Ndị Tẹsalonika Ibuzọ 2 - Ika

Isi Nke Ẹbụọ Kẹ Pọlụ wẹ dọn Rụn Ọrụn Imẹ Tẹsalonika

¹ Umunẹ, ụnụ lẹ enwẹn ụnụ a marịngụọ nị ijẹn ẹnyi bịa ebe ụnụ rị alanị iwi.

² Ọsụọn'a nị ẹnyi a tagụọ afụnfụn imẹ Filipi kẹ ụnụ lẹ enwẹn ụnụ dọn marịn, e gbe wẹ ifẹnrẹn ye ẹnyi ihun ebẹhụ, kanị, hụn ahụn ẹnyi rị a lụ ọnwụn, ẹnyi nọkwọ hụn ikẹn saẹka kushi ikẹn ghahanị ikẹn Osolobuẹ zi ụnụ oziọma Osolobuẹ.

³ Ẹnyi ezini ozi ẹnyi marịnlẹni, ẹnyi e buni eje-ihiẹn obi zi ẹ, ẹnyi ezin'ẹ nị ẹnyi dufie ịhịan.

⁴ Kanị, kẹ Osolobuẹ dọn weri ẹnyi kẹ ndị furu o gi e dọn ẹnya, bu ọrụn izi-oziọma che ẹnyi ẹka, ẹrịra kẹ ẹnyi e kuzi oku kẹ ndị furu wẹ gi e dọn ẹnya. Ẹnyi ara ku n'ọ sụọ ịhịan, kanị Osolobuẹ, Onyẹ hụn e lele obi ẹnyi.

⁵ Ẹnyi egini oku ọnụnụ-ire bịa, ụnụ nwẹn a marịnghọ; ẹnyi egizikwọnị ẹnya-uku bịa gi ihiẹn ọzọ kpumẹ ihun! Osolobuẹ wụ ọshẹri ẹnyi.

⁶ Ẹnyi emẹni nị ịhịan ja ẹnyi mma, kẹ ụnụ kẹ ndị ọzọ.

⁷ Ẹnyi te furu hụn a dọ ụnụ ihiẹn runi ẹnyi nọkẹ ndị-ozi pụ-ichẹn Kristi, kama, ẹnyi gụn agụngụn ụmụẹka imẹ igunrun ụnụ, e gi ẹka-alụlụa e sọn ụnụ kẹ nnẹ-ọmụmụ dọn e mẹ ụmụ a.

⁸ Makẹni ẹnyi e nwọnkẹ ihiẹn-ọsụsụọ ụnụ, ẹnyi nọ kwademẹ ni ẹlẹ oziọma Osolobuẹ sụọ kẹ ẹnyi k'e ye ụnụ, kanị enwẹn ẹnyi zi, makẹni ụnụ rị ẹnyi obi ọda-ọda!

⁹ Umunẹ, ụnụ a nyanhanghọ kẹ ẹnyi dọn e gi ẹka ẹnyi a lụrụ ogẹn hụ, a rụngbu enwẹn ẹnyi kẹ uhinhin kẹ efinnaị, amamgbe ẹnyi gha a wụrụnị onyẹ ọwụlẹ ibu imẹ ụnụ ebe ẹnyi rị e zi ụnụ oziọma Osolobuẹ.

¹⁰ Ụnụ wụ ọshẹri ẹnyi; Osolobuẹ wụzịkwọ ọshẹri, nị ẹnyi mẹsọn ụnụ ndị kwerini omumẹ rị nsọ, rị mma ẹnya Osolobuẹ lẹ omumẹ nwọnlẹni nkọrịanị.

¹¹ Ụnụ a marịnghọ nị ẹnyi gi ẹka nẹdi gi e sọn ụmụ a sọn onyẹ-onyẹ imẹ ụnụ:

¹² a dụn ụnụ ọdụn, a gba ụnụ umẹ, a rịọ ụnụ, nị ụnụ e bi obibi furu Osolobuẹ hụn kpọbanhan ụnụ Alị-eze ẹ lẹ ọghọ a.

¹³ Ẹnyi a kpanmịnzị Chuku ogẹn ile, nị, ụnụ anabanhannị oku-Chuku ụnụ nụ ọnụ ẹnyi nọkẹ oku ịhịan, kanị nọkẹ oku-Chuku hụ ọ wụ nke-esi, hụn rị nwan a rụn ọrụn imẹ ndụn ụnụ ndị kwerini.

¹⁴ Umunẹ, ihiẹn kunrunni ụnụ nọ kẹ hụn kunrun ụka Osolobuẹ imẹ Kraịstị Jizọsị ndị rịsọnmẹ Ẹgbẹrẹ Judia, makẹni, afụnfụn ohu hụ ụnụ ta ẹka ndị alị ụnụ kẹ wẹ nwẹn tazị ẹka umunẹ wẹ wụ ndị Ju.

¹⁵ Ndị Ju hụn gbu Di-nwọnni-ẹnyi Jesu Kristi lẹ ndị-amụma, chụpụzịkwọ ẹnyi. W'e mẹsọnmẹ ihiẹn ghalẹni a sụọ Osolobuẹ; a mayesọnmẹ onyẹ ọwụlẹ,

¹⁶ e gbọndọn ẹnyi ezilẹ ndị alị ọzọ ozi wẹ k'e gi nwọn nzụọpụha! Ẹrịra kẹ w'e mẹ ogẹn ile hụn wẹ gi e mẹjun mkpu njọ wẹ ile. Kanị, iwe-lẹ-ọnụma Osolobuẹ e kunrungụọ wẹ nwan ikpanzụụnnị.

Kẹ Wẹ Dahan Pọlụ Wẹ!

¹⁷ Umunẹ, ẹkẹrẹ ogẹn ahụn nsọngbu gilẹni nịzị ẹnyi hụn ụnụ (kanị, ẹlẹkwọnị obi ẹnyi arị ebe ụnụ rị); ụnụ nọ dama ẹnyi ọda-ọda, ẹnyi nọ chọma nị ẹnyi hụn ụnụ elee-m, elee-i!

¹⁸ Ẹnyi te chọ nị ẹnyi bịazị d'a hụn ụnụ: tụmadụ mmẹ nwẹn wụ Pọlụ — a nwanghọ m mgbe ole-lẹ-ole nị m bịa, kanị Ekwensụ gbọndọn ẹnyi.

¹⁹ Ẹghẹẹ: ẹlẹ ụnụ wụ olilẹnya ẹnyi? Kị wụzị nwan ịghọghọ ẹnyi? Kị wẹ k'e gi tu ẹnyi ugọn? Onyẹ kẹ ẹnyi k'e gi nyan isi ihun Di-nwọnni-ẹnyi wụ Jesu ogẹn o k'e gi bịa? Ẹlẹ ụnụ?

²⁰ Eziẹ, ụnụ wụ ọghọ ẹnyi lẹ ịghọghọ ẹnyi!