Ndị-nze Nke Ẹbụọ 3 - Ika

Isi Nke Ẹtọ Agha E Seni Izrẹlụ Lẹ Mụabụ

¹ Hụn mẹ ahụa mmẹsatọ Jehoshẹfatị kịma Juda kẹ Joram nwa Ehabụ kịma ndị Izrẹlụ ẹbamịn-ugu. Joram nọ Sameria kị Izrẹlụ rị azụụn hụ ahụa mmẹbụọ.

² O mẹ eje-ihiẹn ẹnya Osolobuẹ, kanị o mẹruni hụn nẹdi ẹ lẹ nnẹ ẹ mẹ. O huepụghọ ọmụma hụ nẹdi ẹ kọma wẹ gi a rụa Baalụ.

³ Kanị ọ hụkwọ e mẹ njọ Jerobụam nwa Nebatị, njọ hụn ọ dọ Izrẹlụ ye imẹ ẹ; ọ latọnị njọ ndị hụ.

⁴ Mẹsha eze Mụabụ a zụn atụnrụn. Ụmụ atụnrụn nnụ-uku ọgụn-isẹn (100,000) lẹ ẹṅẹnrẹn wẹ kọpụha ebulu nnụ-uku ọgụn-isẹn (100,000) kẹ Mẹsha wẹ gi a kụ eze Izrẹlụ ẹbamịn-ugu ụgwọ-isi ahụa-ahụa.

⁵ Kanị, ogẹn Ehabụ gi nwụnhụngụ, eze Mụabụ nọ sị ọ kụkọzị eze Izrẹlụ Ẹbamịn ugu ụgwọ-isi.

⁶ Ya eze wụ Joram nọ gha Sameria buli, kpọnrin ndị-agha Izrẹlụ ile.

⁷ Ya ọ nọ zi ozini jẹnni Jehoshẹfatị wụ eze Juda: “Eze Mụabụ e femẹgụọnị m isi. Nị ị sọnjẹn m d'a lụsọn ndị alị Mụabụ agha?” Jehoshẹfatị nọ sị a, “Mmẹ lẹ ịyụ wụ ohu; ndị nke m wụ ndị nke i; ẹshin m wụ ẹshin i.”

⁸ Jehoshẹfatị nọzị sị a, “Elee ụzọ kẹ ẹnyi k'a gha?” Ọ nọ sị a, “Ụzọ rị alị ọkpọ-nkụn Ẹdọm kẹ ẹnyi k'a gha.”

⁹ Ya eze Izrẹlụ ẹbamịn-ugu nọ buli, ya lẹ eze Juda lẹ eze Ẹdọm. A ghapụ wẹ ụzọ hụn tegbu enwẹn ẹ rị imẹ alị ọkpọ-nkụn ọrọgbọ akpọhịn ẹsa, mirin wẹ nọ gụ, ahụnzịnị wẹ kẹ hụn ndị-agha k'a ra kẹ hụn anụ wẹ k'a ra.

¹⁰ Ya eze Izrẹlụ ẹbamịn-ugu nọ yi, “Kịnị! Osolobuẹ kpọkikomẹdẹ ẹnyi ndị nze ẹtọ n'o buhụ ẹnyi che ẹka eze Mụabụ ra?”

¹¹ Ya Jehoshẹfatị nọ sị a, “Onwọnni onyẹ amụma Osolobuẹ rị ebeni, hụn ẹnyi a gha ẹka a chọ uche Osolobuẹ?” Onyẹ ohu imẹ ndị e sọn eze Izrẹlụ hụ nọ sị, “Ẹlaịsha nwa Shafatị hụ a. Ya te wụ odibo Ẹlaịja.”

¹² Jehoshẹfatị nọ sị, “Osolobuẹ gi ẹ e ku oku ọhụnma-ọhụnma.” Eze Izrẹlụ lẹ eze Juda lẹ eze Ẹdọm nọ jẹnburu Ẹlaịsha.

¹³ Ẹlaịsha nọ sị eze Izrẹlụ ẹbamịn-ugu, “Kị biri mmẹ lẹ ịyụ? Jẹn d'e kunrun ndị-amụma nẹdi i lẹ ndị-amụma nnẹ i.” Eze Izrẹlụ ẹbamịn-ugu nọ sị, “Mba, Osolobuẹ wụ onyẹ hụn kpọkikomẹ ẹnyi ndị-nze ẹtọnị n'o d'e bu ẹnyi che ẹka eze Mụabụ.”

