Ndị-nze Nke Ẹbụọ 4 - Ika

Isi Nke Ẹnọ Ẹlaịsha E Yeni Okpoho Di Ẹ Nwụn Ẹka

¹ Nwunyẹ onyẹ ohu rị itu ndị-amụma kwanburuhẹ Ẹlaịsha, sị a, “Odibo i wụ di m a nwụnhụngụọ. Y'a marịnghọ n'ọ gbaye Osolobuẹ ọda-ọda. Kanị, onyẹ o gi ụgwọ lala nwan d'e weri ụmụ m ikẹnnyẹ ẹbụọ n'o gi wẹ họnrin igbọn ẹ.”

² Ẹlaịsha nọ sị a, “Kịnị k'ị chọ nị m mẹn'i? Gwa m, kịnị k'i nwọn iwe ị?” Ọ nọ sị a, “Onwọnni ihiẹn ọzọ mmẹ odibo i nwọn karị ofugbọn-olivu mẹ ẹkẹrẹ.”

³ Ẹlaịsha nọ sị a, “Jẹn d'a rịọnarịnsọnmẹ ibe i okpokoro ẹkpoko. Chọhakwọ hụn bu ọda, ẹlẹkwọ ẹkẹrẹ.

⁴ I kpọnhẹngụ wẹ, y'a ban imẹ ụnọ, kpọkin enwẹn i lẹ ụmụ ị ikẹnnyẹ ye imẹ ụlọ. Huyemẹ ofugbọn-olivu nta hụ i nwọn imẹ ẹkpoko ndị ahụn, hụn junni ụnụ e bu ẹ che ụsụọ.”

⁵ Okpoho ahụn nọ pụ, o mẹgụ, ọ nọ kpọkin enwẹn ẹ ye imẹ ụnọ, ya lẹ ụmụ a ikẹnnyẹ hụ. Ụmụ a ndị ahụn hụ e kpọnhẹnn'ẹ ẹkpoko ndị nwẹn, ọ hụ e huye.

⁶ O hujunchanrịngụ ẹkpoko ndị nwẹn ile, ọ nọ sị nwa a, “Wẹhẹzi.” Nwa a nọ sị a, “Ẹkpoko ahọdụzịnị.” Ya kẹ ofugbọn-olivu hụ nọ hubehi.

⁷ Ọ nọ jẹn d'a gwa odibo Osolobuẹ wụ Ẹlaịsha. Ẹlaịsha nọ sị a, “Jẹnmẹ d'e re ofugbọn hụ gi kụ ụgwọ i gi. Ịyụ lẹ ụmụ ị e gi hụn họdụnị bimẹ.”

Okpoho Shunẹm Nabanhan Ẹlaịsha Iwe Ẹ

⁸ Ụhụọhịn ohu, Ẹlaịsha nọ jẹn obodo Shunẹm. Okpoho ohu wụ ọdanfịn bi ebẹhụ nọ rịọ a ọda-ọda n'ọ nọdị ri ihiẹn-oriri; ya k'ọ nọ mẹ ni ogẹn ọwụlẹ Ẹlaịsha ghapụha, ọ banye d'e ri ihiẹn-oriri.

⁹ Okpoho hụ nọ sị di ẹ, “A marịngụọ m'a nị okẹnnyẹni a ghafe ebeni mbụ-lẹ-ẹbụọ wụ odibo-nsọ Osolobuẹ.

¹⁰ Nị ẹnyi mẹmẹ mmughẹ mẹ ẹkẹrẹ ye enu ụlọ, ẹnyi e bu bẹdi lẹ teburu lẹ ocho lẹ ukpẹ tọn'a, kẹn'ọ hụn ụzọ a nọdị ebẹhụ ogẹn ọwụlẹ ọ ghapụha nke ẹnyi.”

¹¹ Ụhụọhịn ohu, Ẹlaịsha a bịa, ọ nọ shi mmughẹ nwẹn rị ibe elu d'e zu ikẹn.

¹² Ya ọ nọ sị odibo ẹ wụ Gẹhazi, “Kpọha okpoho Shunẹm ahụn.” Ya ọ nọ kpọ a; okpoho hụ a bịa, turu ihun Ẹlaịsha.

¹³ Ẹlaịsha nọ sị Gẹhazi, “Sị a, ‘Lee ihiẹn-ihiẹn ị rị e mẹni ẹnyi. K'ị chọ nị wẹ mẹn'i? Nị wẹ d'a gwa eze mọbụ onyẹ-isi ndị-agha oku i?’ ” Okpoho hụ nọ sị, “E nwọnghọdẹ m ụlọ imẹ igunrun ndị nke ẹnyi.”

