Ọgụngụn 7 - Ika

Isi Nke Ẹsa Oyiye Ndị Wẹ Gi Ha Ọdụ-nsọ Ye Ẹka Osolobuẹ

¹ Ogẹn Mozizi gi tumẹgụ Ọdụ-nsọ, fekpugụ a udẹn-ntumẹ, dọngụ ya lẹ ihiẹn ile rị imẹ ẹ nsọ, fekpugụzị ukpo nchụn-ẹjan lẹ ihiẹn ile sọnn'ẹ udẹn, dọngụ wẹ nsọ,

² ya ndị-isi Izrẹlụ hụn wụzị ndị-isi ebọn ichẹn-ichẹn nọ wẹhẹsọnmẹni Osolobuẹ oyiye — ndịnị wụ ndị-isi ahụn kị wẹ ogẹn wẹ gi gụn wẹ ebọn-ebọn.

³ Wẹ nọ buhẹni Osolobuẹ oyiye wẹ: Trọkụ isin wẹ kpu elu wẹ lẹ okẹn-efin mmẹbụọ kẹ wẹ ile wẹhẹ: ndị-isi ẹbụọ-ẹbụọ gba wẹhẹ trọkụ ohu-ohu; onyẹ-onyẹ a kpụnhan okẹn-efin ohu-ohu. Wẹ nọ wẹhẹ wẹ ihun Ọdụ-nsọ.

⁴ Osolobuẹ nọ sị Mozizi,

⁵ “Narịn wẹ ihiẹn ndị hụ nị wẹ gi wẹ rụn ọrụn Ọdụ-ozuzu. We wẹ ye ndị Livaị kẹ ọrụn onyẹ-onyẹ dọnsọnmẹ chọ.”

⁶ Ya Mozizi nọ narịn trọkụ ndị ahụn lẹ okẹn-efin ndị hụ, we wẹ ye ndị Livaị:

⁷ o we trọkụ ẹbụọ lẹ okẹn-efin ẹnọ ye ebozo Gẹshọnụ, kẹ ọrụn wẹ dọn chọ,

⁸ o we trọkụ ẹnọ lẹ okẹn-efin ẹsatọ ye ebozo Mẹrari, kẹ ọrụn wẹ dọn chọ. Itama nwa Ẹrọnụ onyẹ nchụn-ẹjan a kị wẹ ile a rụn ọrụn.

⁹ Kanị Mozizi eyeni ebozo Kohatị hụn ọwụlẹ, makẹni uvun kẹ w'e bu ihiẹn ndị ahụn rị nsọ wẹ keye wẹ e bu.

¹⁰ Ndị-isi e wẹhẹzighọ oyiye wẹ gi ha ukpo nchụn-ẹjan ye ẹka Osolobuẹ ogẹn wẹ gi fekpu ẹ udẹn dọn ẹ nsọ. Wẹ nọ bu oyiye wẹ tọ ihun ukpo nchụn-ẹjan ebẹhụ.

¹¹ Osolobuẹ gwa Mozizi, sị, “Wẹ wẹhẹ oyiye wẹ onyẹ-isi ohu-ohu ụhụọhịn ohu-ohu, d'e gi ha ukpo nchụn-ẹjan ye m ẹka.”

¹² Onyẹ-isi hụn wẹhẹ oyiye ẹ ụhụọhịn ibuzọ wụ Nashọnụ nwa Aminadabụ, onyẹ ebọn Juda.

¹³ Ihiẹn o wẹhẹ wụ mgbadọn ohu wẹ gi akpụrụ siliva iri kwasị ọgụn-isin kpụ lẹ afẹrẹ wẹ gi akpụrụ siliva iri kwasị ọgụn-ẹtọ kpụ wẹ gi e fekpu ihiẹn. Ihiẹn wẹ gi a ma siliva Ọdụ-nsọ kẹ wẹ gi ma wẹ ẹbụbụọ; ọka wẹ gweriẹn gi ofugbọn-olivu gwọ a jun wẹ ẹbụbụọ;

¹⁴ ugbẹgbẹ goru ohu wẹ gi akpụrụ goru iri mẹmẹ hụn wẹ kpọn nsẹnsi jun;

¹⁵ okoro-efin ohu, ebulu ohu ka ẹhụ lẹ nwa-ebulu ohu rị nwa ahụa — anụ ndị wẹ sikọ d'e gi chụn ẹjan w'a dụn ọkụn;

¹⁶ mkpịn ohu w'e gi chụn ẹjan-njọ;

¹⁷ ẹjan-ekele o wẹhẹ wụ okẹn-efin ẹbụọ, ebulu isẹn ka ẹhụ, mkpịn isẹn lẹ ebulu isẹn ọzọ rị nwa ahụa ohu-ohu. Ịya kẹ Nashọnụ nwa Aminadabụ ye.

