Ọpụpụ 1 - Ika

Isi Nke Ohu Ndị Izrẹlụ A Bakẹnmẹ Imẹ Alị Ijiptu

¹ Ọnwan wụ ẹfan ụmụ Jekọpụ hụn sọn ẹ lashi alị Ijiptu, onyẹ-onyẹ lẹ ezi-lẹ-ụlọ a:

² Rubẹni, Simiọnụ, Livaị lẹ Juda;

³ Isaka, Zẹbulọnụ lẹ Bẹnjamini;

⁴ Danị lẹ Naf'tali; Gadị lẹ Asha.

⁵ Ụmụ Jekọpụ ile wụ madụ iri kwasị ọgụn ẹtọ. Josẹfụ nwa a a rịgụọlẹ Ijiptu nị wẹ d'a bịa.

⁶ Omẹgụ, Josẹfụ lẹ umunẹ ẹ lẹ agbọ hụ ile a nwụnhụn.

⁷ Kanị ụmụ wẹ, ndị Izrẹlụ, hụ a mụ ọmụmụ-ọmụmụ, a ba ụba, barahị, alị hụ nọ mẹ wẹ wẹ.

E Mẹja Wẹ Ụmụ Izrẹlụ Imẹ Alị Ijiptu

⁸ Ọ nọbe, eze ọhụn marịnlẹni Josẹfụ nọ kịma alị Ijiptu.

⁹ Ọ nọ sị ndị nke ẹ, “Lee n'ẹ, ụbanị ndị Izrẹlụ nị rị a ba a karịgụọ ẹnyi ẹka.

¹⁰ Nị ẹnyi gi ni nwan akọ-lẹ-uche sọn wẹ, amamgbe w'a bakarị ẹnịna, agha dan, a bannị wẹ ndị iṅẹnrẹn ẹnyi, sọn wẹ lụsọn ẹnyi agha, gha alịnị pụ.”

¹¹ Ya ndị Ijiptu nọ we wẹ che ẹka ndị k'a kpa wẹ kẹ igbọn kẹni wẹ gi okẹn ọrụn bịangbu wẹ. Ẹnịna kẹ ndị Izrẹlụ dọn tụnnị eze Ijiptu wụ Fẹro Pitọm lẹ Ramsisi, obodo ẹbụọ wẹ e butọ ihiẹn-oriri.

¹² Kanị, kẹ wẹ dọn rị a bịangbu ndị Izrẹlụ kẹ ndị Izrẹlụ dọn rị a bawaye, a shịshịapụ; egun ndị Izrẹlụ nọ tụma ndị Ijiptu.

¹³ Wẹ nọ gi okẹn ọrụn sọn wẹ,

¹⁴ gi okẹn ọrụn rị ichẹn-ichẹn mẹ ize elu ban wẹ, kẹ ọrụn ẹjan-lẹ-simẹnti kẹ ọrụn-ugbo, gi ẹfọ-njọ sọn wẹ ebe wẹ n'a rụn okẹn ọrụn ahụn ile.

¹⁵ Eze wụ Fẹro nọ nwan tini ikpoho ẹbụọ ndị Hibru nọ ẹka wẹ a mụ nwa iwu. Ẹfan wẹ wụ Shifra lẹ Pụa.

¹⁶ Ọ sị wẹ, “Ikpoho Hibru gha a mụ nwa ẹka ụnụ, gbu ni nwa ahụn omẹni okẹnnyẹ rọ, kanị omẹni okpoho rọ, dọnmẹn'ẹ ndụn.”

¹⁷ Kanị ikpoho ndịnị wẹ nọ ẹka wẹ a mụ nwa a tụ egun Osolobuẹ; emẹni wẹ kẹ eze dọn ku, egbuni wẹ ụmụ-ikẹnnyẹ ndị ahụn.

¹⁸ Eze nọ kpọ ikpoho ndị ahụn wẹ nọ ẹka wẹ a mụ nwa, jụ wẹ ụtaa, sị “Kị ụnụ rị e mẹni ihiẹnni? Kị haịn ụnụ gilẹni e gbu ụmụ-ikẹnnyẹ ndị ahụn?”

¹⁹ Ikpoho ndị ahụn wẹ nọ ẹka wẹ a mụ nwa nọ za eze wụ Fẹro, sị, “Ikpoho Hibru a nọnị kẹ ikpoho Ijiptu, wẹ ze eze; ndị wẹ nọ ẹka wẹ a mụ nwa gini d'a pụha, a mụgụọ wẹ.”

²⁰ Ya Osolobuẹ nọ gi ẹka rị mma sọn Shifra lẹ Pụa; ndị Izrẹlụ nkẹ nọ bawaye, bukẹmẹdẹ ọda.

²¹ Makẹni ndị ahụn wẹ nọ ẹka wẹ a mụ nwa wụ ndị a tụ egun Osolobuẹ, Osolobuẹ nọ ye wẹ ezi-lẹ-ụlọ nke wẹ.

²² Ya kẹ eze wụ Fẹro nọ nwan ye ndị nke ẹ ile iwu, sị, “Tụ nị nwa ọwụlẹ wụ okẹnnyẹ ndị Hibru k'a mụ ye imẹ Iyi Naịlị; ka dọnmẹ ni hụn ọwụlẹ wụ okpoho.”