Ọrụn Ndị-ozi 2 - Ika

Isi Nke Ẹbụọ Mmọn-nsọ A Bịa Ụhụọhịn Mmẹmmẹ-Pẹntikọsụ

¹ O ru ụhụọhịn Mmẹmmẹ Pẹntikọsụ, ndị ile kwerini rị ụzọ ohu.

² Idẹnmizi, ụzụn nọ kẹ okẹn ufere rị a kpọnị nọ gha elu-igwee bịa, jun mmụlọ wẹ nọdị.

³ Wẹ nọ hụn ihiẹn nọ kẹ ire ọkụn pụhasọnmẹni, nọkwasị onyẹ-onyẹ imẹ wẹ.

⁴ Mmọn-nsọ nọ jun imẹ wẹ ile, wẹ nọ gi asụsụ alị ndị ọzọ kumẹ, e kushi ikẹn kẹ Mmọn-nsọ dọn ye onyẹ onyẹ.

⁵ Ndị Ju e feshi Osolobuẹ ikẹn gha alị ile rị elu-ụwa bịa Jerusalẹm ogẹn ahụn d'a nọdị.

⁶ Ogẹn wẹ gi nụ ụzụnnị, igunrun ịhịan nọ gbakikomẹ. Ọ tụ wẹ ẹnya, makẹni onyẹ-onyẹ hụ a nụ kẹ wẹ rị a sụ asụsụ alị ọ gha bịa.

⁷ Ọ tụ wẹ ẹnya, gba wẹ ngharị-ẹnya ọda-ọda; wẹ nọ sị, “Ẹlẹ ndị Galili wụ ndịnị rị e ku oku?

⁸ Nanị onyẹ-onyẹ imẹ ẹnyi dọn nwan rị a nụ asụsụ alị wẹ nọ mụ a?

⁹ Kẹ ndị Patịa kẹ ndị Mẹdịa kẹ ndị Ẹlam; kẹ ndị bi Mẹsopotemịa lẹ Judia lẹ Kapadoshịa lẹ Pọntusu lẹ Eshịa

¹⁰ lẹ Frigia lẹ Pamfilia lẹ Ijiptu lẹ ẹgbẹrẹ Libia ndị hụ nọchimẹ Saịrini lẹ ndị bi alị ndị Rom,

¹¹ kẹ ndị Ju kẹti-kẹti kẹ ndị gha ofufe ọzọ sọnmẹ ofufe ndị Ju; kẹ ndị gha alị Kriti bịa lẹ ndị Arabụ. Ẹnyi ile hụ a nụ kẹ wẹ rị e gi asụsụ ẹnyi e ku oku okẹn ọrụn-atụmẹnya Osolobuẹ rụnsọnmẹ.”

¹² Ọ tụ wẹ ile ẹnya, gba wẹ ngharị-ẹnya; wẹ hụ a jụ ibe wẹ, “Kị ọnwan wụ?”

¹³ Kanị ndị ọzọ hụ a mụ ẹmụ, a sị, “E gigụọ wẹ manya ọhụn ragbu enwẹn wẹ!”

Ozi Pita Zi Kẹ Mmọn-nsọ Hidankwasịgụ Wẹ

¹⁴ Ya kẹ Pita lẹ ndị-ozi pụ-ichẹn mmanaị ibe ẹ nọ lihi ọtọ, Pita nọ weshi olu elu gwa ndị hụ gbazuni oku: ọ sị wẹ, “Ndị Ju ibe m lẹ ndị ile bi Jerusalẹm, nị m kọwa nị ụnụ ihiẹnni rị e mẹni; gọnni m ntịn ọhụnma-ọhụnma.

¹⁵ Manya arị a tụ ndịnị kẹ ụnụ dọn rị e ro, kaka — o mẹkẹdẹ nwan ụtụntụn, ọkụrọkụ itenẹi sụọ rọhụ.

¹⁶ Mba! Ihiẹnni kẹ Osolobuẹ gi Juwẹlụ onyẹ-amụma ku, sị,

¹⁷ ‘Osolobuẹ sị, “Ogẹn ikpanzụụn, m jẹnkọ d'e hu Mmọn-nsọ m kpu ịhịan ile. Ụmụ ụnụ ikẹnnyẹ lẹ ikpoho k'e bu amụma; ikorọbịa ụnụ k'a hụn ọhụn; ikẹnnyẹ-ọba ụnụ k'a rọ nrọ.