¹⁸ Nke akpọhịn ẹbụọ rịn'a, Natanẹlụ nwa Zụa, onyẹ-isi ebọn Isaka nọ wẹhẹ oyiye.

¹⁹ Ihiẹn o wẹhẹ wụ mgbadọn ohu wẹ gi akpụrụ siliva iri kwasị ọgụn-isin kpụ lẹ afẹrẹ wẹ gi akpụrụ siliva iri kwasị ọgụn-ẹtọ kpụ wẹ gi e fekpu ihiẹn. Ihiẹn wẹ gi a ma siliva Ọdụ-nsọ kẹ wẹ gi ma wẹ ẹbụbụọ; ọka wẹ gweriẹn gi ofugbọn-olivu gwọ a jun wẹ ẹbụbụọ;

²⁰ ugbẹgbẹ goru ohu wẹ gi akpụrụ goru iri mẹmẹ hụn wẹ kpọn nsẹnsi jun;

²¹ okoro-efin ohu, ebulu ohu ka ẹhụ lẹ nwa-ebulu ohu rị nwa ahụa — anụ ndị wẹ sikọ d'e gi chụn ẹjan w'a dụn ọkụn;

²² mkpịn ohu w'e gi chụn ẹjan-njọ;

²³ ẹjan-ekele o wẹhẹ wụ okẹn-efin ẹbụọ, ebulu isẹn ka ẹhụ, mkpịn isẹn lẹ ebulu isẹn ọzọ rị nwa ahụa ohu-ohu. Ịya kẹ Natanẹlụ nwa Zụa ye.

²⁴ Nke akp'ọhịn ẹtọ rịn'a, Ẹliabụ nwa Hẹlọnụ, onyẹ-isi ebọn Zẹbulọnụ nọ wẹhẹ oyiye.

²⁵ Ihiẹn o wẹhẹ wụ mgbadọn ohu wẹ gi akpụrụ siliva iri kwasị ọgụn-isin kpụ lẹ afẹrẹ wẹ gi akpụrụ siliva iri kwasị ọgụn-ẹtọ kpụ wẹ gi e fekpu ihiẹn. Ihiẹn wẹ gi a ma siliva Ọdụ-nsọ kẹ wẹ gi ma wẹ ẹbụbụọ; ọka wẹ gweriẹn gi ofugbọn-olivu gwọ a jun wẹ ẹbụbụọ;

²⁶ ugbẹgbẹ goru ohu wẹ gi akpụrụ goru iri mẹmẹ hụn wẹ kpọn nsẹnsi jun;

²⁷ okoro-efin ohu, ebulu ohu ka ẹhụ lẹ nwa-ebulu ohu rị nwa ahụa — anụ ndị wẹ sikọ d'e gi chụn ẹjan w'a dụn ọkụn;

²⁸ mkpịn ohu w'e gi chụn ẹjan-njọ;

²⁹ ẹjan-ekele o wẹhẹ wụ okẹn-efin ẹbụọ, ebulu isẹn ka ẹhụ, mkpịn isẹn lẹ ebulu isẹn ọzọ rị nwa ahụa ohu-ohu. Ịya kẹ Ẹliabụ nwa Hẹlọnụ ye.

³⁰ Nke akpọhịn ẹnọ rịn'a Ẹlizuru nwa Shẹdiọ, onyẹ-isi ebọn Rubẹni nọ wẹhẹ oyiye.

