Ọrụn Ndị-ozi 10 - Ika

Isi Nke Iri Pita Lẹ Kọnẹlusu

¹ Imẹ obodo Sizaria, o nwọn okẹnnyẹ ohu ẹfan a wụ Kọnẹlusu hụn a kị ndị-agha ọgụn-isẹn imẹ itu-agha w'a kpọ Itu Itali.

² Okẹnnyẹni e feshi Osolobuẹ ikẹn, a tụ egun Osolobuẹ, ya lẹ ezi-lẹ-ụlọ a ile. O yesọnmẹ ndị igbẹnnyẹ rị alị hụ ihiẹn. Ọ kpọku Osolobuẹ ogẹn ile.

³ Ihiẹn nọkẹ ọkụrọkụ ẹtọ efinnaị, ọ nọ hụn ọhụn, hụn kẹ mmọn-ozi Osolobuẹ banhan, hị a, “Kọnẹlusu!”

⁴ Ya nwẹn nọ bu ẹnya tụma mmọn-ozi hụ yeni egun, sị a, “Di-nwọnni m, kị rọ?” Mmọn-ozi hụ nọ sị a, “Ekpere i lẹ ihiẹn i rị e ye ndị-igbẹnnyẹ e rugụọ elu-igwee, Osolobuẹ e gigụọ a nyanhan ị.

⁵ Zijẹn wẹ nwan Jọpa d'e wẹhẹ okẹnnyẹ ohu ẹfan a wụ Saịmọnụ hụn w'a kpọ Pita;

⁶ ọ rị nke Saịmọnụ hụn a rụn ọrụn akpụkpọ hụn iwe ẹ rị ẹhụ Ohimin.”

⁷ Ogẹn mmọn-ozi hụ gwa a oku gi pụgụ, Kọnẹlusu nọ kpọ idibo ẹ ẹbụọ lẹ onyẹ-agha ohu e feshi Osolobuẹ ikẹn imẹ ndị e jẹnn'ẹ ozi.

⁸ Ogẹn o gi gwagụ wẹ ihiẹn ile mẹni, ọ nọ zi wẹ Jọpa.

⁹ Eki e fọn, ibẹka ọkụrọkụ mmẹbụọ efinnaị anwụn gi a rị isi, ikẹnnyẹ ahụn e rumẹ obodo hụ. Ogẹn hụ kẹ Pita nkẹ gi shi elu ụlọ d'e mẹ ekpere.

¹⁰ Ẹgụn a gụnma a, ọ nọ sị wẹ n'o k'e ri ihiẹn-oriri. Ogẹn wẹ gi rị e mẹmẹ ihiẹn-oriri hụ, ọ nọkẹ sị ụran rọ bụ ẹlẹ ụran,

¹¹ ọ nọ hụn kẹ elu-igwee kpupụ, hụn ihiẹn nọkẹ ẹkwa shịanị k'ọ gha elu lala rịkẹ sị wẹ dọdọn ẹ ntịn a ẹnịnọ.

¹² Anụ ile nwọn ụkụ ẹnọ lẹ ndị ile a rịnị lẹ nnụnụ ile e fe elu hụ imẹ ẹ.

¹³ Ya ọ nọ nụ olu sị, “Pita, lihi; gbu n'i ri.”

¹⁴ Kanị Pita nọ za, sị, “Mba-o, Di-nwọnni-ẹnyi! Erituni m ihiẹn rụnị mọbụ ihiẹn ẹnyi a sọ.”

¹⁵ Olu hụ nọ gwazị a oku nke mgbe ẹbụọ, sị, “Akpọkwọlẹ ihiẹn Osolobuẹ mẹgụ n'ọ rị ọchan ihiẹn w'a sọ.”

¹⁶ Ihiẹnni e mẹpụ mgbe ẹtọ, wẹ nọ weri ihiẹn nwẹn ozigbo shi elu-igwee.

¹⁷ Ihiẹnni gba Pita ngharị-ẹnya ọda-ọda; ebe ọ rị e ro ihiẹn ọ wụ kẹ ndị hụ Kọnẹlusu zihẹ nọ ru ebẹhụ, turu ọnụ-mgbọn, a jụ kẹ elebe kẹ iwe onyẹ w'a kpọ Saịmọnụ rị.