¹⁸ Ẹghẹẹ, ogẹn hụ, m k'e hu Mmọn-nsọ m kpu idibo m — kẹ ikẹnnyẹ kẹ ikpoho, e bu wẹ amụma.

¹⁹ M k'a ghọsịsọnmẹ ihiẹn atụmẹnya elu-igwere, ghọsịsọnmẹ ahịma elu-ụwa — kẹ ẹdeke kẹ ọkụn kẹ ẹnwụnrụn.

²⁰ Ẹnyanwụn jẹnkọ d'a gba ishi, ifọn e nwunmẹ ẹdeke-ẹdeke, Ụhụọhịn Di-nwọnni-ẹnyi kebe ru, okẹn ụhụọhịn ahụn pụ ichẹn.

²¹ Ogẹn hụ, onyẹ ọwụlẹ hụn k'a kpọku ẹfan Di-nwọnni-ẹnyi k'e nwọn nzụọpụha.” ’

²² “Ndị Izrẹlụ, gọn ni ntịn ihiẹn m rị e ku! Jizọsị onyẹ Nazarẹtị wụ okẹnnyẹ hụn Osolobuẹ ghọsịchanrịn ụnụ ọhụnma-ọhụnma nị ya zihẹ ẹ — ghahanị ọrụn-atụmẹnya lẹ ahụnlele lẹ ihiẹn-nghọsị bu ọda o gi ẹ rụn imẹ igunrun ụnụ, hụn ụnụ marịn.

²³ Kanị ihiẹn Osolobuẹ rotọ kaye nọ mẹ, ụnụ nọ we ẹ ye ndị alị ọzọ marịnlẹni Osolobuẹ, wẹ nọ kpọgbuni ụnụ ya elu obe.

²⁴ Kanị Osolobuẹ nọ gha ọnwụn weli ẹ, gha ẹka ọnwụn gbapụha a, makẹni ọnwụn as'ẹka kwọndọn ẹ.

²⁵ Defidi e kughọ oku ẹ, sị, ‘M'a hụn Di-nwọnni-ẹnyi ogẹn ile k'ọ nọyeni m; ebe o mẹ ni ọ rị m ẹka-nni, emẹhunmẹkọ m.

²⁶ Ya haịn obi gi a sụọ m ụsụọ; ya haịn ẹbụ gi a rị m ọnụ. Ẹhụ m k'e zu nwan ikẹn, makẹni m nwọn olilẹnya.

²⁷ Makẹni y'a lakọ m tọ alị-mmọn; y'a nịkọ Onyẹ-nsọ ị rehi.

²⁸ Y'e mẹgụọ m marịn ụzọ ndụn; y'e mẹ m a ghọghọ nị mmẹ lẹ yụ rị.’

²⁹ “Umunẹ m, m k'a gwapụ ụnụ nị nẹdi ẹnyi kanị wụ Defidi a nwụnhụnghọ, e li wẹ ẹ; ili ẹ rịkwọ nwan ebeni d'e ru tannị.

³⁰ Kanị makẹni Defidi wụ onyẹ-amụma lẹni Defidi a marịngụọ nị Osolobuẹ kwe ẹ nkwa, kun enwẹn ẹ, n'o jẹnkọ d'e tumẹ nwa Defidi eze elu ukpo ẹ,

³¹ Defidi hụntọ ihiẹnni. Ya kẹ ọ nọ ku ẹ nị Kraịstị, Onyẹ Hụ Osolobuẹ Tumẹ, jẹnkọ d'a gha ọnwụn lihi, nị alanị w'a tọ imẹ ili lẹni ẹhụ a eretọnị imẹ ili.

³² Osolobuẹ a ghagụọ nwan ọnwụn weli Jesuni, ẹnyi ile rị ihun ụnụ kikẹnni gi ẹnya ẹnyi hụn a.