³¹ Ihiẹn o wẹhẹ wụ mgbadọn ohu wẹ gi akpụrụ siliva iri kwasị ọgụn-isin kpụ lẹ afẹrẹ wẹ gi akpụrụ siliva iri kwasị ọgụn-ẹtọ kpụ wẹ gi e fekpu ihiẹn. Ihiẹn wẹ gi a ma siliva Ọdụ-nsọ kẹ wẹ gi ma wẹ ẹbụbụọ; ọka wẹ gweriẹn gi ofugbọn-olivu gwọ a jun wẹ ẹbụbụọ;

³² ugbẹgbẹ goru ohu wẹ gi akpụrụ goru iri mẹmẹ hụn wẹ kpọn nsẹnsi jun;

³³ okoro-efin ohu, ebulu ohu ka ẹhụ lẹ nwa-ebulu ohu rị nwa ahụa — anụ ndị wẹ sikọ d'e gi chụn ẹjan w'a dụn ọkụn;

³⁴ mkpịn ohu w'e gi chụn ẹjan-njọ;

³⁵ ẹjan-ekele o wẹhẹ wụ okẹn-efin ẹbụọ, ebulu isẹn ka ẹhụ, mkpịn isẹn lẹ ebulu isẹn ọzọ rị nwa ahụa ohu-ohu. Ịya kẹ Ẹlizuru nwa Shẹdiọ ye.

³⁶ Nke akpọhịn isẹn rịn'a, Shẹlumiẹlụ nwa Zurishadaị, onyẹ-isi ebọn Simiọnụ nọ wẹhẹ oyiye.

³⁷ Ihiẹn o wẹhẹ wụ mgbadọn ohu wẹ gi akpụrụ siliva iri kwasị ọgụn-isin kpụ lẹ afẹrẹ wẹ gi akpụrụ siliva iri kwasị ọgụn-ẹtọ kpụ wẹ gi e fekpu ihiẹn. Ihiẹn wẹ gi a ma siliva Ọdụ-nsọ kẹ wẹ gi ma wẹ ẹbụbụọ; ọka wẹ gweriẹn gi ofugbọn-olivu gwọ a jun wẹ ẹbụbụọ;

³⁸ ugbẹgbẹ goru ohu wẹ gi akpụrụ goru iri mẹmẹ hụn wẹ kpọn nsẹnsi jun;

³⁹ okoro-efin ohu, ebulu ohu ka ẹhụ lẹ nwa-ebulu ohu rị nwa ahụa — anụ ndị wẹ sikọ d'e gi chụn ẹjan w'a dụn ọkụn;

⁴⁰ mkpịn ohu w'e gi chụn ẹjan-njọ;

⁴¹ ẹjan-ekele o wẹhẹ wụ okẹn-efin ẹbụọ, ebulu isẹn ka ẹhụ, mkpịn isẹn lẹ ebulu isẹn ọzọ rị nwa ahụa ohu-ohu. Ịya kẹ Shẹlumiẹlụ nwa Zurishadaị ye.

⁴² Nke akp'ọhịn isin rịn'a, Ẹliasafụ nwa Dewuẹlụ, onyẹ-isi ebọn Gadị nọ wẹhẹ oyiye.

⁴³ Ihiẹn o wẹhẹ wụ mgbadọn ohu wẹ gi akpụrụ siliva iri kwasị ọgụn-isin kpụ lẹ afẹrẹ wẹ gi akpụrụ siliva iri kwasị ọgụn-ẹtọ kpụ wẹ gi e fekpu ihiẹn. Ihiẹn wẹ gi a ma siliva Ọdụ-nsọ kẹ wẹ gi ma wẹ ẹbụbụọ; ọka wẹ gweriẹn gi ofugbọn-olivu gwọ a jun wẹ ẹbụbụọ;

⁴⁴ ugbẹgbẹ goru ohu wẹ gi akpụrụ goru iri mẹmẹ hụn wẹ kpọn nsẹnsi jun;

⁴⁵ okoro-efin ohu, ebulu ohu ka ẹhụ lẹ nwa-ebulu ohu rị nwa ahụa — anụ ndị wẹ sikọ d'e gi chụn ẹjan w'a dụn ọkụn;

⁴⁶ mkpịn ohu w'e gi chụn ẹjan-njọ;

⁴⁷ ẹjan-ekele o wẹhẹ wụ okẹn-efin ẹbụọ, ebulu isẹn ka ẹhụ, mkpịn isẹn lẹ ebulu isẹn ọzọ rị nwa ahụa ohu-ohu. Ịya kẹ Ẹliasafụ nwa Dewuẹlụ ye.

