Ndị Rom 3 - Ika

Isi Nke Ẹtọ Kị Ndị Ju Gi Ka Ndị Ọzọ Mma?

¹ Kị ndị Ju gizi nwan ka ndị ọzọ mma? Elee erere kẹ ịkwa-ugun banzị nwan?

² O bukẹkwọ! Nke ibuzọ, ndị ju kẹ Osolobuẹ buche oku gha a ọnụ pụha ẹka.

³ Omẹni ụfọdụ egin'ẹ dọn, ya kẹ ẹnyi e gi nwan sị nị Osolobuẹ ẹlẹ onyẹ wẹ e gi dọn ẹnya?

⁴ Mba, kaka! Osolobuẹ ya wụrụ onyẹ ezioku, ọsụọn'a nị ịhịan ile wụ ndị-ntụ. Ọ nọhụ kẹ Ẹkụkwọ-nsọ dọn ku ẹ, sị, “Wẹ k'a hụn a nị ihiẹn i ku wụ ezioku; wẹ kin i ikpe, i k'e ri eṅẹn.”

⁵ O mẹ nwan nị eje-omumẹ ẹnyi e mẹ wẹ a hụnchanrịn ezi-omumẹ Osolobuẹ, kị ẹnyi e ku nwan? Nị ẹnyi sị nwan nị Osolobuẹ mẹ njọ ebe ọ nọ ye ẹnyi afụnfụn? (M rị e ku ẹ kẹ ịhịan).

⁶ Kaka! Omẹni Osolobuẹ te wụ onyẹ njọ, nanị o dọn nwan kin ụwa ikpe?

⁷ Ẹghẹẹ, omẹkwọ ni ntụ m kẹ ezioku Osolobuẹ gi a pụhachanrịn ifọn, e wẹhẹn'ẹ ọghọ, kị w'a mazịnị m nwan ikpe nị m wụ onyẹ-njọ?

⁸ Kị haịn ẹnyi gilẹni nwan sị, “Nị ẹnyi mẹsọnmẹ eje-ihiẹn kẹni ihiẹn rị mma gha imẹ ẹ pụha?” (Bụ ya kẹ ndị rị e kuja oku ẹnyi sị nị ya kẹ ẹnyi e ku. Wẹ furu w'a ma ikpe).

Onwọnni Onyẹ Rị Mma

⁹ Kị mẹzi? Ẹnyi ndị Ju kadẹ nwan ndị ọzọ mma ra? Kaka akpohu! Ẹnyi e kugụọl'a nị njọ rị a kị ịhịan ile, kẹ ndị Ju kẹ ndị wụlẹni ndị Ju.

¹⁰ Ya kẹ Ẹkụkwọ-nsọ ku nị, “Onyẹ ezi-omumẹ arị, kaka akpụ-ohu;

¹¹ onwọnni onyẹ a ghọtanị, onwọnni onyẹ a chọ Osolobuẹ.

¹² Ịhịan ile a kpahugụọ; wẹ ile e wiwigụọ; onwọnni onyẹ e mẹ ihiẹn rị mma, onwọnni kaka akpụ onyẹ ohu.

¹³ Ẹkpịrị wẹ gha e ku oku wụ ili rị oghe; ire wẹ gi e ku oku wụ ndufie-ndufie, oku rị wẹ ụgb'ọnụ wụ ẹdide agwọ.

¹⁴ Ịkpọ-iyi lẹ eje-oku jun wẹ ọnụ.

¹⁵ Ụkụ a kẹrẹka wẹ igbu-ọchụn.

¹⁶ Ebe ọwụlẹ wẹ jẹn, ntikpọ-ntikpọ lẹ nsọngbu kẹ w'e buhẹ.

¹⁷ Ama wẹ chọ udọn.

¹⁸ Egun Osolobuẹ arịdẹ wẹ ẹnya.”

¹⁹ Ẹnyi a marịnghọ nị ihiẹnni ile Iwu ku, nị ndị rị okpuru Iwu k'ọ rị a gwa, kẹni ịhịan ile kinbehi, ụwa ile a rịọma Osolobuẹ dodo.

²⁰ Makẹni, onwọnni onyẹ jẹnkọ d'e gi idọnmẹ Iwu Mozizi wụrụ onyẹ ezi-omumẹ ebe Osolobuẹ rị, makẹni Iwu Mozizi ke wẹ gidẹ a ghọsị ịhịan n'o mẹọlẹ njọ.

Kẹ Ịhịan Dọn A Rị Mma Ẹnya Chuku

²¹ Osolobuẹ a ghọsịgụọ ezi-omumẹ hụn wụ nke ẹ, bụ ẹlẹ oku Iwu Mozizi. Kanị Iwu Mozizi lẹ ihiẹn ndị-amụma de imẹ Ẹkụkwọ-nsọ hụ a shịa ẹri nị ya wụ ezi-omumẹ Osolobuẹ:

²² ezi omumẹ Osolobuẹ hụn a bịa ghahanị ikwerini Jizọs Kraịstị rọ; o ru ndị ile kwerini ẹka, ara tu onyẹ ịhịan wụ,

²³ makẹni ịhịan ile e mẹgụọ njọ, tuhu ọghọ Osolobuẹ ye wẹ;

²⁴ wẹ rị nwan e ye wẹ ezi-omumẹ e ye makẹ ẹfọma Osolobuẹ, makẹni o tumẹgụọ ihiẹn wẹ gi a gbarị isi imẹ Kraịstị wụ Jizọsị.

²⁵ Makẹni, Osolobuẹ we Jesu ye, gi ẹ họnrin ẹjan wẹ e gi wepụ njọ jẹnni onyẹ hụn gi ẹdeke ẹ hụn wụ ọnwụn a dọn, kẹni o we ẹnya nị Osolobuẹ wụkwọ onyẹ ezi-omumẹ ghalẹni a kwadọn njọ ebe ọ nọ din ndidin fepụ ẹnya njọ ịhịan mẹ mbụ.

²⁶ Ya k'o gi mẹ ihiẹnni ogẹnni, gi ghọsị n'ọ wụ onyẹ ezioku, n'ọ wụ onyẹ ezi-omumẹ lẹ n'o furughọ n'ọ nabanhan onyẹ kwerini Jesu rịkẹ onyẹ ezi-omumẹ.

Ihiẹn Wẹ Gi A Nyan Isi Arịzị

²⁷ Kị ịhịan k'e gizi nwan nyan isi? Onwọnzini. Kị haịn nwan? Makẹni ẹlẹzi ọrụn kẹ wẹ gi e mẹ ẹ kanị okukwe.

²⁸ Ya wụ, ẹnyi gi ẹ dọn nị okukwe ịhịan kẹ Osolobuẹ gi e kuni ịhịan ọhụnma, ẹlẹ idọnmẹ Iwu.

²⁹ Chuku wụdẹ Chuku ndị Ju sụọ ra? Ẹlẹzi ya ke ndị wụlẹni ndị Ju? Ẹghẹẹ, ịya wụzị Chuku hụn ke ndị wụlẹni ndị Ju,

³⁰ ebe o mẹ ni Osolobuẹ wụ ohu sụọ. Ya k'o gi mẹ ni o k'e gi okukwe ndị Ju kuni wẹ ọhụnma, gizi okukwe ndị wụlẹni ndị Ju kuni wẹ ọhụnma.

³¹ Ẹnyi rịdẹ nwan e gi oku okukweni a kagbu Iwu Mozizi ra? Mba, kaka; ẹnyi rị e gi ẹ a kwadọn ẹ.