Ọgụngụn 15 - Ika

Isi Nke Mmisẹn Iwu Gbashịarị Oyiye

¹ Osolobuẹ sị Mozizi,

² “Gwa ndị Izrẹlụ, sị wẹ: Lee ni iwu ụnụ sikọ d'e sọn ụnụ bangụ alị ahụn m rị e ye ụnụ nị ụnụ biri,

³ omẹni ụnụ rị e ye Osolobuẹ ẹjan wẹ gi ọkụn e ye ẹ nị ishin ẹ sụọ a, ọsụọn'a efin mọbụ atụnrụn mọbụ ewu rọ, ọsụọn'a ẹjan w'a dụn ọkụn mọbụ ẹjan ọzọ rọ; kẹ hụn ụnụ gi e mẹzu nkwa pụ-ichẹn ụnụ kwe Osolobuẹ kẹ oyiye ghapụha ịhịan obi rọ kẹ oyiye ụnụ gi e mẹ mmẹmmẹ ahụa-ahụa ndị ụnụ gi e fe m rọ — hụn ọwụlẹ ọ wụ,

⁴ onyẹ hụn welanị Osolobuẹ ya sikọ d'e werizi ọka-witi wẹ gweriẹn hụn k'e jun mkpu kọstadị-nta ẹbụọ cheni anụ ọ wela — o k'a wụ ọka-witi wẹ gi ofugbọn-olivu k'e jun mkpu kọstadị ohu gwọ; o k'e gi wẹ ye Osolobuẹ oyiye-ọka.

⁵ E we ni manya k'e jun mkpu kọstadị e chesọnmẹni ebulu ohu-ohu ụnụ gi a chụn ẹjan w'a dụn ọkụn mọbụ ẹjan ndị-ọzọ, n'ọ wụrụ oyiye-manya.

⁶ “Wezini ọka wẹ gweriẹn k'e jun mkpu kọstadị ẹnọ lẹ nkirishi cheni ebulu ọwụlẹ — ọka wẹ gweriẹn gi ofugbọn-olivu k'e jun mkpu kọstadị ohu lẹ nkirishi gwọ

⁷ wezi ni oyiye-manya chen'ẹ, manya k'e jun mkpu kọstadị ohu lẹ nkirishi, ụnụ e gi wẹ ile chụnyeni Osolobuẹ ẹjan hụn ishin ẹ a sụọ a.

⁸ “Ụnụ welanị okoro efin d'a chụnyeni Osolobuẹ ẹjan w'a dụn ọkụn mọbụ ẹjan ndị ọzọ, mọbụ ẹjan ụnụ gi e mẹzu nkwa pụ-ichẹn ụnụ kwe ẹ mọbụ ẹjan-ekele,

⁹ weri ni oyiye-ọka chen'ẹ — ọka wẹ gweriẹn k'e jun ihiẹn nọkẹ mkpu-kọstadị nta isin lẹ nkirishi hụn wẹ gi ofugbọn-olivu k'e jun mkpu kọstadị ẹbụọ gwọ;

¹⁰ ụnụ e wezi oyiye-manya k'e jun mkpu-kọstadị nta ẹbụọ chen'ẹ. O k'a wụrụ oyiye wẹ gi ọkụn ye, ẹjan hụn ishin ẹ a sụọ Osolobuẹ.

¹¹ Ẹrịra kẹ w'e dọn e mẹ efin mọbụ ebulu lẹ nwa-atụnrụn mọbụ nwa-ewu ọwụlẹ.

¹² Anụ ole ọwụlẹ ụnụ e gi chụn ẹjan, mẹ ni hụn ọwụlẹ imẹ wẹ ẹrịra.

¹³ “Nwa-di-alị Izrẹlụ ọwụlẹ k'a gha e mẹ ihiẹn ndịnị ọ gha e ye Osolobuẹ oyiye wẹ gi ọkụn e ye hụn ishin ẹ sikọ d'a sụọ Osolobuẹ.

¹⁴ Agbọ ile rị ihun, abịamabịa mọbụ onyẹ ọzọ hụn bi imẹ igunrun ụnụ gha e ye Osolobuẹ oyiye wẹ gi ọkụn e ye hụn ishin ẹ k'a sụọ Osolobuẹ, o k'e mẹchanrịnkwọ a kẹ ụnụ dọn e mẹ ẹ.

¹⁵ Iwu ohu kẹ ụnụ lẹ abịamabịa bi imẹ igunrun ụnụ k'a gha e gi e bi — ẹrịra k'o sikọ d'a rịferi. Ụnụ lẹ abịamabịa k'a wụ ohu ẹnya Osolobuẹ.

¹⁶ Iwu ohu lẹ usọnrọn ohu k'a rịnị kẹ ụnụ kẹ abịamabịa bi imẹ igunrun ụnụ.”

¹⁷ Osolobuẹ sị Mozizi,

¹⁸ “Gwa ndị Izrẹlụ, sị wẹ: Ụnụ banye alị ahụn hụn m rị e ye ụnụ,

¹⁹ ụnụ jẹnkọnị d'e ri ihiẹn gha alị ahụn pụha, weberi ni gi ye Osolobuẹ oyiye.

²⁰ Gha nị imẹ ọka ibuzọ ụnụ sikọ d'e gweriẹn weri gi mẹmẹ donọtụ, ụnụ a wẹhẹni Osolobuẹ ya kẹ ụnụ dọn a tụn'a ọka ụnụ kụkpọgụ ọka.

²¹ Agbọ ụnụ ile lalanị, e weberi ni ọka ibuzọ ụnụ gweriẹn a tụnị Osolobuẹ.

