Ndị-nze Nke Ẹbụọ 9 - Ika

Isi Nke Itenẹi E Kin Wẹ Jehu Eze Ndị Izrẹlụ Ebamịn-ugu

¹ Ẹlaịsha onyẹ-amụma kpọ onyẹ ohu imẹ ndị-amụma ọ rị a zụn, sị a, “Fa ẹwuru i ye nfifie i n'ọ n'ị gba ọsọ: weri ọgọnị udẹn-olivu rị imẹ jẹnmẹ Ramọtụ-Gilẹdị.

² I ru ebẹhụ, chọ Jehu nwa Jehoshẹfatị nwa Nimshi. Jẹnburu ẹ, y'a gha ebe ya lẹ ibe ẹ rị w'e shi mmughẹ rịchanrịn imẹ.

³ Y'e weri mkpuni, hu udẹn rịn'a ye ẹ isi, sị, ‘Osolobuẹ sị: “M rị e tumẹ i eze ndị Izrẹlụ.” ’ I mẹgụ a y'a gụnpụ ụzọ, gbapụ; echerikwọlẹ!”

⁴ Ya okorọbịa hụ wụ onyẹ-amụma nọ jẹnmẹ Ramọtụ-Gilẹdị.

⁵ Ogẹn o gi ru ebẹhụ, ọ nọ hụn ndị ọkị-agha nọdị alị ụzọ ohu. Ya ọ nọ sị, “Ọkị-agha, m nwọn ozi m k'e zi i.” Jehu nọ sị a, “Onyẹ imẹ ẹnyi?” Ọ nọ sị a, “Ọkị-agha, ịyụ.”

⁶ Ya Jehu nọ lihi ọtọ, sọn ẹ ban imẹ ụlọ. Onyẹ-amụma hụ nọ hu udẹn hụ ye Jehu isi, sị, “Osolobuẹ wụ Chuku Izrẹlụ sị: ‘M rị e tumẹ i eze ndị nke Osolobuẹ wụ Izrẹlụ.

⁷ I jẹnkọ d'e gbupụ ikpụlọ di-nwọnni i wụ Ehabụ: m k'e gbugwarị wẹ ogbugbu Jezibẹlụ gbu idibo m ndị-amụma lẹ idibo Osolobuẹ ile hụn o gbu.

⁸ Ikpụlọ Ehabụ ile k'a nwụnchanrịn. M k'e gbupụ okẹnnyẹ ọwụlẹ wụ nke Ehabụ imẹ Izrẹlụ, kẹ igbọn kẹ onyẹ nwọn enwẹn ẹ.

⁹ M k'e mẹ ikpụlọ Ehabụ ihiẹn m mẹ ikpụlọ Jerobụam nwa Nebatị lẹ ikpụlọ Baasha nwa Ahija.

¹⁰ O mẹ nke Jezibẹlụ, nkitẹ jẹnkọ d'a ra ẹdeke ẹ imẹ alị nẹi rị Jezriẹlụ, onwọnni onyẹ k'e lin'ẹ.’ ” Ogẹn onyẹ amụma hụ gi zigụ ozini, ọ nọ gụnpụ ụzọ, gbama ọsọ.

¹¹ Jehu nkẹ e kinhẹn d'e kunrun ibe ẹ, onyẹ ohu imẹ wẹ nọ jụ a, sị, “Demẹ ọ hụkwọ mma? Kị onyẹ-ẹranị chọhanị ị?” Jehu nọ sị wẹ, “Ọnụ a marịngụọ onyẹ nọ ẹnịna lẹ ụdị ihiẹn o k'e ku.”

¹² Wẹ nọ sị a, “Ntụ! Gwa ẹnyi ihiẹn o ku!” Jehu nọ sị wẹ, “Lee ni ihiẹn ọ gwa m: ọ sị, ‘Osolobuẹ sị: M rị e tumẹ i eze Izrẹlụ.’ ”

¹³ Wẹ nọ gbụpụsọnmẹ ẹwuru wẹ ozigbo-ozigbo, gbaman'a akpakalị mgbanyinrin rịsọnmẹ ebẹhụ. Wẹ nọ gbu opi (ọdụn), yi, “Jehu wụ eze!”