⁴⁸ Nke akp'ọhịn ẹsa rịn'a, Ẹlishama nwa Amihudu, onyẹ-isi ebọn Ifrem nọ wẹhẹ oyiye.

⁴⁹ Ihiẹn o wẹhẹ wụ mgbadọn ohu wẹ gi akpụrụ siliva iri kwasị ọgụn-isin kpụ lẹ afẹrẹ wẹ gi akpụrụ siliva iri kwasị ọgụn-ẹtọ kpụ wẹ gi e fekpu ihiẹn. Ihiẹn wẹ gi a ma siliva Ọdụ-nsọ kẹ wẹ gi ma wẹ ẹbụbụọ; ọka wẹ gweriẹn gi ofugbọn-olivu gwọ a jun wẹ ẹbụbụọ;

⁵⁰ ugbẹgbẹ goru ohu wẹ gi akpụrụ goru iri mẹmẹ hụn wẹ kpọn nsẹnsi jun;

⁵¹ okoro-efin ohu, ebulu ohu ka ẹhụ lẹ nwa-ebulu ohu rị nwa ahụa — anụ ndị wẹ sikọ d'e gi chụn ẹjan w'a dụn ọkụn;

⁵² mkpịn ohu w'e gi chụn ẹjan-njọ;

⁵³ ẹjan-ekele o wẹhẹ wụ okẹn-efin ẹbụọ, ebulu isẹn ka ẹhụ, mkpịn isẹn lẹ ebulu isẹn ọzọ rị nwa ahụa ohu-ohu. Ịya kẹ Ẹlishama nwa Amihudu ye.

⁵⁴ Nke akpọhịn ẹsatọ rịn'a, Gamaliẹlụ nwa Pẹdazọ, onyẹ-isi ebọn Manasẹ nọ wẹhẹ oyiye:

⁵⁵ Ihiẹn o wẹhẹ wụ mgbadọn ohu wẹ gi akpụrụ siliva iri kwasị ọgụn-isin kpụ lẹ afẹrẹ wẹ gi akpụrụ siliva iri kwasị ọgụn-ẹtọ kpụ wẹ gi e fekpu ihiẹn. Ihiẹn wẹ gi a ma siliva Ọdụ-nsọ kẹ wẹ gi ma wẹ ẹbụbụọ; ọka wẹ gweriẹn gi ofugbọn-olivu gwọ a jun wẹ ẹbụbụọ;

⁵⁶ ugbẹgbẹ goru ohu wẹ gi akpụrụ goru iri mẹmẹ hụn wẹ kpọn nsẹnsi jun;

⁵⁷ okoro-efin ohu, ebulu ohu ka ẹhụ lẹ nwa-ebulu ohu rị nwa ahụa — anụ ndị wẹ sikọ d'e gi chụn ẹjan w'a dụn ọkụn;

⁵⁸ mkpịn ohu w'e gi chụn ẹjan-njọ;

⁵⁹ ẹjan-ekele o wẹhẹ wụ okẹn-efin ẹbụọ, ebulu isẹn ka ẹhụ, mkpịn isẹn lẹ ebulu isẹn ọzọ rị nwa ahụa ohu-ohu. Ịya kẹ Gamaliẹlụ nwa Pẹdazọ ye.

⁶⁰ Nke akp'ọhịn itenẹi rịn'a, Abidanị nwa Gidiọni onyẹ-isi ebọn Bẹnjamini nọ wẹhẹ oyiye.