Ẹjan Njọ Wẹ Kpachanpụlẹni Ẹnya Mẹ

²² “Ụnụ dan iwu ọwụlẹ imẹ iwu ndịnị Osolobuẹ ye Mozizi bụ ụnụ akpachanpụnị ẹnya mẹ ẹ —

²³ iwu ọwụlẹ imẹ ndị Osolobuẹ ye Mozizi ye ụnụ, gha ụhụọhịn o ye Mozizi ya ye ụnụ d'e ru agbọ ile lalanị —

²⁴ ụnụ dan a bụ onwọnni onyẹ rị imẹ igunrun ụnụ ẹnya a ru, ụnụ akpachanpụnị ẹnya mẹ ẹ, alị ile jẹnkọ d'e wẹhẹ okoro-efin d'e ye oyiye wẹ gi ọkụn e ye n'ọ wụrụ oyiye hụn ishin ẹ a sụọ Osolobuẹ — ịya lẹ oyiye-ọka a lẹ oyiye manya w'e wechen'ẹ lẹ mkpịn wẹ k'e gi chụn ẹjan-njọ.

²⁵ Onyẹ nchụn-ẹjan sikọ d'e gi wẹ chụn ẹjan gi gbarị isi ndị Izrẹlụ ile, Osolobuẹ a gbagharị wẹ, makẹni ẹlẹ wẹ kpachanpụ ẹnya mẹ ẹ lẹni e gigụọ wẹ ufiri mmẹfie wẹ wẹhẹni Osolobuẹ oyiye w'a dụn ọkụn lẹ ẹjan-njọ.

²⁶ Osolobuẹ k'a gbagharị ndị Izrẹlụ ile lẹ abịamabịa bi imẹ igunrun wẹ, ebe o mẹ ni ẹka ịhịan ile a rịọlẹ imẹ njọ hụ wẹ kpachanpụlẹni ẹnya mẹ.

²⁷ “Kanị omẹni onyẹ ohu sụọ rọ, o k'e wẹhẹ onyẹnnyẹ-ewu ahụa ohu d'e gi chụn ẹjan-njọ.

²⁸ Onyẹ nchụn ẹjan k'a nọ ihun Osolobuẹ chụnnị onyẹ ahụn kachanpụlẹni ẹnya mẹ njọ ẹjan gi gbarị isi ẹ. Wẹ gbarịgụ isi ẹ, Osolobuẹ a gbagharị a.

²⁹ Iwu ohuni rịnị onyẹ ọwụlẹ kachanpụlẹni ẹnya mẹ njọ, kẹ nwa di-alị Izrẹlụ kẹ abịamabịa.

³⁰ “Kanị onyẹ ọwụlẹ kachanpụ ẹnya dan iwu ndịnị, ọsụọn'a nwa di-alị Izrẹlụ, ọsụọn'a abịamabịa, onyẹ ahụn a kparigụọ Osolobuẹ. Wẹ k'e bepụrịrị onyẹ ahụn imẹ ndị nke ẹ.

³¹ Ebe o mẹ ni o legberigụọ oku Osolobuẹ, mẹ ihiẹn ọ sị wẹ emẹlẹ, wẹ k'e bepụrịrị onyẹ ahụn; o k'e gi isi ẹ buru ihiẹn o mẹ.”

E Gbu Wẹ Onyẹ Dan Iwu Izu-Ikẹn

³² Ogẹn ndị Izrẹlụ gi rị imẹ alị ọkpọ-nkụn, wẹ nọ nwụn okẹnnyẹ ohu ebe ọ rị a kpa nkụn Ụhụọhịn izu-ikẹn.

³³ Ndị nwụnn'a k'ọ rị a kpa nkụn nọ wẹhẹni Mozizi lẹ Ẹrọnụ lẹ igunrun ahụn ile ya;

³⁴ wẹ nọ kpọkin ẹ ye, makẹni ihiẹn wẹ k'e m'ẹ eke we wẹ ẹnya.

³⁵ Ya kẹ Osolobuẹ nọ sị Mozizi, “Okẹnnyẹni k'a nwụnrịrị. Ịhịan ile sikọ d'a nọ ebe ịhịan bilẹni magbu ẹ.”

³⁶ Ya wẹ nọ gha ebe wẹ ile ziẹntọ wepụ a d'a magbu nọkẹ kẹ Osolobuẹ dọn gwa Mozizi.

Tasẹlụ Hụn Rị Ntịn Ẹwuru

³⁷ Osolobuẹ sị Mozizi,

³⁸ “Sị ndị Izrẹlụ, ‘Agbọ ụnụ ile, ụnụ k'a gha e mẹmẹ tasẹlụ wụ ịyọmịyọ ẹkwa e ye mpịnpịn ẹwuru ụnụ azụụnnị lẹ azụụnnị. Oruru e nwun bru k'a rị tasẹlụ rị azụụnnị lẹ hụn rị azụụnnị.

³⁹ Tasẹlụ ndịnị wẹ kẹ ụnụ k'a gha e lee kẹni ụnụ hụn ụzọ a nyanhan ihiẹn ile Osolobuẹ ku, nị ụnụ hụn ụzọ e mẹ wẹ, makẹ ụnụ gha a gbakịtọ m azụụn, mẹsọnmẹ ihiẹn rị ụnụ obi lẹ ihiẹn ndị hụ a la ụnụ ẹnya nọkẹ ndị ughẹrẹ.

⁴⁰ Kẹni ụnụ a nyanhan e mẹ ihiẹn ndị m sị ụnụ e mẹ, bu enwẹn ụnụ tọnị Osolobuẹ ụnụ.

⁴¹ Mmẹ wụ Osolobuẹ wụ Chuku ụnụ hụn gha alị Ijiptu wepụha ụnụ, kẹni m wụrụ Chuku ụnụ. Mmẹ wụ Osolobuẹ hụn wụ Chuku ụnụ.’ ”