Ọpụpụ 37 - Ika

Isi Nke Mmẹsa Kwasị Ọgụn Ẹkpẹti Nkwerigbama

¹ Bẹzalẹlụ wẹ nọ gi osisi zeni, osisi akashịa, rụn ẹkpẹti hụ Osolobuẹ sị wẹ rụn: usue ẹ wụ ọbụkụ-ẹtọ lẹ hụn kazị mkpikpi, ụshịa a ọbụkụ ẹbụọ lẹ hụn rulẹni mkpikpi, ojijẹn-elu ẹ ọbụkụ ẹbụọ lẹ hụn rulẹni mkpikpi.

² Wẹ gi ezigbo goru wẹ buchelẹni ihiẹn ọzọ nyan a imẹ lẹ azụụn, gizi goru gbihunmẹ ọnụ a.

³ Wẹ nọ gi goru kpụ ẹgba ohu-ohu ye ụkụ a ẹnịnọ, ẹbụọ azụụnnị, ẹbụọ azụụnnị.

⁴ Ya wẹ nọ gi osisi akashịa pịn ẹgbe ẹbụọ, gi goru nyankwama wẹ,

⁵ fa ẹgbe ndị hụ ye ẹgba ndị hụ rị ẹkpẹti hụ azụụnnị lẹ azụụnnị nị w'e gi wẹ e bu ẹ.

⁶ Wẹ nọ gi ezigbo goru wẹ buchelẹni ihiẹn ọzọ mẹmẹ okun ẹkpẹti hụ, okun w'a nọ a gbarị isi; usue ẹ wụ ụbụkụ ẹtọ lẹ hụn kazị mkpikpi, ụshịa a ọbụkụ ẹbụọ lẹ hụn rulẹni mkpikpi.

⁷ Wẹ nọ gi goru wẹ tipịa kpụ ihiẹn nwọn nku ye okun ẹkpẹti hụ isi ẹ ẹbụọ.

⁸ Ọ kpụ ihiẹn ndị ahụn nwọn nku ohu-ohu ye isini lẹ isini, hụn wẹ lẹ okun ahụn gi wụrụ ibe ohu.

⁹ Ihiẹn ndị ahụn nwọn nku kishi nku elu, shịakpu okun ahụn w'a nọ a gbarị isi. Wẹ ẹbụbụọ chetarị ihun, we ihun kọma okun Ẹkpẹti-nkwerigbama hụ.

¹⁰ Wẹ nọ gi osisi akashịa mẹmẹ teburu-nsọ: usue ẹ wụ ọbụkụ-ẹtọ, ụshịa a ọbụkụ ohu lẹ nkirishi, ojijẹn-elu ẹ ọbụkụ ẹbụọ lẹ hụn rulẹni mkpikpi.

¹¹ Wẹ nọ gi goru wẹ buchelẹni ihiẹn ọzọ nyankwama a, gizi goru gbihunmẹ ẹ.

¹² E gi wẹ osisi shịahan kẹ ubẹka kiri teburu hụ, gi goru nyan ebe wẹ gi kiri ẹ.

¹³ Wẹ nọ gi goru kpụ ẹgba ẹnọ ye ntịn teburu ahụn ẹnọ, ebe ụkụ a ẹnịnọ rịsọnmẹ,

¹⁴ gba ẹgba goru ndị ahụn nọkunmẹ ngọngọn teburu hụ kẹni w'a fa ẹgbe e ye wẹ e gi e bu teburu hụ.

¹⁵ Osisi akashịa kẹ wẹ gi pịn ẹgbe ẹbụọ hụ wẹ gi e bu teburu hụ, gi goru nyan wẹ.

¹⁶ Wẹ nọ gizi ezigbo goru wẹ buchelẹni ihiẹn ọzọ mẹmẹ ihiẹn ndị wẹ lẹ teburu hụ wị: kẹ afẹrẹ-unyẹgbe kẹ afẹrẹ-mgbugbu kẹ mkpu rị ichẹn-ichẹn w'e gi e huye oyiye-manya.

