Ọpụpụ 26 - Ika

Isi Nke Isin Kwasị Ọgụn Ọdụ-nsọ

¹ “Gi ibe-ẹkwa iri mẹmẹ Ọdụ-nsọ ahụn. O jẹnkọ d'a wụ ibe-ẹkwa wẹ gi oruru-linẹni lẹ oruru-mmaka kpa, oruru-mmaka wẹ ye ihiẹn e nwun bru-bru lẹ ihiẹn e nwun pọpụ-pọpụ lẹ ihiẹn e nwun ododo-ododo kpa, onyẹ ma kpa ihiẹn a kpa ndị Chẹrobu ye ẹ.

² Ibe-ẹkwa hụ ile k'e mẹ ahanmahan: usue ohu-ohu k'a wụ yadị mmẹnọ-mmẹnọ, ụshịa wẹ yadị ẹbụọ-ẹbụọ.

³ Kpagbama ibe-ẹkwa hụ isẹn, y'a kpagbama isẹn họdụnị ẹrịra.

⁴ Gi ẹkwa ahụn e nwun bru-bru mẹmẹ ihiẹn ohi-ohi ye mpịnpịn ẹkwa ikpanzụụn imẹ isẹn ibuzọ wẹ kwagbama, y'e mẹmẹzikwọ nke ikpanzụụn imẹ isẹn hụn ẹbọ ẹrịra.

⁵ Ihiẹn ohi-ohi iri kwasị ọgụnnaị k'i k'e buche mpịnpịn ibe-ẹkwa ikpanzụụn imẹ isẹn ibuzọ, y'e buzi iri kwasị ọgụnnaị che mpịnpịn ibe-ẹkwa ikpanzụụn imẹ isẹn hụn ẹbọ, ihiẹn ohi-ohi ndị hụ wẹ k'e chetarịsọnmẹ ibe wẹ ihun.

⁶ Y'e mẹmẹ nwan akpa goru gi kpadọngbama ẹkwa ndị hụ, Ọdụ-nsọ hụ e họnrin ohu.

Ihiẹn Wẹ Gi Kpu Elu Ọdụ-nsọ

⁷ “Gi ẹkwa wẹ gi ẹṅẹnrẹn ewu kpa mẹmẹ ihiẹn w'e gi kpumẹ elu Ọdụ-nsọ hụ: ibe mmanaị k'i jẹnkọ d'e mẹmẹ.

⁸ Usue ohu-ohu k'a wụ yadị mmisẹn, ụshịa wẹ a wụ yadị ẹbụọ-ẹbụọ. Wẹ mmanaị ahụn k'e mẹ ahanmahan.

⁹ Kwagbama isẹn imẹ wẹ, y'a kwagbamazị isin họdụnị; y'a magi hụn mẹ ndịnị isin tọ ihun Ọdụ ahụn.

¹⁰ Mẹmẹ ihiẹn ohi-ohi iri kwasị ọgụnnaị yesọnmẹ mkpẹnrẹn ibe-ẹkwa rị isi imẹ isẹn ibuzọ, iri kwasị ọgụnnaị mkpẹnrẹn hụn rị isi imẹ isẹn hụn ẹbọ.

¹¹ Y'e gi bronzu mẹmẹ akpa iri kwasị ọgụnnaị, gha wẹ ye imẹ ihiẹn ohi-ohi ndị hụ gi wegbama wẹ, o họnrin Ọdụ ohu.

¹² “Hụn pụhanị imẹ ibe-ẹkwa ndị ahụn wẹ gi kpumẹ Ọdụ-nsọ ahụn, mkpikpi ibe-ẹkwa ohu hụn o gi suekarị, ya kọnrin azụụn Ọdụ-nsọ hụ.

¹³ Nkirishi yadị ẹkwa ndị ahụn suepụhasọnmẹ azụụnnị lẹ azụụnnị imẹ ẹkwa ahụn wẹ k'e gi kpumẹ Ọdụ-nsọ hụ k'e kọnrinsọnmẹ ebẹhụ wẹ suepụha elu Ọdụ ahụn.

¹⁴ “Gi akpụkpọ ebulu kwazị okpukpu mẹ ẹ ẹbụọ hụn w'e gi e kpukwasị nke ibuzọ — akpụkpọ ebulu wẹ gi ihiẹn e nwun ododo-ododo yegbu. Y'e gi ihiẹn akpụkpọ efin-ohimin kwa hụn mẹ wẹ ẹtọ k'a rịchanrịn wẹ elu.

Ibe-osisi Wẹ Gi Mẹmẹ Ẹhụ Ọdụ-nsọ

¹⁵ “Gi osisi akashịa mẹmẹsọnmẹ ibe osisi w'e gi mẹmẹ Ọdụ-nsọ ahụn.

¹⁶ Usue ibe ohu-ohu k'a wụ ọbụkụ mmisẹn, ụshịa a wụrụ ọbụkụ ẹbụọ lẹ hụn rulẹni mkpikpi;

¹⁷ ibe ọwụlẹ jẹnkọ d'e nwọn ụkụ ẹbụọ zinrinni. Mẹmẹ ibe osisi ile wẹ k'e gi mẹmẹ ẹhụ-ụlọ Ọdụ-nsọ hụ ẹrịra.

