Ndị Rom 12 - Ika

Isi Nke Mmẹbụọ Obibi Ndị Osolobuẹ Mẹni Omikẹn

¹ Umunẹ m, m rị nwan a rịọ ụnụ makẹni Osolobuẹ e mẹgụọnị ẹnyi omikẹn: gi ni ẹhụ ụnụ chụnyeni Osolobuẹ ẹjan rị ndụn, hụn rị nsọ, hụn k'a sụọn'a, nị ịya wụ ofufe furu ụnụ k'e fe ẹ.

² Elerilẹ ni ndị ụwanị, ka nị nị Osolobuẹ hutọ ụnụ ghahanị ihutọ iroro ụnụ. Mẹn'ẹ kẹni ụnụ hụn ụzọ marịn ihiẹn wụ uche Osolobuẹ, ihiẹn rị Osolobuẹ mma, ihiẹn a sụọ a ụsụọ, ihiẹn zu oke.

³ M rị e gi ikẹn Osolobuẹ ye m a sị onyẹ-onyẹ imẹ ụnụ: edọnmẹlẹ enwẹn i ebe i rulẹni, ka dọnrin ẹnya lele kẹ Osolobuẹ yehan ị okukwe, n'i dọnmẹ enwẹn i ebẹhụ.

⁴ Makẹni, kẹ ẹhụ ẹnyi dọn nwọn mkpamkpa ẹhụ bu ọda kanị w'a ra rụn ihiẹn ohu,

⁵ ẹrịra kẹ ẹnyi hụn bu ọda dọn wụ ẹhụ ohu imẹ Kraịstị kanị mkpamkpa ichẹn-ichẹn.

⁶ Ẹnyi nwọnsọnmẹ oyiye ichẹn-ichẹn, onyẹ-onyẹ lẹ hụn Osolobuẹ ye ẹ. Omẹni oyiye ịhịan wụ izi-ozi Osolobuẹ, y'a mẹ ẹ kẹ okukwe ẹ han.

⁷ Omẹni ijẹn-ozi rọ, ya jẹnmẹ ozi; omẹni nkuzi rọ, ya kuzimẹ nkuzi;

⁸ omẹni ịkasị-obi rọ, ya kasị obi; omẹni iye ndị nwọnlẹni rọ, ya hama ẹka; omẹni ọkịkị rọ, ya rụnshi ikẹn; omẹni imẹ-omikẹn rọ, ya gi ịghọghọ e mẹ ẹ.

Ihiẹn-ọsụsụọ

⁹ E nwọnni ihiẹn-ọsụsụọ gha akpakalị obi pụha. A jụ nị eje-ihiẹn; e kwọnkẹnmẹ ni ihiẹn rị mma.

¹⁰ Ụnụ lẹ ibe ụnụ k'a gha a sụọ kẹ umunẹ; e yekarị nị ibe ụnụ ọghọ.

¹¹ Anịkwọlẹ ni adụdụ ụnụ belụa, ka a dụnnị kẹ ọkụn imẹ-mmọn, a rụnnị Di-nwọnni-ẹnyi ọrụn.

¹² A ghọghọ nị makẹ olilẹnya ụnụ nwọn; e nwọn ni ndidin imẹ nsọngbu ụnụ; e mẹ ni ekpere ogẹn ile.

¹³ E yeni ni ndị nke Osolobuẹ ihiẹn rị a kọ ẹka. A nabanhan nị ndị ọbịa.

¹⁴ A gọzi ni ndị rị e kpokponi ụnụ; a gọzi ni, abụkwọlẹ ni ọnụ.

¹⁵ Sọn ni ndị rị a ghọghọnị ghọghọ, ụnụ e sọn ndị rị a kwannị kwan.

¹⁶ E gi ni obi ohu e bi. Apachelẹ ni, agbalalẹni ni ndị ọnọdị wẹ lụa alị mọbụ ọrụn lụa alị. Erolẹ ni nị ụnụ ka ndị ọzọ mkpa.

¹⁷ Emẹgwarịlẹ ni ịhịan eje-ihiẹn. Dọnrin ni ẹnya a hụn a nị ụnụ e mẹ ihiẹn rị mma ẹnya ịhịan ile.

¹⁸ E mẹ ihiẹn ile i k'a saẹka mẹ ni udọn rị ẹgbata yụ lẹ ndị ọzọ ile.

¹⁹ Ndị ọwụ m, emẹgwarịlẹ ni; ka la nị mmẹgwarị tọnị Osolobuẹ, makẹni Ẹkụkwọ-nsọ sị, “Di-nwọnni-ẹnyi sị, ‘Mmẹ nwọn mẹgwarị; mmẹ k'a kụ ụgwọ.’ ”

²⁰ Kama, “Omẹni ẹgụn rị a gụn eṅẹnrẹn i, y'e ye ẹ ihiẹn-oriri; omẹni ẹgụn mirin rị a gụn a, y'e ye ẹ ihiẹn ọ k'a ra. Makẹni ị gha e mẹ ẹ, ị rị ‘a bụọ ikeke-ọkụn a bụọye ẹ isi’.”

²¹ Anịlẹ eje-ihiẹn mẹri i, ka gi ihiẹn rị mma mẹri eje-ihiẹn.