Obu-ukpẹ

¹⁷ Bẹzalẹlụ wẹ gizi ezigbo goru wẹ buchelẹni ihiẹn ọzọ mẹmẹ obu-ukpẹ. Goru wẹ tipịa kẹ wẹ gi mẹmẹ ẹ, mẹmẹye ẹ ukun lẹ ogwe nọkẹ osisi. Kẹ ukun ẹ kẹ ogwe ẹ kẹ mkpu ẹ ile hụn yisọnmẹ mkpụkpụma lẹ obobo amọndụ wụchanrịn ibe ohu.

¹⁸ Obu-ukpẹ hụ wa agalaba isin: ẹtọ azụụnnị, ẹtọ azụụnnị.

¹⁹ Mkpu ẹtọ-ẹtọ rịsọnmẹ kẹ obobo amọndụ obobo ẹ lẹ mkpụkpụma a rị a, rịsọnmẹ agalaba ọwụlẹ imẹ agalaba isin ahụn rị ogwe ẹ.

²⁰ Kanị ogwe ẹ nwọn mkpu ẹnọ rịzị kẹ obobo amọndụ hụn obobo ẹ lẹ mkpụkpụma rị a.

²¹ Mkpụkpụma ohu rị okpuru agalaba ẹbụọ-ẹbụọ wịsọnmẹ suepụha obu-ukpẹ hụ: ohu okpuru ẹbụọ ibuzọ, ohu okpuru ẹbụọ mẹ wẹ ẹnọ, ohu okpuru ẹbụọ mẹ wẹ isin.

²² Mkpụkpụma ndị ahụn lẹ agala ndị hụ lẹ ogwe obu-ukpẹ hụ wụ ibe goru wẹ buchelẹni ihiẹn ọzọ, hụn wẹ tipịa.

²³ Wẹ nọ gi ezigbo goru wẹ buchelẹni ihiẹn ọzọ mẹmẹ ukpẹ ẹsa rịn'a lẹ nwa-mbu wẹ lẹ unyẹgbe ẹ.

²⁴ Talẹnti goru ohu, kilo mmẹnọ kwasị ọgụn (34kg), hụn wẹ buchelẹni ihiẹn ọzọ kẹ wẹ gi kpụ obu-ukpẹ ahụn lẹ ihiẹn ile rịn'a.

Ukpo-nsẹnsị

²⁵ Wẹ nọ gi osisi akashịa mẹmẹ ukpo w'a nọ mụ nsẹnsi. Usue ẹ lẹ ụshịa wụ ahanmahan: usue ẹ wụ ọbụkụ ohu lẹ mkpikpi, ụshịa a ọbụkụ ohu lẹ mkpikpi, ojijẹn-elu ẹ ọbụkụ ẹtọ. Ịya lẹ mpịn rịsọnmẹn'ẹ wụ ibe-osisi ohu.

²⁶ Wẹ nọ gi goru wẹ buchelẹni ihiẹn ọzọ nyanchanrịn elu ẹ ile, ẹhụ a ile lẹ mpịn a ile, gi goru gbihunmẹ ẹ.

²⁷ Wẹ nọ gba ẹgba ẹbụọ azụụnnị lẹ azụụnnị ye okpuru goru ahụn wẹ gi gbihunmẹ ukpo hụ, nị w'e gi wẹ e kwọndọn akp'osisi wẹ gi e bu ẹ

²⁸ Wẹ nọ gi akashịa pịn akp'osisi ndị wẹ gi e bu ẹ, gi goru nyankwama akp'osisi ndị hụ.

²⁹ Wẹ nọ mẹmẹ udẹn-nsọ ntumẹ hụ lẹ nsẹnsi hụ e shin ọhụnma; ndị e mẹmẹ udẹn e shin ọhụnma mẹmẹ wẹ.