¹⁸ E weshi wẹ olu wẹ elu, jụ kẹ Saịmọnụ w'a kpọ Pita hụzị ebẹhụ.

¹⁹ Pita nkẹ hụkwọ e ro ihiẹn ọ hụn, Mmọn-nsọ nọ nwan sị a, “Lee ẹ, ikẹnnyẹ ẹtọ rị a chọ ị.

²⁰ Lihi nwan, n'i hidan d'e kunrun wẹ. Etulẹ; sọnmẹ wẹ, ni mmẹ zihẹ wẹ.”

²¹ Ya Pita nọ buru ikẹnnyẹ ndị hụ, sị, “Mmẹ wụ onyẹ ahụn ụnụ rị a chọ; kị ụnụ bịanị?”

²² Wẹ nọ za, sị, “Kọnẹlusu zi ẹnyi. Onyẹ a kị ndị-agha ọgụn-isẹn rọ, onyẹ ezi-omumẹ a tụ egun Osolobuẹ; ndị Ju ile e ku oku ẹ ọhụnma. Mmọn-ozi nsọ gwa a d'a kpọ ị, n'ị bịa iwe ẹ kẹni ọ nụ ihiẹn i k'e ku.”

²³ Ya Pita nọ sị wẹ banhan, ọ nọ lee wẹ ọbịa. Eki e fọn, o lihi, sọnmẹ wẹ, ụfọdụ ndị kwerini rị Jọpa nọ sọnmẹ ẹ.

²⁴ Eki e fọnzi, wẹ nọ ru Sizaria. Kọnẹlusu hụ a tụ ẹnya wẹ; ọ kpọkikomẹgụọ ndị nke ẹ lẹ ndị wụ ezigbo ọwụ a.

²⁵ Ogẹn Pita gi bịa, Kọnẹlusu nọ jẹn d'e kunrun ẹ, gbun'ẹ osekpu, kpọn'a isi alị.

²⁶ Kanị Pita nọ weli ẹ, sị, “Lihi ọtọ, nị ịhịan mmaka kẹ mmẹ nwẹn wụzị.”

²⁷ Pita lẹ Kọnẹlusu hụkwọ e ku oku d'e ru nị ọ banye imẹ ụlọ; ọ nọ hụn a nị igunrun ịhịan a gbakikomẹgụọ ebẹhụ.

²⁸ Ọ nọ sị wẹ, “Ụnụ lẹ enwẹn ụnụ a marịnghọ nị Iwu kwọndọn onyẹ Ju sọn onyẹ alị ọzọ mẹkọ mọbụ jẹn iwe ẹ. Kanị Osolobuẹ a ghọsịgụọ m m'a kpọlẹ onyẹ ọwụlẹ ‘onyẹ w'a sọ’ mọbụ ‘onyẹ wẹ ghalẹni a nọkunmẹ’.

²⁹ Ya haịn m gilẹni nwan tu kẹ wẹ zi wẹ d'a kpọ m. M rị nwan a jụ: kị ụnụ kpọnị m?”

³⁰ Kọnẹlusu nọ za a, sị, “Nwẹnẹ mgbeni taịnnọ, m rị iwe m e mẹ ekpere, ihiẹn nọ kẹ ọkụrọkụ ẹtọ efinnaị. Idẹnmizi, okẹnnyẹ ohu yi ẹwuru rị e gbukeni nọ wuzo m ihun.

³¹ Ọ nọ sị, ‘Kọnẹlusu, Osolobuẹ a nụọlẹ ekpere i; ọ nyanhangụọ ihiẹn ị rị e ye ndị igbẹnnyẹ.

³² Zi nwan ozi jẹn Jọpa d'a chọ Saịmọnụ w'a kpọ Pita, ọ rị iwe Saịmọnụ onyẹ ọrụn akpụkpọ hụn rị ẹhụ Ohimin.’

