Ndị Rom 15 - Ika

Isi Nke Mmisẹn Achọlẹ Nke I Sụọ

¹ O furu nị ẹnyi ndị ze imẹ Kraịstị e rozi k'ọ rị ndị zelẹni, ẹlẹ imẹ ihiẹn a sụọnị ẹnyi.

² Nị ẹnyi e mẹni ibe ẹnyi imẹ Kraịstị ihiẹn rị mma hụn k'a sụọnị wẹ, kẹni okukwe wẹ sue.

³ Makẹni Kraịstị emẹni k'ọ sụọ a; o mẹhụ ihiẹn hụ Ẹkụkwọ-nsọ ku, nị, “Mkpari ahụn wẹ kpari i, mmẹ gi isi buru ẹ.”

⁴ Wẹ de ihiẹn ile wẹ de imẹ Ẹkụkwọ-nsọ ẹdẹi kẹni wẹ gi ẹ kuzi ẹnyi, kẹni ẹnyi hụn ụzọ e din ndidin, e gi ya lẹ nkasị-obi Ẹkụkwọ-nsọ e ye nwọnsọnmẹ olilẹnya ẹnyi.

⁵ Osolobuẹ hụn e ye ndidin lẹ nkasị-obi, ya yeni ụnụ ẹka e gi obi ohu e bi, makẹni ẹrịra k'ọ furu imẹ Kraịstị wụ Jizọsị,

⁶ kẹni ụnụ ile gi olu ohu e ye Osolobuẹ Nẹdi Di-nwọnni-ẹnyi Jizọsị Kraịstị ọghọ.

A Nabanhan Nị Ịhịan Ile

⁷ A nabanhan nị nwan ibe ụnụ kẹ Kraịstị dọn nabanhan ụnụ, kẹni ụnụ e gi ẹ e ye Osolobuẹ ọghọ.

⁸ Makẹni Kraịstị bịa d'a wụrụ odibo ndị Ju, kẹni ọ ghọsị nị Osolobuẹ wụ onyẹ ezioku ghahanị imẹzu nkwa Osolobuẹ kwe ndị nẹdi wẹ kanị;

⁹ ọ bịazị d'a wụrụ odibo ndị wụlẹni ndị Ju kẹni ọ ghọsị wẹ omikẹn Osolobuẹ, gi ẹ wẹhẹni Osolobuẹ ọjịja-mma. Ẹrịra kẹ Ẹkụkwọ-nsọ ku ẹ, sị, “Makẹ ufiri ẹ, m k'a ja ị mma imẹ igunrun ndị alị ọzọ; m k'e gi ẹbụ ja ẹfan ị mma.”

¹⁰ Ọ sịzị, “Ndị alị ndị ọzọ, sọn ni ndị nke Osolobuẹ ghọghọ.”

¹¹ Ọ sịzị, “Alị ndị ọzọ ile, ja nị Di-nwọnni-ẹnyi mma; alị ile, bushi n'ẹ elu.”

¹² Osolobuẹ gizi Azaya sị, “Mkpọgụn Jese k'a pụha — o k'e lihi d'a kịmadẹ alị ndị ọzọ; ịya kẹ ndị alị ọzọ k'e gi dọn ẹnya.”

¹³ Osolobuẹ hụn e ye olilẹnya ya ye ụnụ ịghọghọ lẹ udọn mmagi-mmagi kẹ ụnụ dọn rị e gi ẹ e dọn ẹnya. Y'a mẹ ẹ, kẹni ụnụ nwọn olilẹnya, nwọn ẹ ọda-ọda, ghahanị ikẹn Mmọn-nsọ.

Ikẹn Pọlụ Gi E De

¹⁴ Umunẹ m, o wegụọ m ẹnya nị mma-mma jun imẹ ụnụ, nị amamihiẹn jun imẹ ụnụ, ni ụnụ a magụọ kuzi ibe ụnụ.

¹⁵ Kanị, o nwọnghọ ihiẹn ndị m kushi ikẹn imẹ ẹhụhụọ-ozini kẹni m nyanhanzịnị ụnụ wẹ. M'e kushi ikẹn makẹ ẹka Osolobuẹ hụn rị imẹ ndụn m,

¹⁶ hụn o gi tumẹ m onyẹ-ọrụn Kraịstị wụ Jizọsị imẹ igunrun ndị wụlẹni ndị Ju. M rị nwan a rụn kẹ onyẹ nchụn-ẹjan ghahanị izisọnmẹ oziọma Osolobuẹ, kẹni wẹ wẹhẹ ndị alị ndị ọzọ d'a wụrụ oyiye Osolobuẹ a nabanhan, oyiye hụn Mmọn-nsọ dọn nsọ.