¹⁴ Ẹlaịsha nọ sị Gẹhazi, “Kịnị kẹ ẹnyi k'e mẹn'ẹ nwan?” Gẹhazi nọ sị a, “Omẹni ọhụn rọ, ọ mụnị okẹnnyẹ bụ di ẹ a kagụọ ẹgẹdi.”

¹⁵ Ẹlaịsha nọ sị a, “Kpọha a.” Ya ọ nọ kpọha a. Okpoho nwẹn nọ bịa d'e wuzo ọnụmụzọ.

¹⁶ Ya Ẹlaịsha nọ sị a, “Mgbeni akan-ile ị k'a pa nwa ị okẹnnyẹ ẹka.” Ya okpoho hụ nọ sị a, “Mba Diọkpa, odibo Osolobuẹ, atụlẹ odibo i ntụ!”

¹⁷ O mẹgụ, okpoho ahụn nọ tụrụ imẹ. Ahụa a bọ, o ru ogẹn ahụn Ẹlaịsha ku, ọ nọ mụ okẹnnyẹ kẹ Ẹlaịsha dọn gwa a.

¹⁸ Ogẹn nwata nwẹn gi himẹ, o ru ụhụọhịn ohu, ọ nọ jẹn d'e kunrun nẹdi ẹ imẹ ugbo ebe ya lẹ ndị rị a ghọn'a ihiẹn-ugbo rị.

¹⁹ Ọ nọ yimẹni nẹdi ẹ, “Isi m! Isi m!” Nẹdi ẹ nọ sị odibo ẹ ohu, “Pa a jẹnni nnẹ ẹ.”

²⁰ Ya odibo hụ nọ parị a, pa a jẹnni nnẹ ẹ. Nwata hụ nọdị alị ụkụ nnẹ ẹ ebẹhụ ọ pa a d'e ru efinaị, ọ nọ nwụnhụn.

²¹ Okpoho ahụn nọ shi mmughẹ hụ rị elu, pa nwata hụ tọ enu bẹdi odibo Osolobuẹ, gụnma ụzọ, pụ.

²² Ọ nọ kpọ di ẹ, sị a, “Dodo, zihẹni m odibo ohu lẹ jaki ohu, nị m d'e kunrun odibo Osolobuẹ ozigbo, nị m lụaha.”

²³ Di ẹ nọ sị a, “K'i k'e kunrunn'ẹ tannị? Onwọnni ofufe rị ichẹn rị tannị — kẹ mmẹmmẹ ifọn-ọhụn kẹ ụhụọhịn Ezumikẹn.” Okpoho hụ nọ sị a, “Nsọngbu arịa.”

²⁴ Okpoho nwẹn nọ dọ ihiẹn o gi a nọdị elu jaki ye, sị odibo ẹ, “Nje; ozigbo-ozigbo: etukwọlẹ m nyinmẹ ẹkẹrẹ-ẹkẹrẹ sụkpan nị mmẹ gwa ị.”

²⁵ Okpoho hụ nọ buli d'e kunrun odibo Osolobuẹ ebe ọ rị Ugu-Kamẹlụ. Mgbe Ẹlaịsha gi lechen'ẹ, ọ nọ sị odibo ẹ wụ Gẹhazi, “Lẹhụ onyẹ Shunẹm!

²⁶ Dodo, gbaburu ẹ, y'a jụ a, ‘Ị hụ mma? Di i hụ mma? Nwa ị hụ mma?’ ” Okpoho ahụn nọ sị, “Ihiẹn ile hụ mma.”

²⁷ Ogẹn o gi ru ebe odibo Osolobuẹ wụ Ẹlaịsha rị, ọ nọ fiedọn ẹ ụkụ. Gẹhazi nọ bịa n'o nupụ a. Kanị odibo Osolobuẹ nọ sị a, “Hapụ a ye! O nwọn ihiẹn rị a fụn'a ọda-ọda, kanị Osolobuẹ zuemẹni m'ẹ, Osolobuẹ eke gwa m ihiẹn ọ wụ.”

²⁸ Okpoho hụ nọ sị, “Diọkpa, m rịọ ị nwa? A gwanị m'ị, ‘A tụlẹ m ntụ’?”

²⁹ Ẹlaịsha nọ sị Gẹhazi, “Fa ẹwuru i ye ukun ọhụnma n'ọ n'ị gba ọsọ, y'e weri ọkpọ m, gbama ọsọ. I hụn ịhịan ụzọ, akụsịkwọlẹ n'i kele ẹ; onyẹ kele i, ekwelẹ. I ru ẹ, y'e bu ọkpọ m nị kwasị nwata hụ ihun.”

