Nehemiah 4 - Ika

Isi Nke Ẹnọ E Yemẹ Wẹ Ndị Rị Ọrụn Hụ Nsọngbu

¹ Makẹni Sanbalatị nụ nị ẹnyi rị e dọnzi mgbọn hụ, iwe hụ e we ẹ, ọ hụ e bu olulu, e gi ndị Ju a mụ ẹmụ.

² Ihun ibe wẹ lẹ ndị-agha Sameria, ọ sị, “Kịnị kẹ ndị Ju ndịnị zelẹni rịdẹ e mẹ? Wẹ ro nị wẹ k'a sa ẹka dọnzi mgbọn wẹ? Wẹ ro nị wẹ chụnyenihụ Chuku ẹjan, mgbọn a nị wẹ rụn? Wẹ rodẹ nwan nị ọrụn akp'ọhịn rọ ra? Ọmụma ndị hụ wẹ rị e weri mkpọkọ mgbọn kẹ wẹ k'e gidẹ nwan tụn a ra, ọmụma dụngụ ọkụn?”

³ Tobaya onyẹ Amọnụ hụn ya lẹ ịya rị hụ a sị, “Ihiẹn nwẹn wẹ rị a tụn, ufu mmaka nyinrin ẹ hụ, o tikpọpụ mgbọn hụ wẹ sị wẹ rị e gi ọmụma a tụn!”

⁴ Euu Osolobuẹ ẹnyi, nụ olu ẹnyi, nị wẹ rị e lelịa ẹnyi. Mẹ ụya wẹ rị e ye ẹnyi nọ isi wẹ bi! We wẹ ye ndị-iṅẹnrẹn wẹ kpụnshi alị ọzọ!

⁵ Ekpumẹlẹ njọ wẹ! Efinchanpụlẹ njọ wẹ, n'ị hụn ụzọ a nyanhan e gi ẹ e sọn wẹ, makẹni a kparikẹ wẹ ndị rị a rụn mgbọn hụ.

Nsọngbu Ichẹn-ichẹn Kunrunni Wẹ

⁶ Ẹnyi nọ dọnzisọnmẹ mgbọn hụ, tụnkinchanrịn oghe ile rịn'a, tụnshi ẹ elu d'e ru ahanmahan a — makẹni ndị alị wepụha obi wẹ ile rụn ọrụn.

⁷ Kanị, ogẹn Sanbalatị lẹ Tobaya lẹ ndị Arabụ lẹ ndị Amọnụ lẹ ndị Ash'dọdụ gi nụ nị ẹnyi hụkwọ e dọnzi mgbọn Jerusalẹm hụ, nị ẹnyi hụ a tụnkinsọnmẹ oghe rịn'a, iwe nọ we wẹ ọda-ọda.

⁸ Wẹ ile nọ zuni ẹnyi umẹ ni wẹ bịa d'a lụsọn Jerusalẹm ọgụn lẹ ni wẹ se isusu ye imẹ ẹ.

⁹ Kanị ẹnyi nọ mẹ ekpere, kpọku Chuku ẹnyi; ẹnyi nọ tumẹsọnmẹ ndị k'e che nche efinnaị lẹ uhinhin, cheri wẹ.

¹⁰ Imẹ Jerusalẹm, ndị Juda hụ a sị, “Ndụn a gụmagụọ ndị rị a rụn ọrụn, bụ mkpo-mkpo wẹ sikọ d'a kwa e bukẹ; ẹnyi asakọkwọ ẹka dọnzigụ mgbọnni.”

¹¹ Ndị iṅẹnrẹn ẹnyi hụ a sị, “Wẹ gini d'a marịndẹ ihiẹn rị e mẹni mọbụ hụn ẹnyi, ẹnyi a mayegụọ wẹ, gbu wẹ, kụsị ọrụn hụ.”

¹² Ndị Ju bikunmẹ ndị-iṅẹnrẹn ẹnyi a bịakarịọlẹ mgbe iri, a sị ẹnyi, “Ebe lẹ ebe ụnụ e dọnlẹ ihun, wẹ jẹnkọ d'a gha ebẹhụ maye ẹnyi.”

