Ọpụpụ 27 - Ika

Isi Nke Ẹsa Kwasị Ọgụn Ukpo Wẹ Nọ A Dụn Ẹjan Ọkụn

¹ “Gi osisi zeni, osisi akashịa, rụn ukpo nchụn-ẹjan. Usue ẹ k'a wụ ọbụkụ ẹsa lẹ nkirishi, ụshịa a ọbụkụ ẹsa lẹ nkirishi: k'o suehan k'o k'a shịahan; ojijẹn-elu ẹ k'a wụ ọbụkụ ẹnọ lẹ nkirishi.

² Pịn mpịn ohu-ohu ye ntịn a ẹnịnọ. Ya lẹ mpịn a ẹnịnọ k'a wụ ibe-osisi ohu, y'e gi igwe-ufie wụ bronzu nyankwama kẹ ukpo nchụn-ẹjan kẹ mpịn ndị hụ.

³ Gi igwe-bronzu mẹmẹchanrịn arịa ile sọn ukpo nchụn-ẹjan hụ: kẹ ite wẹ gi e kpọnpụ ntụn lẹ ọsẹkẹ sọnn'ẹ kẹ afẹrẹ w'e gi e fekpu ihiẹn kẹ ndụndụn wẹ gi a weri anụ, kẹ ugbẹgbẹ ndị wẹ gi e ghe ihiẹn.

⁴ “Gi igwe-ufie wụ bronzu mẹmẹn'ẹ ngịgan; y'e gi igwe-bronzu mẹmẹsọnmẹ ẹgba ohu-ohu yesọnmẹ ngịgan ahụn ntịn ẹnịnọ.

⁵ Gan a ye okpuru ebe ẹkpụ jẹnkọ d'a rị ahanmahan imẹ ukpo ahụn.

⁶ “Gi osisi zeni, osisi akashịa, mẹmẹni ukpo hụ ẹgbe, y'e gi igwe-ufie wụ bronzu nyankwama wẹ.

⁷ Wẹ jẹnkọ d'a fa ẹgbe ndị hụ ye ẹgba ndị hụ, ẹgbe ndị ahụn a rị ukpo hụ azụụnnị lẹ azụụnnị wẹ gha e bu ẹ.

⁸ Imẹ ukpo nchụn-ẹjan hụ jẹnkọ d'a gba okpokoro: gi ibe-osisi mẹmẹ ẹ. Mẹmẹ ẹ n'ọ rịchanrịnhụ kẹ wẹ dọn nwan ghọsị ị enu-ugu.

Ezi Ọdụ-nsọ

⁹ “Mẹmẹpụha ebe jẹnkọ d'a wụ ezi Ọdụ-nsọ ahụn. Gi ibe-ẹkwa ndị wẹ gi oruru-linẹni riẹnni kpa gbọnhunmẹ ẹ: ẹkwa k'a rị ẹbamịn ndịdan-mirin jẹnkọ d'a wụ yadị ẹkwa iri kwasị ọgụnnaị.

¹⁰ Adansụn igwe-bronzu ọgụn lẹ ụkụ wẹ ọgụn wụzị igwe-bronzu kẹ wẹ k'e gi kọnmẹ ẹkwa ndị hụ; nkọn wẹ lẹ ẹka wẹ gi e kwọndọn ibe wẹ k'a wụ siliva.

¹¹ Hụn k'a rị ẹbamịn-ugu k'a rịzị ẹrịra: yadị ẹkwa iri kwasị ọgụnnaị, ọ k'a wụzị adansụn igwe-bronzu ọgụn lẹ ụkụ-adansụn igwe bronzu ọgụn; nkọn adansụn lẹ ẹka wẹ gi e kwọndọn ibe wẹ k'a wụzị siliva.

¹² “Ụshịa ezi Ọdụ-nsọ ẹbamịn ọdịdan-ẹnyanwụn jẹnkọ d'e ri yadị ẹkwa isẹn kwasị ọgụn; azụụnnị sikọ d'e nwọn adansụn iri lẹ ụkụ-adansụn iri.

¹³ Ihun ezi rịn'a, ẹbamịn ọwụwa ẹnyanwụn, ụshịa a k'a wụzị yadị isẹn kwasị ọgụn.

¹⁴ Ọnụ-ụgba k'a rị etintinnaị ihun ẹ, e gi wẹ yadị ẹkwa ẹsa lẹ nkirishi lẹ adansụn ẹtọ lẹ ụkụ-adansụn ẹtọ, tankin azụụnnị,

¹⁵ gizi yadị ẹkwa ẹsa lẹ nkirishi lẹ adansụn ẹtọ lẹ ụkụ-adansụn ẹtọ tankin azụụnnị.

¹⁶ “Ọnụ-mgbọn lẹ enwẹn wẹ gha a banye ezi Ọdụ-nsọ sikọ d'a wụ yadị ẹkwa-linẹni iri wẹ kpayesọnmẹ oruru bru lẹ pọpụ lẹ ododo; adansụn ẹnọ lẹ ụkụ-adansụn ẹnọ k'o k'e nwọn.

¹⁷ “Adansụn ile wẹ k'e gi gbahunmẹ ezi Ọdụ-nsọ k'e nwọn mgbara siliva lẹ nkọn siliva lẹ ụkụ-adansụn igwe-bronzu.

¹⁸ “Ya wụ, usue ezi Ọdụ ahụn k'a wụ yadị iri kwasị ọgụnnaị, ụshịa a yadị isẹn kwasị ọgụn; ojijẹn-elu ẹ yadị ẹbụọ lẹ nkirishi; ẹkwa linẹni riẹnni kẹ w'e gi tan a; ụkụ adansụn ndị rịn'a k'a wụ igwe-bronzu.

¹⁹ Igwe-bronzu kẹ wẹ k'e gizi kpụ ihiẹn ile wẹ k'e gi rụn ọrụn ofufe w'a rụn imẹ Ọdụ-nsọ hụ lẹ mkpụkpọ ile w'e gi kpọdọn Ọdụ-nsọ alị lẹ ndị w'e gi kpọdọn mgbọn ẹ alị ezi.

Ofugbọn-olivu W'e Gi A Mụ Ukpẹ

²⁰ “Sị ndị Izrẹlụ wẹhẹ ofugbọn-olivu wẹ sụ asụ wẹ buchelẹni ihiẹn ọzọ, hụn w'e gi mụ ukpẹ ahụn rị Ọdụ-nsọ, kẹni ukpẹ ẹ hụn ụzọ e nwun ogẹn ile.

²¹ Imẹ Ọdụ-ozuzu, ihun Ẹkwa ahụn wẹ gi a tankin ebe Ẹkpẹti Ashịa-ẹri rị, Ẹrọnụ lẹ ụmụ a ikẹnnyẹ k'a hụn a nị ukpẹ ahụn e nwun ebẹhụ ihun Osolobuẹ gha ẹnyasị d'e ru ụtụntụn. Ndị Izrẹlụ k'e dọnmẹ iwuni agbọ wẹ ile.