¹⁸ Mẹmẹ ibe-osisi ọgụn azụụn rị ẹbamịn ndịdan-mirin Ọdụ-nsọ hụ,

¹⁹ y'e gi siliva mẹmẹ ụkụ wẹ k'a rị okpuru ibe-osisi ndị ahụn: ẹbụọ-ẹbụọ okpuru ibe-osisi ohu-ohu nwọn ụkụ ẹbụọ.

²⁰ Mẹmẹzikwọ ibe-osisi ọgụn wẹ e gi mẹmẹ azụụn hụn ẹbọ rị Ọdụ-nsọ hụ, azụụn rị ẹbamịn-ugu

²¹ lẹ ụkụ siliva ọgụnnaị ibe-osisi ndị ahụn, ẹbụọ-ẹbụọ okpuru ibe ohu.

²² “Ibe-osisi isin k'i jẹnkọ d'e mẹmẹni isi-njẹndemẹ Ọdụ-nsọ ahụn, ya wụ azụụn rị ẹbamịn ọdịdan ẹnyanwụn,

²³ y'e mẹmẹzi ibe ẹbụọ ye mgbugi ẹ ẹbụọ rị isi-njẹndemẹ hụ n'ọ hụn ụzọ kẹnrẹn.

²⁴ Wẹ sikọ d'a kịkpamachanrịrị ibe-osisi ndị k'a rị mgbugi ẹbụọ ahụn gha ukun-alị d'e ru elu ẹ, gi ẹgba ohu gangbama wẹ elu; ẹrịra kẹ wẹ ẹbụọ k'a rị.

²⁵ Ya wụ nị ibe-osisi ẹsatọ lẹ ụkụ siliva mmisin jẹnkọ d'a rị isi-njẹndemẹni, ẹbụọ-ẹbụọ okpuru ibe-osisi ohu-ohu.

²⁶ “Gizi osisi akashịa mẹmẹ akp'osisi ndị w'e gi e fiẹngipụ ibe-osisi ndị ahụn: isẹn k'e kwọndọn ibe-osisi rị Ọdụ-nsọ ahụn azụụn ohu,

²⁷ isẹn e kwọndọn ndị rị azụụn hụn ẹbọ, isẹn e kwọndọn ibe-osisi ndị rị isi-njẹndemẹ Ọdụ-nsọ, ẹbamịn ọdịdan-ẹnyanwụn.

²⁸ Akp'osisi hụn w'e gi fiẹngipụ etintinnaị ibe-osisi ndị ahụn k'a gha isi ẹ ohu ru hụn ẹbọ.

²⁹ “Gi goru nyankwama ibe-osisi ndị hụ, y'e gi goru mẹmẹ ẹgba wẹ sikọ d'a ghaye akp'osisi ndị ahụn wẹ gi fiẹngipụ e kwọndọn wẹ. Gizi goru nyankwama akp'osisi ndị ahụn.

³⁰ “Rụn Ọdụ-nsọ hụ n'ọ nọchanrịn kẹ wẹ dọn nwan ghọsị ị ya elu-ugu.

Ẹkwa Wẹ Gi A Tankin Ebe Kachanrịn Nsọ

³¹ “Kwa ẹkwa w'e gi a tankin ọnụmụzọ. Gi ẹkwa wẹ gi oruru mmaka e nwun bru-bru lẹ pọpụ-pọpụ lẹ ododo-ododo lẹ oruru-linẹni riẹnni kpa kwa a, a kpa wẹ ihiẹn nwọn nku yesọnmẹ ẹ gi chọ a mma.

³² Adansụn osisi akashịa ẹnọ wẹ gi goru nyankwama kẹ w'e gi tan wẹ. Ụkụ adansụn ndị ahụn k'a wụ siliva. Nkọn goru k'e wẹ e gi kọnye ẹkwa hụ.

³³ I kọnyegụ ẹkwa-ọnụmụzọ hụ, y'a dọ Ẹkpẹti Ashịa-ẹri ye azụụn ẹkwa hụ. Ẹkwa-mgbọnkin hụ k'e kebeni ụnụ Ebe rị Nsọ lẹ Ebe Kachanrịn Nsọ.

Okun Ẹkpẹti-nsọ Lẹ Teburu-nsọ

³⁴ “Bu okun ahụn wẹ nọ a gbarị isi che elu Ẹkpẹti Ashịa-ẹri rị Ebe Kachanrịn nsọ.

³⁵ Bu teburu hụ che ihun Ẹkwa-mgbọnkin hụ, y'e bu obu-ukpẹ che ẹbamịn ndịdan-mirin imẹ Ọdụ-nsọ hụ, nchetarị ihun teburu hụ — hụn k'a rị ẹbamịn-ugu.

Ẹkwa Wẹ Gi Tankin Ọnụmụzọ Mmughẹ Ibuzọ

³⁶ “Kwa ẹkwa w'e gi tankin ọnụmụzọ Ọdụ-nsọ ahụn: gi ẹkwa wẹ gi oruru mmaka e nwun bru-bru lẹ nke pọpụ lẹ nke ododo lẹ oruru-linẹni riẹnni kpa kwa a. Onyẹ ma kpa ihiẹn e ye ẹkwa jẹnkọ d'e mẹmẹ ẹ.

³⁷ “Gi adansụn osisi akashịa isẹn wẹ gi goru nyankwama tan a. Nkọn wẹ k'a wụ goru. Gi igwe-bronzu kpụnị wẹ ụkụ isẹn.