³³ Ya m nọ zi wẹ d'a kpọ ị ozigbo. Y'e mẹkẹ i gi bịa. Ẹnyi ile rị nwan ihun Osolobuẹ ebeni kẹni ẹnyi nu ihiẹn ile Di-nwọnni-ẹnyi sị ị gwa ẹnyi.”

Ozi Pita Zi Iwe Kọnẹlusu

³⁴ Ya kẹ Pita nọ gwama wẹ oku, sị, “A hụngụọ m'a nwan nị Osolobuẹ ara tu onyẹ ịhịan wụ.

³⁵ Kama, ọ nabanhan onyẹ ọwụlẹ a tụ egun ẹ, e mẹ ihiẹn rị mma; ara tu alị onyẹ gha bịa.

³⁶ Ụnụ a marịnghọ ozi o zijẹnni ndị Izrẹlụ: oziọma ya lẹ ịhịan gi e dọn ghahanị Jesu Kristi Onyẹ nwọn ihiẹn ile lẹ ịhịan ile.

³⁷ Ụnụ a marịnzịghọ ihiẹn ile mẹ imẹ alị ndị Ju ile, ihiẹn hụn bidọn imẹ Galili ogẹn wẹ gi mẹgụ mirin-Chuku ahụn Jọnụ sị ịhịan ile d'e mẹ:

³⁸ kẹ Jizọsị onyẹ Nazarẹtị hụn Osolobuẹ tumẹ, gi Mmọn-nsọ lẹ ikẹn gbajun, dọn jẹnhunmẹ, e mẹ ihiẹn rị mma, a zụọ ndị ile Ekwensụ rị e kpokpo, makẹni Osolobuẹ nọyen'ẹ.

³⁹ Ẹnyi wụ ọshẹri ihiẹn ile o mẹ imẹ alị ndị Ju lẹ isi-obodo wẹ wụ Jerusalẹm lẹ kẹ wẹ dọn hogbu ẹ elu osisi.

⁴⁰ Kanị Osolobuẹ nọ gha ọnwụn weli ẹ nke akpọhịn ẹtọ, mẹ ịhịan hụn a,

⁴¹ bụ ẹlẹ ịhịan ile kanị ẹnyi sụọ, ẹnyi ndị Osolobuẹ họtọ, nị ẹnyi wụrụ ọshẹri, ẹnyi ndị sọn ẹ ri, sọn ẹ ra, k'ọ ghagụ ọnwụn lihi.

⁴² Ọ nọzị sị ẹnyi hụnkwọ a nị ẹnyi zi ịhịan ile ozini, gwa wẹ nị ịya wụ Onyẹ hụn Osolobuẹ tumẹ hụn jẹnkọ d'e kin ndị rị ndụn lẹ ndị nwụnhụnnị ikpe.

⁴³ Ndị-amụma ile shịan'a ẹri nị onyẹ ọwụlẹ kwerinin'ẹ gi ẹfan a e nwọnrin mgbagharị njọ.”

Kẹ Mmọn-nsọ Dọn Mẹjun Ndị Wụlẹni Ndị Ju

⁴⁴ Ebe okuni rịkwọ Pita ọnụ, Mmọn-nsọ nọ hidankwasị wẹ ile nụ oku-Chuku hụ Pita rị e ku.

⁴⁵ Ọ nọ tụ ndị Ju kwa ugun kwerini hụn gha Jọpa sọnhẹn Pita ẹnya nị Osolobuẹ e hukpugụọzidẹ ndị wụlẹni ndị Ju Mmọn-nsọ,

⁴⁶ makẹni wẹ hụ a nụ kẹ wẹ rị a sụ asụsụ ichẹn-ichẹn, a ja Osolobuẹ mma. Ya Pita nọ sị,

⁴⁷ “Onyẹ k'a sị wẹ emẹlẹ ndịnị mirin-Chuku, ebe o mẹni e nwọnhẹngụọ wẹ Mmọn-nsọ kẹ ẹnyi nwẹn dọn nwọnhẹn?!”

⁴⁸ Ọ nọ sị wẹ gi ẹfan Jizọsị Kraịstị mẹ wẹ mirin-Chuku. Wẹ nọ sị a sọnzi wẹ nọdị ẹkẹrẹ.