Kẹ Jehu Dọn Gbu Joram

¹⁴ Ya Jehu nwa Jehoshẹfatị nwa Nimshi nọ zuni eze wụ Joram eje-umẹ. Eze wụ Joram lẹ ndị-agha Izrẹlụ ile te rị e che obodo Ramọtụ-Gilẹdị nche amamgbe eze Aram wụ Hazaẹlụ e weri ẹ,

¹⁵ kanị eze wụ Joram a lashigụọ nwan Jezriẹlụ d'a zụọ enwẹn ẹ yeni ẹhụ ndị Aram rụ a ebe ya lẹ Hazaẹlụ eze Aram nọ lụ agha. Jehu sị ndị ya lẹ wẹ wị, “Omẹni ụnụ e werigụọ a nị m wụ eze, anịlẹ ni nwan onyẹ ọwụlẹ gha imẹ obodoni pụ d'e ku okuni imẹ Jezriẹlụ.”

¹⁶ Ya Jehu nọ ban ụgbọ-ẹshin ẹ, nyinshi Jezriẹlụ, makẹni ebẹhụ kẹ eze wụ Joram nọ rị e zu ikẹn; Ahazia nkẹ wụ eze Juda hụn jẹn d'a hụn Joram rịzị ebẹhụ.

¹⁷ Ogẹn onyẹ-nche wuzo imẹ ụlọ-nche rị obi-eze imẹ Jezriẹlụ gi legha ndị Jehu kịla, ọ nọ hịnị eze kẹ w'a hị, sị, “M rị e legha igunrun ịhịan lalanị!” Joram nọ sị, “Zi onyẹ ohu e nyin ẹshin d'e kunrun wẹ, jụ wẹ, ‘Ụnụ gi udọn bịa?’ ”

¹⁸ Ya kẹ onyẹ hụn e nyin ẹshin hụn o zijẹn nọ jẹnmẹ d'e kunrun Jehu, sị a, “Eze sị, ‘Ụnụ gi udọn bịa?’ ” Jehu nọ sị a, “Kịnị biri ịyụ lẹ udọn? Sọnmẹ m azụụn!” Onyẹ nche nwẹn nọ sị, “Onyẹ ozi e kunrungụọ wẹ, kanị ẹlẹ o kinla azụụn.”

¹⁹ Ya eze nọ zi onyẹ ọzọ e nyin ẹshin. O kunrun wẹ, ọ nọ sị, “Eze sị ‘Ụnụ gi udọn bịa?’ ” Jehu nọ sị a, “Kị biri ịyụ lẹ udọn? Sọnmẹ m azụụn!”

²⁰ Onyẹ nche hụ nọ sị, “Onyẹ-ozini e kunrungụọzị wẹ, kanị ịya nwẹn alalanị. Onyẹ nyanla ụgbọ-ẹshin nyankọ kẹ Jehu nwa Nimshi — ọ nyanla ẹra-ẹra.”

²¹ Ya eze wụ Joram nọ sị, “Gan ẹshin m ye ụgbọ-ẹshin m.” A gangụ w'a ye, Joram wụ eze Izrẹlụ lẹ Ahazia wụ eze Juda nọ jẹnmẹ d'e kunrun Jehu, onyẹ-onyẹ lẹ ụgbọ-ẹshin ẹ. Alị nẹi wụ nke Nabọtụ onyẹ Jezriẹlụ kẹ wẹ nọ zu ẹ.

²² Ogẹn Joram gi hụn Jehu, ọ nọ sị a, “Demẹ ọ hụkwọ mma, Jehu?” Ya Jehu nọ sị a, “Nanị o dọn rị mma bụ ife-mmọn lẹ ibu-nshi nnẹ i wụ Jezibẹlụ buhẹ jun ụzọ ile?”

²³ Joram nọ gbehutọ, gbama ọsọ, ọ hị Ahazia, “Ahazia! Ọnyan rọkwọ!”

²⁴ Jehu nọ gi ndụn a ile dọ ụta a, gba Joram ya obi-azụụn. Ọbara ahụn nọ zupu ẹ akpobi, ọ nọ wụlụa imẹ ụgbọ-ẹshin ẹ.