⁶¹ Ihiẹn o wẹhẹ wụ mgbadọn ohu wẹ gi akpụrụ siliva iri kwasị ọgụn-isin kpụ lẹ afẹrẹ wẹ gi akpụrụ siliva iri kwasị ọgụn-ẹtọ kpụ wẹ gi e fekpu ihiẹn. Ihiẹn wẹ gi a ma siliva Ọdụ-nsọ kẹ wẹ gi ma wẹ ẹbụbụọ; ọka wẹ gweriẹn gi ofugbọn-olivu gwọ a jun wẹ ẹbụbụọ;

⁶² ugbẹgbẹ goru ohu wẹ gi akpụrụ goru iri mẹmẹ hụn wẹ kpọn nsẹnsi jun;

⁶³ okoro-efin ohu, ebulu ohu ka ẹhụ lẹ nwa-ebulu ohu rị nwa ahụa — anụ ndị wẹ sikọ d'e gi chụn ẹjan w'a dụn ọkụn;

⁶⁴ mkpịn ohu w'e gi chụn ẹjan-njọ;

⁶⁵ ẹjan-ekele o wẹhẹ wụ okẹn-efin ẹbụọ, ebulu isẹn ka ẹhụ, mkpịn isẹn lẹ ebulu isẹn ọzọ rị nwa ahụa ohu-ohu. Ịya kẹ Abidanị nwa Gidiọni ye.

⁶⁶ Nke akp'ọhịn iri rịn'a, Ahiẹza nwa Amishadaị, onyẹ-isi ebọn Danị, nọ wẹhẹ oyiye.

⁶⁷ Ihiẹn o wẹhẹ wụ mgbadọn ohu wẹ gi akpụrụ siliva iri kwasị ọgụn-isin kpụ lẹ afẹrẹ wẹ gi akpụrụ siliva iri kwasị ọgụn-ẹtọ kpụ wẹ gi e fekpu ihiẹn. Ihiẹn wẹ gi a ma siliva Ọdụ-nsọ kẹ wẹ gi ma wẹ ẹbụbụọ; ọka wẹ gweriẹn gi ofugbọn-olivu gwọ a jun wẹ ẹbụbụọ;

⁶⁸ ugbẹgbẹ goru ohu wẹ gi akpụrụ goru iri mẹmẹ hụn wẹ kpọn nsẹnsi jun;

⁶⁹ okoro-efin ohu, ebulu ohu ka ẹhụ lẹ nwa-ebulu ohu rị nwa ahụa — anụ ndị wẹ sikọ d'e gi chụn ẹjan w'a dụn ọkụn;

⁷⁰ mkpịn ohu w'e gi chụn ẹjan-njọ;

⁷¹ ẹjan-ekele o wẹhẹ wụ okẹn-efin ẹbụọ, ebulu isẹn ka ẹhụ, mkpịn isẹn lẹ ebulu isẹn ọzọ rị nwa ahụa ohu-ohu. Ịya kẹ Ahiẹza nwa Amishadaị ye.

⁷² Nke akp'ọhịn mmanaị rịn'a, Pagiẹlụ nwa Ọkranị, onyẹ-isi ebọn Asha nọ wẹhẹ oyiye.

⁷³ Ihiẹn o wẹhẹ wụ mgbadọn ohu wẹ gi akpụrụ siliva iri kwasị ọgụn-isin kpụ lẹ afẹrẹ wẹ gi akpụrụ siliva iri kwasị ọgụn-ẹtọ kpụ wẹ gi e fekpu ihiẹn. Ihiẹn wẹ gi a ma siliva Ọdụ-nsọ kẹ wẹ gi ma wẹ ẹbụbụọ; ọka wẹ gweriẹn gi ofugbọn-olivu gwọ a jun wẹ ẹbụbụọ;

⁷⁴ ugbẹgbẹ goru ohu wẹ gi akpụrụ goru iri mẹmẹ hụn wẹ kpọn nsẹnsi jun;

⁷⁵ okoro-efin ohu, ebulu ohu ka ẹhụ lẹ nwa-ebulu ohu rị nwa ahụa — anụ ndị wẹ sikọ d'e gi chụn ẹjan w'a dụn ọkụn;

⁷⁶ mkpịn ohu w'e gi chụn ẹjan-njọ;

⁷⁷ ẹjan-ekele o wẹhẹ wụ okẹn-efin ẹbụọ, ebulu isẹn ka ẹhụ, mkpịn isẹn lẹ ebulu isẹn ọzọ rị nwa ahụa ohu-ohu. Ịya kẹ Pagiẹlụ nwa Ọkranị ye.

⁷⁸ Nke akpọhịn mmẹbụọ rịn'a, Ahira nwa Ẹnanị, onyẹ-isi ebọn Naf'tali, nọ wẹhẹ oyiye.