¹⁴ Ẹlaịsha nọ sị a, “Ma Osolobuẹ nwọn ikẹn ile hụn m wụ odibo ẹ, omẹni ẹlẹ hụn m rị e lee eze Juda wụ Jehoshẹfatị ẹnya ihun, m'e ke feyedẹn'i ẹnya mọbụ buchen'i ọnụ.”

¹⁵ “Chọhanị nị m nwan onyẹ a kpọ ụbọ.” Kẹ onyẹ hụ a kpọ ụbọ rị a kpọ ụbọ, ikẹn Osolobuẹ nọ banye imẹ Ẹlaịsha,

¹⁶ Ẹlaịsha nọ sị wẹ, “Osolobuẹ sị, ‘Gu ni mgbugbu jun imẹ ọdanmgbugbuni.’

¹⁷ Makẹni, Osolobuẹ sị, ‘Ụnụ ahụnkọ ufere mọbụ mirin ozuzue, kanị mirin k'e jun imẹ ọdanmgbugbuni, kẹni ụnụ lẹ efin ụnụ lẹ anụ ụnụ hụn ra.’

¹⁸ Ọnwan afụkọ Osolobuẹ ọrụn. Osolobuẹ k'e buzikwọ Mụabụ che ọnụ ẹka.

¹⁹ Ụnụ k'e tikpọchanrịn obodo ile wẹ tụnhunmẹ mgbọn lẹ obodo ile rị mkpa. Ọnụ k'e gbutuchanrịn osisi wẹ ile rị mma, gi ihiẹn fakin isi-mirin wẹ ile, kpọn ọmụma jun ugbo ile rị mma wẹ rụn.”

²⁰ Eki e fọn, o ru ogẹn hụ ndị Izrẹlụ gi a chụnnị Osolobuẹ ẹjan ọtụntụn, e lee mirin gha nkọ Ẹdọm hula! Mirin e jun alị ile.

²¹ Ogẹnni, ndị Mụabụ a nụgụọ nị ndị-nze ndị hụ a bịagụọ d'a lụsọn wẹ ọgụn. Ya wẹ nọ kpọpụha ikẹnnyẹ wẹ ile, kẹ ikoro kẹ ikẹnnyẹ-ọba, hụn k'a s'ẹka bu ihiẹn-ọgụn, wẹ ile nọ pụha okẹn d'e che.

²² Kẹ wẹ lihi ọtọ ụzọ ọtụntụn, anwụn rị e tiye imẹ mirin ahụn. Ndị Mụabụ e lecheni mirin ahụn, ọ hụ e nwun ufie-ufie, nọkẹ ẹdeke.

²³ Ya wẹ nọ sị, “Ẹdeke rọ! Ọ nọkẹsị ndị-nze ndị ahụn a lụsọngụọ ibe wẹ ọgụn, gbutarị enwẹn wẹ! Mụabụ-o, d'a kwarị nị nwan ihiẹn wẹ-o!”

²⁴ Kanị, mgbe ndị nke wẹ gi ru ebe ndị Izrẹlụ rị, ya ndị Izrẹlụ nọ maye wẹ ọgụn, d'e ru n'a gbanị wẹ ndị Izrẹlụ ọsọ. Ndị Izrẹlụ nọ chụ wẹ, gbu wẹ eje-ogbugbu.

²⁵ E tikpọsọnmẹ wẹ obodo ndị Mụabụ; okẹnnyẹ ọwụlẹ nọ masọnmẹ ọmụma ye ugbo ile rị mma, ma a d'e ru ni ọmụma e kpumẹchanrịn ugbo. A fakinchanrịn wẹ isi-mirin ile rị alị hụ, gbutuchanrịn osisi ile rị mma rị alị ahụn. Kiri-Harẹsẹti sụọ nọ họdụ, enutuni wẹ ọmụma ndị wẹ gi tụn a, kanị ndị a gba araba nọ kehunmẹ ẹ, kịzịkwọ ẹka nụmanị ya nwẹn.

²⁶ Ogẹn eze ndị Mụabụ gi hụn a nị ẹka ndị Izrẹlụ a karị, ọ nọ weri mmadụ ọgụn-mmisẹn kwasị nnụ (700) gi ọpịa-agha a lụ ọgụn, nị wẹ zụnban d'a lụsọn eze Ẹdọm, kanị asanị wẹ ẹka.

²⁷ Ya eze Mụabụ nọ weri okẹnnyẹ ibuzọ a, hụn nkẹ e rikin ẹ eze, nọ elu mgbọn obodo hụ gi ẹ chụn ẹjan w'a dụn ọkụn. Okẹn ize nọ ban ndị Izrẹlụ, ndị Izrẹlụ nọ la alị wẹ.