¹⁷ M nwọn nwan ihiẹn m gi a nyan isi rịkẹ onyẹ nke Kraịstị wụ Jizọsị ihun Osolobuẹ.

¹⁸ Ekukọdẹ m ihiẹn ọwụlẹ karị ihiẹn Kraịstị gi m rụn imẹ igunrun ndị alị ọzọ wụlẹni ndị Ju, hụn o gi mẹ wẹ wụrụ ndị e humẹni Osolobuẹ isi. Ihiẹn o gi oku-ọnụ m lẹ ihiẹn m rụn mẹ,

¹⁹ lẹ ihiẹn ile o gi ihiẹn-nghọsị lẹ ọrụn-atụmẹnya lẹ ikẹn Mmọn Osolobuẹ rụn; nke wụ nị e zigbarịgụọ m oziọma Kraịstị ghakwọrị Jerusalẹm d'e ru Ilaịrịkọm.

²⁰ Ihiẹn m'a chọ ogẹn ile wụ nị m'e zi oziọma ebe wẹ kelẹni nụ ẹfan Kraịstị, amamgbe m'a tụnyemẹzi ebe onyẹ ọzọ tụnmagụ.

²¹ Kama, m'e mẹ kẹ Ẹkụkwọ-nsọ dọn kụ, nị, “Ndị wẹ gwatulẹni banyen'ẹ k'a hụn; ndị nụtulẹni ukwere ẹ k'a ghọta.”

Pọlụ E Kumẹzi Oku Ijẹn Rom

²² Oku ndị kelẹni nụ oku Kraịstị haịn m gilẹni ke saẹka bịa d'a hụn ụnụ hụnnị ile m rị a chọ nị m bịa.

²³ Kanị, hụnnị o mẹ nwan n'o nwọnzini ebe họdụ m k'e wejẹn oziọma ebeni bụ o mẹgụọ ahụa ole-lẹ-ole m chọma nị m bịa d'a hụn ụnụ,

²⁴ m rị a tụ ẹnya nị m k'a hụn ụnụ m jẹnkọnị Speni, m sọngụ ụnụ nọ, ụnụ e du m ụla.

²⁵ Kanị, m jẹnkọ nwan Jerusalẹm kikẹnni d'e ye ndị nke Osolobuẹ rị ebẹhụ ihiẹn wẹ tụnị wẹ,

²⁶ makẹni ọ sụọ ndị nke Kraịstị rịsọnmẹ Ẹgbẹrẹ Masẹdonia lẹ Akaya nị wẹ tụnị ndị igbẹnnyẹ rị imẹ ndị nke Osolobuẹ rị Jerusalẹm ihiẹnni m wejẹnkọnị wẹ.

²⁷ Uwẹ gi uche wẹ mẹ ẹ. O rughọ wẹ e mẹ, makẹni wẹ gi ndị kwerini rị Jerusalẹm ụgwọ. Makẹni, omẹni ndị wụlẹni ndị Ju e rinarịngụọ ndị Ju ihiẹn imẹ-mmọn, o furu nị ndị wụlẹni ndị Ju gizi ihiẹn ụwanị wẹ nwọn yeni wẹ ẹka.

²⁸ M rụngụ ogboni, wegụ egho ahụn wẹ tụnị wẹ che wẹ ẹka, m k'e jẹn Speni. M jẹnkọnị a banhan m d'a hụn ụnụ.

²⁹ M lalanị, a marịnghọ m nị m k'e buhẹ ngọzi Kraịstị mmagi-mmagi.

Pọlụ A Rịọ Wẹ Ekpere

³⁰ Umunẹ m, m rị a rịọ ụnụ arịrịọ — m rị e gi ẹfan Di-nwọnni-ẹnyi wụ Jizọs Kraịstị lẹ ihiẹn-ọsụsụọ Mmọn-nsọ a rịọ ụnụ ya: sọn ni m shi ọnwụnnị ghahanị ị rịọnị m Osolobuẹ.

³¹ A rịọn'a n'ọ gbapụha m ẹka ndị Ju kwerilẹni rị alị Judia; ya mẹ ndị nke Osolobuẹ rị Jerusalẹm nabanhan ihiẹn m jẹnkọ ebẹhụ d'e mẹni wẹ,

³² kẹni m gi ịghọghọ bịa d'a hụn ụnụ omẹni Osolobuẹ a chọghọ, a nọ m nke ụnụ zu ikẹn.

³³ Osolobuẹ hụn e ye udọn ya nọyeni ụnụ ile. Isẹẹ.