³³ Osolobuẹ e weshigụọ a elu-igwee ebe ọghọ rị ẹka-nni Osolobuẹ; ọ nahangụọ Chuku-Nẹdi Mmọn-nsọ hụ Chuku-Nẹdi kwe nkwa a, ọ nọ nwan hupụha ihiẹnni ụnụ rị a hụn lẹ hụn ụnụ rị a nụ.

³⁴ Makẹni Defidi aghanị ọnwụn lihi lashi elu-igwee, kama ya lẹ enwẹn ẹ e kughọd'a, sị, ‘Di-nwọnni-ẹnyi sị Di-nwọnni m, “Nọdị alị ẹka-nni m,

³⁵ d'e ru mgbe m gi ndị-iṅẹnrẹn i mẹmẹ ihiẹn i gi a tụkwasị ụkụ.” ’

³⁶ Ndị Izrẹlụ ile, ya we nwan ụnụ ẹnya nị Osolobuẹ e mẹọlẹ Jesuni ụnụ kpọgbu elu obe wụrụ Onyẹ nwọn ihiẹn ile lẹ Onyẹ-nzụọpụha hụ ụnụ rị e lee ẹnya a.”

Ndị Kwerini

³⁷ Ogẹn wẹ gi nụ ihiẹnni, o gbu wẹ mgbu obi ọda-ọda. Wẹ nọ sị Pita lẹ ndị-ozi pụ-ichẹn ibe ẹ, “Umunẹ, kị ẹnyi e mẹ nwan?”

³⁸ Pita nọ za wẹ, sị, “Onyẹ-onyẹ imẹ ụnụ ya rogharị, ni wẹ gi ẹfan Jizọs Kraịstị mẹ ẹ mirin-Chuku, Osolobuẹ a gbagharị a njọ, ogẹn ahụn, o nwọnhẹn oyiye hụ wụ Mmọn-nsọ.

³⁹ Makẹni ụnụ kẹ Osolobuẹ kwe nkwanị n'o k'e zihẹ Mmọn-nsọ — ụnụ lẹ ụmụ ụnụ lẹ ndị rị ebe teni — onyẹ ọwụlẹ Di-nwọnni-ẹnyi wụ Osolobuẹ ẹnyi k'a kpọ oku.”

⁴⁰ Pita a gwazịghọ wẹ ihiẹn bu ọda, gi ẹ dọ wẹ ẹka-ntịn, a sị wẹ, “Zụọpụha nị enwẹn ụnụ imẹ agbọnị zinlẹni!”

⁴¹ Wẹ nọ mẹ ndị ile nabanhan ozi ẹ mirin-Chuku. Ihiẹn nọ kẹ madụ nnụ-uku ẹtọ (3,000) banyeni wẹ ụhụọhịn hụ.

⁴² Ndịnị ile nọ bu enwẹn wẹ che nkuzi ndị-ozi hụ pụ-ichẹn, izu iko ofufe, iri Oriri-nsọ lẹ imẹ-ekpere.

Obibi Ndị Kwerini

⁴³ Onyẹ-onyẹ hụ e gi egun Osolobuẹ e bi, Osolobuẹ hụ e gi ndị-ozi hụ pụ-ichẹn a rụn ọrụn-atụmẹnya lẹ ihiẹn-nghọsị bu ọda.

⁴⁴ Ndị ile kwerini hụ e mẹgbama; onwọnni onyẹ kpọ ihiẹn ẹ nke ya sụọ.

⁴⁵ W'e re alị lẹ ihiẹn ndị ọzọ wẹ nwọn, e ke egho ẹ e ye onyẹ-onyẹ kẹ mkpa wẹ dọn rị.

⁴⁶ Wẹ hụ e gi obi ohu e zu imẹ Ụlọ-nsọ ụhụọhịn-ụhụọhịn; e ri Oriri-nsọ ụlọ-ụlọ; e gi ịghọghọ lẹ ịshịapụ-ẹfọ e rigbama ihiẹn-oriri iwe wẹ,

⁴⁷ a ja Osolobuẹ mma; ihiẹn wẹ hụ a sụọ ịhịan ile. Ụhụọhịn-ụhụọhịn, Di-nwọnni-ẹnyi hụ e bucheni wẹ ndị hụn ọ rị a zụọpụha.