²⁵ Jehu nọ sị hụn a hansọnn'ẹ wụ Bid'ka, “Buru ẹ n'ị tụ a ye ugbo Nabọtụ onyẹ Jezriẹlụ nẹi. Nyanhan nị mmẹ lẹ yụ nyinsọnkọ Ehabụ nẹdi ẹ ogẹn Osolobuẹ gi ku afụnfụn o k'e y'ẹ, sị,

²⁶ ‘M hụn ẹdeke Nabọtụ lẹ ẹdeke ụmụ a ikẹnnyẹ ụnyanhụn; m k'a nọ imẹ alị Nabọtụnị gbugwarị ị ogbugbu i gbu wẹ: ịya kẹ Osolobuẹ ku.’ Buru ẹ nwan; tụ a ye alị hụ kẹ Osolobuẹ dọn ku.”

Kẹ Jehu Dọn Gbu Ahazia

²⁷ Ogẹn Ahazia wụ eze Juda gi hụn ihiẹn mẹni, ọ nọ gi ụgbọ-ẹshin gbapụ, gbasọnmẹ ụzọ Bẹt-Hadanị. Jehu nọ chụ a, e yi, “Gbu ni ya nwẹn!” Wẹ nọ rụ a ẹhụ imẹ ụgbọ-ẹshin ẹ ụzọ Guru, ẹhụ Ibliam, kanị ọ nọ lịlịma gbashi Mẹgido; ọ nọ nwụntọ ebẹhụ.

²⁸ Ndị nke ẹ nọ gi ụgbọ-ẹshin bu ẹ shi Jerusalẹm, li ẹ ye ebe wẹ liye ndị nẹdi ẹ imẹ Obodo hụ Defidi tụn.

²⁹ Hụn mẹ ẹ ahụa mmanaị Joram nwa Ehabụ kịma Izrẹlụ kẹ Ahazia kịma Juda.

E Gbu Wẹ Jezibẹlụ

³⁰ Jehu nọ shi Jezriẹlụ. Mgbe Jezibẹlụ nnẹ eze gi nụ nị Jehu a bịa, ọ nọ gi ihiẹn gba ẹnya, mẹmẹ ntutu ẹ, gha windo e lee.

³¹ Hụn Jehu gihụ banhan ọnụ-mgbọn, Jezibẹlụ nọ sị, “Ị nọhụ kẹ Zimri, ogbu di-nwọnn'ẹ! I gikwọ udọn bịa?”

³² Jehu nọ lee ẹnya windo hụ rị ibe elu, sị, “Onyẹ rị azụụn nke m ebẹhụ?! Onyẹ?!” Okẹn-okporo ẹbụọ mọbụ ẹtọ hụn e fe eze nọ gha ibe elu hụ lee Jehu ẹnya.

³³ Jehu nọ sị wẹ, “Kwantu n'ẹ!” Ya wẹ nọ kwantu ẹ, ẹdeke ẹ nọ feyesọnmẹ ẹhụ ụlọ lẹ ẹhụ ẹshin ebe ẹshin rị a zọkpụkpọ a.

³⁴ Jehu nọ ban imẹ ụlọ, ri, ra. Ọ nọ sị, “Jẹn ni d'e dọnkwama okpoho hụ wẹ bụ ọnụ, nị ụnụ li ẹ, nị nwa eze k'o te wụ.”

³⁵ Kanị ogẹn wẹ gi pụha nị wẹ d'e li ẹ, onwọnzini ihiẹn wẹ hụn karị okpokomisi ẹ, ụkụ-alị a lẹ ọb'ẹka a.

³⁶ Wẹ nọ kinhẹn d'a gwa Jehu. Jehu nọ sị, “Ọnwan wụ ihiẹn Osolobuẹ gha ọnụ odibo ẹ wụ Ẹlaịja onyẹ Tishibẹ ku, sị, ‘Imẹ alị hụ rị Jezriẹlụ kẹ nkitẹ k'a nọ ri ozun Jezibẹlụ.

³⁷ Ozun Jezibẹlụ k'a nọ kẹ ẹfịfịa rị akpakalị, imẹ alị hụ rị Jezriẹlụ, nke wụnị onwọnni onyẹ k'a s'ẹka kọma a ẹnya, sị, “Ọnwan wụ Jezibẹlụ.” ’ ”