¹³ Ufiri ẹ, m nọ zi ụfọdụ shi mgbọn ahụn d'e chemẹ nche ebe ile kachanrịn alị a lụa, ebe ile alị aradan rị. E dọnmẹsọnmẹ wẹ onyẹ lẹ ezi-lẹ-ụlọ a, onyẹ lẹ ezi-lẹ-ụlọ a; onyẹ onyẹ nọ buru ọpịa-agha lẹ obo lẹ ụta.

¹⁴ A hụngụ m kẹ ihiẹn ile nọ, m nọ kpọ ndị-isi ndị Ju lẹ ndị-isi ọrụn gọmẹnti rị Juda lẹ ndị họdụnị oku, sị wẹ, “Atụlẹ ni egun wẹ. Nyanhan nị Osolobuẹ, Onyẹ ahụn kanị, Onyẹ ahụn w'a tụ egun ẹ, kẹni ụnụ sa ẹka lụ ọgụn chemẹ umunẹ ụnụ lẹ ụmụ ụnụ ikẹnnyẹ lẹ ikpoho lẹ inyẹnmẹ ụnụ lẹ ụlọ ụnụ bi.”

¹⁵ Ogẹn ndị-iṅẹnrẹn ẹnyi gi nụ nị ẹnyi a marịnghọ ihiẹn wẹ romẹ, lẹni Osolobuẹ a kpayịyagụọ a, ẹnyi nọ kinzi d'a rụnma mgbọn ẹnyi rị a rụn, onyẹ-onyẹ lẹ ọrụn a.

¹⁶ Gha ụhụọhịn hụ jẹnmẹ m nọ kebe ndị rị okpuru m ụzọ ẹbụọ: azụụn ohu hụ a rụn mgbọn hụ, azụụn hụn ẹbọ e burusọnmẹ obo, akpaịn lẹ ụta, yirisọnmẹ ẹwuru-igwe, e che nche. Ndị-isi ọrụn gọmẹnti rị alị Juda hụ a kwadọn ndị Juda ile

¹⁷ rị e dọnzi mgbọn hụ. Ndị hụn rị e bu ihiẹn wẹ gi a rụn ọrụn ahụn gi ẹka ohu e bu ihiẹn wẹ rị e bu, gi hụn ẹbọ kwọndọn ihiẹn-ọgụn.

¹⁸ Onyẹ-onyẹ imẹ ndị rị a rụn ọrụn bu ọpịa-agha ukun, a rụn ihiẹn ọ rị a rụn; e bu m onyẹ hụn e gbu opi-agha che ẹhụ m.

¹⁹ M nọ nwan sị ndị-isi ndị Ju lẹ ndị-isi ọrụn gọmẹnti rị Juda lẹ ndị họdụnị, “Ọrụn ẹnyi sikọ d'a rụn e hikẹ; ebe ẹnyi rị a rụn shịa ashịa; ẹgbata ẹnyi lẹ ibe ẹnyi elu mgbọnni e tekẹ.

²⁰ Ụnụ nụhụ kẹ opi han, gbashi ni ebe ọ rị a han. Chuku ẹnyi sikọ d'a lụnị ẹnyi ọgụn!”

²¹ Ẹnyi nọ rụnsọnmẹ ọrụn hụ, ahanmahan ndị rị a rụnnị e bu obo ẹka ogẹn ile, gha mgbe eki fọn d'e ru ni kokisẹ a pụha.

²² Ogẹn ahụn, m sị ndị Juda, “Onyẹ ọwụlẹ lẹ ndị ya lẹ wẹ gba a rụn wẹ ranhịnma imẹ Jerusalẹm, kẹni w'e che ni ẹnyi nche imẹ uhinhin, a rụn ọrụn efinaị.”

²³ Kẹ mmẹ kẹ umunẹ m ikẹnnyẹ kẹ ndị rị okpuru m kẹ ndị nche ahụn sọnhẹnni m, onwọnni onyẹ gbụpụ ẹwuru ẹ; onyẹ-onyẹ bu ihiẹn-ọgụn a ogẹn ile, ọsụọn'a nị wẹ rị a ra mirin.