⁷⁹ Ihiẹn o wẹhẹ wụ mgbadọn ohu wẹ gi akpụrụ siliva iri kwasị ọgụn-isin kpụ lẹ afẹrẹ wẹ gi akpụrụ siliva iri kwasị ọgụn-ẹtọ kpụ wẹ gi e fekpu ihiẹn. Ihiẹn wẹ gi a ma siliva Ọdụ-nsọ kẹ wẹ gi ma wẹ ẹbụbụọ; ọka wẹ gweriẹn gi ofugbọn-olivu gwọ a jun wẹ ẹbụbụọ;

⁸⁰ ugbẹgbẹ goru ohu wẹ gi akpụrụ goru iri mẹmẹ hụn wẹ kpọn nsẹnsi jun;

⁸¹ okoro-efin ohu, ebulu ohu ka ẹhụ lẹ nwa-ebulu ohu rị nwa ahụa — anụ ndị wẹ sikọ d'e gi chụn ẹjan w'a dụn ọkụn;

⁸² mkpịn ohu w'e gi chụn ẹjan-njọ;

⁸³ ẹjan-ekele o wẹhẹ wụ okẹn-efin ẹbụọ, ebulu isẹn ka ẹhụ, mkpịn isẹn lẹ ebulu isẹn ọzọ rị nwa ahụa ohu-ohu. Ịya kẹ Ahira nwa Ẹnanị ye.

⁸⁴ Oyiye ile ndị-isi Izrẹlụ ye wẹ gi ha ukpo nchụn-ẹjan ye ẹka Osolobuẹ ogẹn wẹ gi fekpu ẹ udẹn-ntumẹ wụ mgbadọn mmẹbụọ wẹ gi siliva kpụ, afẹrẹ mmẹbụọ wẹ gi siliva kpụ wẹ gi e fekpu ihiẹn lẹ ugbẹgbẹ mmẹbụọ wẹ gi goru kpụ:

⁸⁵ akpụrụ siliva iri kwasị ọgụn isin kẹ wẹ wẹ gi kpụ mgbadọn ohu-ohu; nke afẹrẹ wẹ gi e fekpu ihiẹn wụ ohu-ohu akpụrụ siliva iri kwasị ọgụn-ẹtọ. Wẹ ile wụ akpụrụ siliva nnụ-isin. Ihiẹn wẹ gi a ma siliva imẹ Ọdụ-nsọ kẹ wẹ gi ma wẹ;

⁸⁶ ugbugbẹ goru mmẹbụọ wẹ kpọnjun nsẹnsi, hụn we gi akpụrụ goru iri-iri kpụ — wẹ ma kẹ goru Ọdụ-nsọ: akpụrụ goru ọgụn-isin kẹ wẹ gi kpụ wẹ ile.

⁸⁷ Anụ ile wẹ wẹhẹ nị wẹ gi chụn ẹjan w'a dụn ọkụn wụ okorọbịa efin mmẹbụọ, ebulu mmẹbụọ ka ẹhụ, ụmụ-ebulu mmẹbụọ rịsọnmẹ ahụa ohu-ohu, cheni oyiye ọka lẹzi mkpịn mmẹbụọ wẹ sikọ d'e gi chụn ẹjan-njọ.

⁸⁸ Anụ ile wẹ gi chụn ẹjan ekele wụ okẹn-efin ẹnọ kwasị ọgụn, ebulu ọgụn-ẹtọ ka ẹhụ, mkpịn ọgụn-ẹtọ lẹ ụmụ ebulu ọgụn-ẹtọ rịsọnmẹ ahụa ohu-ohu. Uwẹ wụ oyiye wẹ gi ha ukpo nchụn-ẹjan ye ẹka Osolobuẹ ogẹn wẹ gi fekpugụ a udẹn-nsọ.

⁸⁹ Ogẹn Mozizi gi banye Ọdụ-ozuzu d'e sọn Osolobuẹ ku, ọ nọ nụ olu ẹ k'ọ gha elu okun Ẹkpẹti Ashịa-ẹri ahụn, ẹgbata ndị chẹrobu ẹbụọ hụ, a gwa a oku. Ọ nọ sọn ẹ ku.