Ndị Tẹsalonika Ibuzọ 3 - Ika

Isi Nke Ẹtọ Ọ Rịnị Ụka Mma, Ndụn A Ban Ndị-isi Wẹ

¹ Ebe omẹni ẹnyi asazịnị ẹka din ẹ, ẹnyi nọ sị nị ẹnyi sụọ gwarị nọdị imẹ Atẹnsi,

² ẹnyi nọ zihẹni ụnụ Timoti nwẹnẹ ẹnyi hụn ẹnyi lẹ ịya gba a rụnnị Osolobuẹ ọrụn izisọnmẹ oziọma Kraịstị, sị a d'a dụ ẹjan ye ụnụ ukun, gba ụnụ umẹ nị ụnụ kwọnkẹnmẹ okukwe ụnụ —

³ amamgbe ukpokpo ndịnị gha e mẹhunmẹ onyẹ ọwụlẹ imẹ ụnụ. Ụnụ lẹ enwẹn ụnụ a marịnghọ nke-esi nị ukpokpo ndịnị k'a bịarịrịnị ẹnyi imẹ Kraịstị.

⁴ Ẹnyi a gwadẹ ụnụ ya ogẹn ile kẹ ẹnyi lẹ ụnụ rị, nị wẹ jẹnkọ d'e kpokpo ẹnyi. Ụnụ a marịnghọ n'o mẹọlẹ nwan kẹ ẹnyi dọn gwa ụnụ.

⁵ Ufiri ẹ, makẹni ọ nịzịnị m din, m nọ zi ozi nị m marịn kẹ okukwe ụnụ nọ, amamgbe, ọ wụrụ nị onyẹ-ọnwụnwan a nwangụọ ụnụ, ihiẹn ẹnyi rụn a la iwi.

⁶ Hụnnị Timoti ghagụ nwan azụụn nke ụnụ lụaha, wẹhẹni ẹnyi ozi rị mma, nị okukwe ụnụ lẹ ihiẹn-ọsụsụọ ụnụ hụ mma; nị ụnụ hụ a nyanhan ẹnyi ọhụnma-ọhụnma ogẹn ile lẹ ni ẹnyi hụ a da ụnụ kẹ ụnụ dọn rị a da ẹnyi;

⁷ umunẹ, ụnụ e gigụọ nwan okukwe ụnụ kasị ẹnyi obi imẹ nsọngbu lẹ ukpokpo ile ẹnyi rị imẹ ẹ.

⁸ Ndụn a bangụọ nwan ẹnyi — ebe o mẹ ni ụnụ turuhụ ọhụnma-ọhụnma imẹ Di-nwọnni-ẹnyi.

⁹ Euu, nị ẹnyi sa nwan ẹka kpanmịngụ Osolobuẹ yeni ụnụ lẹ ịghọghọnị ile ẹnyi rị e nwọn ihun Osolobuẹ, o gi mẹ ụnụ wuzo ẹnịna imẹ Kraịstị?!

¹⁰ Ẹnyi e mẹshi ekpere ikẹn uhinhin lẹ efinnaị nị ẹnyi lẹ ụnụ hụnzị elee-m elee-i, kẹni ẹnyi hụn ụzọ mẹ okukwe ụnụ zuzi oke ebe ọ nọlẹni zu oke.

Ekpere Pọlụ Wẹ Mẹni Ndị Tẹsalonika

¹¹ Chuku ẹnyi wụ Nẹdi ẹnyi lẹ enwẹn ẹ lẹ Di-nwọnni-ẹnyi wụ Jizọsị dodo duhẹ ẹnyi nwan ebe ụnụ rị!

¹² Di-nwọnni-ẹnyi ya mẹzikwọ ụnụ nwọnwaye ihiẹn-ọsụsụọ ibe ụnụ lẹ ndị ọzọ ile — kẹ ihiẹn-ọsụsụọ ẹnyi nwọn ebe ụnụ rị dọn rị a waye,

¹³ kẹni obi ụnụ zekẹnmẹ ebe ịrị-nsọ rị, ụnụ a wụrụ ndị nwọnlẹni nkọrịanị ihun Chuku Nẹdi ẹnyi ogẹn Di-nwọnni-ẹnyi Jesu lẹ ndị nsọ a e gi bịa.