Ọpụpụ 14 - Ika

Isi Nke Mmẹnọ Ohimin Ufie E Kewanị Wẹ

¹ Ya kẹ Osolobuẹ nọ sị Mozizi,

² “Gwa ndị Izrẹlụ wẹ kin azụụn d'e ziẹntọ ẹhụ Pi-Hahirọtụ nọdị ebẹhụ, ẹgbata Mig'dọlụ lẹ Ohimin-ufie. Wẹ ziẹntọ mkpẹnrẹn Ohimin ebẹhụ, ihun Baalụ-Zẹfọnụ.

³ Fẹro k'a sị enwẹn ẹ, ‘Ndị Izrẹlụ a wahunmẹmẹ; amarịn wẹ ebe wẹ jẹnkọ; atụ e kehunmẹgụọ wẹ.’

⁴ M jẹnkọ d'a kpọkin Fẹro obi; o k'a chụma ndị Izrẹlụ. M k'e gi kẹ Fẹro kẹ ndị-agha a nwọnrin ọghọ, ndị Ijiptu e gi ẹ marịn nị m wụ Osolobuẹ.” Ya ndị Izrẹlụ nọ mẹ ihiẹnni Osolobuẹ gwa wẹ.

⁵ Ogẹn wẹ gi gwa Fẹro nị ndị Izrẹlụ a gbapụgụọ, Fẹro lẹ ịhaịmẹ ẹ nọ kuhutọ ọnụ, sị, “Kị wụ ihiẹnni ẹnyi mẹ? Ẹnyi a hatugụọ ndị Izrẹlụ, ofufe wẹ te rị e fe ẹnyi a la!”

⁶ Ya kẹ Fẹro nọ kẹn ẹshin ẹ ye ụgbọ-anyịnyan a, kịrị ndị-agha a;

⁷ o werizikwọ ụgbọ-anyịnyan ọgụn iri kwasị nnụ kachanrịn mma lẹ ụgbọ-anyịnyan ile họdụ alị Ijiptu, uwẹ lẹ ndị-agha kịkọnị wẹ;

⁸ Osolobuẹ nọ kpọkin Fẹro eze Ijiptu obi, ọ nọ chụma ndị Izrẹlụ hụn pụkọ kẹ ndị mẹri agha.

⁹ Ndị Ijiptu ahụn a chụrụ ndị Izrẹlụ — kẹ ẹshin ndị ahụn ile Fẹro kị lẹ ụgbọ-anyịnyan a ile kẹ ndị-agha gi ẹshin a lụ agha kẹ ndị-agha a họdụnị. Wẹ nọ kunrun wẹ ebẹhụ wẹ ziẹntọ mkpẹnrẹn Ohimin-ufie, ẹhụ Pi-Hahirọtụ, ihun Baalụ-Zẹfọnụ.

¹⁰ Ogẹn Fẹro gi nọkunmẹmẹ wẹ, ndị Izrẹlụ nọ lee ẹnya, e lee ndị Ijiptu kẹ wẹ zụnla d'e kunrun wẹ! Okẹn egun nọ tụma wẹ, wẹ nọ kpọku Osolobuẹ.

¹¹ Wẹ nọ sị Mozizi, “Ili arịdẹ alị Ijiptu haịn i gi wẹhẹ ẹnyi imẹ atụnị d'a nwụn ra? Elee ụdị eje-ihiẹn k'i mẹ ẹnyi ihiẹnni, gha alị Ijiptu wepụha ẹnyi!

¹² Ẹnyi agwan'ị tan kẹ ẹnyi rị alị Ijiptu, sị, ‘Hapụ ẹnyi ye, nị ẹnyi femẹ ndị Ijiptu’? O te ka mma nị ẹnyi rị e fe ndị Ijiptu karị nị ẹnyi a nwụntọ imẹ atụnị!”

¹³ Mozizi nọ za wẹ, sị, “Atụlẹ ni egun! Turu ni; ụnụ jẹnkọ d'a hụn nzụọpụha Osolobuẹ jẹnkọ d'a zụọpụha ụnụ tannị. Nke ndị Ijiptuni ụnụ rị a hụn tannị, ụnụ ahụnkọzị wẹ.

¹⁴ Osolobuẹ jẹnkọ d'a lụnị ụnụ ọgụn, ẹlẹ hụn ụnụ e gi ye enwẹn ụnụ nsọngbu.”

¹⁵ Ya kẹ Osolobuẹ nọ sị Mozizi, “Kị rị a kwanghọsịnị m? Sị ndị Izrẹlụ jẹnshi ihun.

¹⁶ Weshi ọkpọ ị elu zinmẹ Ohimin-Ufie n'i kewa mirin hụ, kẹni ndị Izrẹlụ gha akpakalị hụn jẹnkọ d'a pụhanị fetu Ohimin hụ.

