ndụn, oku ahụn k'a rị jẹnrin ejẹn.

²⁴ Makẹni, Ẹkụkwọ-nsọ sị, “Ịhịan ile nọhụ kẹ ẹfịfịa; ọghọ ile rị ịhịan ẹhụ nọhụ kẹ obobo ẹfịfịa. Ẹfịfịa shinwụn, obobo a danpụ!

²⁵ Kanị, oku Onyẹ-nwọnni-ẹnyi k'a rị jẹnrin ejẹn!” Oku hụ wụ oziọma ahụn wẹ zi ụnụ.