³⁰ Nnẹ nwata hụ nọ sị, “Ma Osolobuẹ, Ma isi i, ahatukọ m'ị.” Ya Ẹlaịsha nọ lihi, sọnmẹ ẹ.

³¹ Gẹhazi buni wẹ ụzọ jẹnmẹ, ọ nọ bu ọkpọ hụ kwasị nwata hụ ihun, kanị nwata ekwọnni, o mẹhunmẹni. Gẹhazi nọ kinhẹn azụụn d'e kunrun Ẹlaịsha, sị a, “Nwata ahụn etẹnhinni.”

³² Ẹlaịsha e ru mmụlọ ebẹhụ, e lee nwata hụ nwụnhụngụnị elu-bẹdi Ẹlaịsha!

³³ Ya ọ nọ banye, kpọkin enwẹn ẹ lẹ nwata hụ ye imẹ ụlọ, mẹ ekpere rịọ Osolobuẹ.

³⁴ O nyinrin bẹdi ahụn, dinẹkwasị nwa-ndu ahụn, bu ọnụ a che ẹ ọnụ, bu ẹnya a che ẹ ẹnya, tịnpụ ẹka ẹbụọ kwasị a ẹka ẹbụọ. Hụn ahụn ọ tịnpụ enwẹn ẹ kwasị a, ẹhụ nwa-ndu hụ nọ kpọnmẹ ọkụn.

³⁵ Ẹlaịsha nọ lihi; e jẹnjẹn, e jẹnlụa imẹ ụlọ ebẹhụ; o nyinrinzi elu-bẹdi hụ, dinẹkwasịzị nwa-ndu ahụn. Ya nwata hụ nọ ziẹn uziẹnrẹn mgbe ẹsa, shịapụ ẹnya.

³⁶ Ẹlaịsha nọ hị Gẹhazi, sị a, “Kpọha onyẹ Shunẹm.” Ọ nọ kpọ a. Okpoho hụ a banhan, Ẹlaịsha nọ sị a, “Weri nwa ị.”

³⁷ Okpoho nwẹn nọ gbuni Ẹlaịsha osekpu, hulụan'a isi; ọ nọ weri nwa a, pụ.

Ẹlaịsha A Rọ Nshi Rị Ihiẹn-oriri

³⁸ Ogẹn Ẹlaịsha gi lụakinhẹn Gil'galụ, ụnwụn rị a mụ ẹgbẹrẹ hụ. Ebe ya lẹ itu ndị amụma rị e zu, ọ nọ sị odibo ẹ, “Bu ite hi-ogbe che ọkụn n'i gbuni ndịnị awaị.”

³⁹ Onyẹ ohu imẹ wẹ nọ shi ọfịa d'a kpa mkp'ẹhụhụọ. Ọ nọ hụn vaịnị-ọfịa. Ọ nọ tụtụ ogbe vaịnị-ọfịa, tụtụjun ẹwuru ẹ. Ọ lụaha, ọ nọ ja wẹ ye imẹ ite, onwọnni onyẹ marịn nị.

⁴⁰ Wẹ nọ hupụha awaị hụ. Kanị e rimẹ w'ẹ, wẹ nọ yimẹ, “Heuu, odibo Osolobuẹ! Ihiẹn-oriri rị imẹ iteni k'a saẹka gbukwọ ịhịan!” Ọ nịnị wẹ ri.

⁴¹ Ẹlaịsha nọ sị, “Wẹhẹ ni ọka wẹ gweriẹn” Ọ nọ bu ẹ che imẹ ite hụ, sị, “Ke ni ni wẹ ya nị wẹ ri.” Onwọnzini ihiẹn mẹn'ẹ.

Kẹ Ẹlaịsha Dọn Yejun Mmadụ Ọgụn-isẹn Ẹfọ

⁴² Okẹnnyẹ ohu gha Baalụ-Shalisha wẹhẹni odibo Osolobuẹ wụ Ẹlaịsha ogbe brẹdi ọgụn wẹ gi ọka-bali ibuzọ kagụnị mẹmẹ lẹ ukun ọka oyiyi. Ẹlaịsha nọ sị odibo ẹ, “W'ẹ ye ndị amụmanị ri.”

⁴³ Odibo ẹ nọ sị a, “Nanị m'e ye mmadụ ọgụn-isẹn ihiẹn ntanị ri?” Kanị Ẹlaịsha nọ sị a, “W'ẹ ye wẹ ri. Osolobuẹ sị, ‘Wẹ k'e rijun ẹfọ, ọ họdụdẹ.’ ”

⁴⁴ Ya ọ nọ bupụhanị wẹ ya, wẹ nọ ri, rihọdụ, ihiẹn Osolobuẹ ku a bụn.