¹⁷ M jẹnkọ d'a kpọkin obi ndị Ijiptu nị wẹ chụ ụnụ ndị Izrẹlụ ban imẹ ẹ. Ogẹn hụ, e gi m eze wụ Fẹro lẹ ndị-agha a ile nwọnrin ọghọ, uwẹ lẹ ụgbọ-anyịnyan a ndịnị ọ kị lẹ ndị-agha a bu ẹshin.

¹⁸ Ndị Ijiptu jẹnkọ d'a marịn nị mmẹ wụ Osolobuẹ ogẹn m k'e gi gi eze wụ Fẹro lẹ ụgbọ-anyịnyan a lẹ ndị-agha a bu ẹshin nwọnrin ọghọ.”

¹⁹ Ya kẹ Mmọn-ozi Osolobuẹ hụn rị ihun ndị-agha Izrẹlụ nọ nwan gha ihun wẹ pụ, shi wẹ azụụn, orukpu ahụn e duni wẹ a gha ihun wẹ pụ, shi wẹ azụụn,

²⁰ nọdị ẹgbata ndị-agha Ijiptu lẹ ndị Izrẹlụ. Uhinhin ahụn ile, orukpu hụ e ye azụụn ohu ishi, e ye azụụn hụn ẹbọ ukpẹ, hụn o gi mẹ ni itu-agha ẹbụọnị anọkunmẹni ibe wẹ uhinhin hụ ile.

²¹ Mozizi nọ nwan tịnpụ ẹka zinmẹ Ohimin ahụn, Osolobuẹ nọ gi okẹn ufere hụn gha ibe ọwụwa ẹnyanwụn bịa nu mirin Ohimin hụ shi azụụnnị lẹ azụụnnị; ufere ahụn nọ kpọ uhinhin ahụn ile, nu mirin hụ shi azụụnnị-lẹ-azụụnnị, akpakalị nọ pụha.

²² Ndị Izrẹlụ nọ gha akpakalị pụhanị fetu Ohimin ahụn, mirin hụ e turu kẹ ụsụọ-ẹjan ẹka-nni lẹ ẹka-ekpẹn.

²³ Ndị Ijiptu nọ chụ ndị Izrẹlụ, ẹshin lẹ ụgbọ-anyịnyan Fẹro lẹ ndị rị a nyannị wẹ nọ sọn ndị Izrẹlụ ban adamada Ohimin ahụn.

²⁴ Eki gini d'e fọn, Osolobuẹ nọ gha ọkụn lẹ orukpu ahụn mawuruni o gi dukọ wẹ lee itu-agha ndị Ijiptu, bu isusu cheni wẹ.

²⁵ O mẹ ụkụ ụgbọ-anyịnyan wẹ fịọpụma, nke wụnị ọ fụma wẹ ọrụn ọnyịnyan. Ndị Ijiptu nọ sị, “Nị ẹnyi lakwọnị ndị Izrẹlụ tọ! Osolobuẹ rị e gi ufiri wẹ a lụsọn ẹnyi ndị Ijiptu ọgụn.”

²⁶ Osolobuẹ nọ sị Mozizi, “Tịnpụ ẹka zinmẹ elu ohimin kẹni mirin ahụn kewanị hugbamazị, rukpumẹ ndị Ijiptu lẹ ụgbọ-anyịnyan wẹ lẹ ndị rị e nyinni wẹ.”

²⁷ Ya kẹ Mozizi nọ tịnpụ ẹka zinmẹ elu Ohimin hụ, mirin Ohimin ahụn nọ rukinmẹ, mgbe eki gi fọn, o rukinchanrịngụọ. Ndị Ijiptu e te nwanghọ nị wẹ wanahịn a, kanị Osolobuẹ nọ za wẹ ye imẹ ohimin ahụn.

²⁸ Mirin ahụn e rukin, rukpumẹ ụgbọ-anyịnyan ndị hụ lẹ ndị-agha nyinkọ ẹshin, ndị agha Fẹro ile hụn chụ ndị Izrẹlụ banye adamada ohimin ahụn. Onwọnni onyẹ ohu imẹ wẹ hụn isi pụha.

²⁹ Kanị ndị Izrẹlụ nọ gha akpakalị ahụn pụhanị fetu ohimin ahụn, mirin e turu wẹ ẹka-nni lẹ ẹka-ekpẹn nọkẹ ẹhụ-ụlọ.

³⁰ Osolobuẹ zụọpụha ndị Izrẹlụ ẹka ndị Ijiptu ụhụọhịn hụ, ndị Izrẹlụ a hụn ozun wẹ k'o fiẹnrinsọnmẹ mkpẹnrẹn mirin.

³¹ Ndị Izrẹlụ a hụn ikẹn hi-ogbe Osolobuẹ gi mẹ ndị Ijiptu ihiẹn, egun Osolobuẹ nọ tụ wẹ, wẹ nọ gi Osolobuẹ lẹ odibo ẹ wụ Mozizi dọn ẹnya.