Ndị-nze Nke Ẹbụọ 2 - Ika

Isi Nke Ẹbụọ Ẹlaịja A Lashi Elu-igwee

¹ O rugụọ ogẹn Osolobuẹ k'e gi gi ufere-ohiohi buru Ẹlaịja lashi elu-igwee. Ẹlaịja lẹ Ẹlaịsha gha Gil'galụ pụkọ.

² Ẹlaịja nọ sị Ẹlaịsha, “Nọdị ebeni, nị Osolobuẹ zi m Bẹtẹlụ.” Kanị Ẹlaịsha nọ sị a, “Ma Osolobuẹ lẹ isi i, aghakọ m ebe ị rị pụ.” Wẹ ẹbụọ nọ wịrị shi Bẹtẹlụ.

³ Itu ndị-amụma rị Bẹtẹlụ nọ bịa d'e kunrun Ẹlaịsha, jụ a, “Y'a a marịnghọ nị Osolobuẹ k'a napụ ị di-nwọnni i tannị?” Ẹlaịsha nọ sị wẹ, “A marịngụọ m. Gba nị nkịtịn.”

⁴ Ẹlaịja nọzị sị Ẹlaịsha, “Ẹlaịsha, nọdị ebeni, nị Osolobuẹ zi m Jẹriko.” Ẹlaịsha nọ sị a, “Ma Osolobuẹ lẹ isi i, aghakọ m ebe ị rị ị pụ.” Ya wẹ nọ shi Jẹriko.

⁵ Itu ndị amụma rị Jẹriko nọ jẹnburu Ẹlaịsha, sị a, “Y'a marịnghọ nị Osolobuẹ k'a napụ ị di-nwọnni i tannị?” Ẹlaịsha nọ sị wẹ, “A marịngụọ m. Gba nị nkịtịn.”

⁶ Ẹlaịja nọ sị Ẹlaịsha, “Nọdị ebeni; Osolobuẹ zi m Iyi Jọdanị.” Ẹlaịsha nọ sị a, “Ma Osolobuẹ lẹ isi i, aghakọ m ebe ị rị pụ.” Ya wẹ ẹbụọ nọ jẹnsọnmẹ.

⁷ Ya mmadụ iri kwasị ọgụnnaị imẹ itu ndị-amụma nọ jẹn d'e wuzo ebe te ẹkẹrẹ, e lee Ẹlaịja lẹ Ẹlaịsha ebe wẹ wuzo mkpẹnrẹn iyi Jọdanị.

⁸ Ẹlaịja nọ weri ẹkwa o yi elu ẹwuru ẹ, fịfịma a, gi ẹ fịan mirin hụ. Mirin nwẹn nọ kewa, nọdị azụụnnị lẹ azụụnnị, wẹ ẹbụbụọ nọ gha ebẹhụ kọrọnị fetu.

⁹ E fetugụ wẹ, Ẹlaịja nọ jụ Ẹlaịsha, “Kị m'e mẹn'i wẹ gini d'e wepụ m ebe ị rị?” Ya Ẹlaịsha nọ sị a, “Dodo, nị m nwọnhẹn ikẹn ị ụzọ ẹbụọ kẹni m nọkin ẹnya ị.”

¹⁰ Ẹlaịja nọ sị a, “Ihiẹn ị rịọ e zekẹ; kanị omẹni y'a hụn m ogẹn wẹ gi wepụkọ m ebe ị rị, y'e nwọnhẹn ẹ, o mẹkwọnị y'a hụnnị m o rukọ ị ẹka.”

¹¹ Hụn ahụn wẹ ẹbụọ shikọ inyẹnrẹn jẹnkọ, idẹnmizi, ụgbọ-ẹshin wụchanrịn ọkụn lẹ ẹshin ndị dọkpụnkọn'a wụzị ọkụn nọ pụha, gha ẹgbata wẹ ẹbụọ, kebe wẹ. Ufere-ohiohi nọ buru Ẹlaịja lashi elu-igwee.

¹² Ẹlaịsha hụ e lee ẹ, e yi, “Baba, Baba! Ụgbọ-ẹshin lẹ ndị e nyin ẹshin alị Izrẹlụ!” Ẹlaịsha eleghazịnị Ẹlaịja. Ẹlaịsha nọ kwọndọn ẹwuru ya nwẹn yi, dọwa wẹ.

¹³ Ya ọ nọ tụtụrụ ẹwuru Ẹlaịja e yiye elu ẹwuru ẹ, hụn dannahịn Ẹlaịja; ọ nọ kin azụụn, wuzo mkpẹnrẹn Iyi-Jọdanị.

¹⁴ Ọ nọ weri ẹwuru Ẹlaịja ahụn, gi ẹ fịan mirin hụ, sị, “Elebe kẹ Osolobuẹ wụ Chuku Ẹlaịja rị?” Hụn o gihụ gi ẹ fịan mirin ahụn, mirin nọ kewa ẹbụọ, nọdị azụụnnị lẹ azụụnnị; ya Ẹlaịsha nọ ghafe.

Ẹlaịsha A Nọkin Ẹnya Ẹlaịja

¹⁵ Ogẹn itu ndị-amụma hụ gha Jẹriko bịa, hụn rị e lechen'ẹ gi hụn ihiẹnni, wẹ nọ sị, “Mmọn Ẹlaịja a bangụọ imẹ Ẹlaịsha.” Wẹ nọ jẹnburu Ẹlaịsha, hulụan'a isi alị.

¹⁶ Wẹ nọ sị a, “Lee ẹ, ẹnyi ndị idibo i nwọn mmadụ iri kwasị ọgụnnaị ka-ẹhụ ọhụnma-ọhụnma. Dodo, nị wẹ jẹnlele d'a chọ di-nwọnni i. Ikẹnkwọ Mmọn Osolobuẹ e burugụọ a, butọ enu ugu mọbụ imẹ ọdanmgbugbu.” Ọ nọ sị wẹ, “Mba; ezilẹ ni wẹ.”

¹⁷ Kanị a tọ w'a a sị nị wẹ jẹn, nị wẹ jẹn, d'e ru n'ọ nịzịn'a jụ. Ya ọ nọ sị, “Zi ni wẹ nwan.” Wẹ nọ zi mmadụ iri kwasị ọgụnnaị d'a chọ a. A chọ wẹ Ẹlaịja akp'ọhịn ẹtọ, ahụnnị w'a.

¹⁸ Mgbe wẹ gi kinhẹn d'e kunrun Ẹlaịsha imẹ Jẹriko, ọ nọ sị wẹ, “Agwagụọnị m ụnụ ejẹnlẹ?”

Ẹlaịsha E Mẹ Mirin Jẹriko Rịzị Mma

¹⁹ Ndị obodo Jẹriko hụ Ẹlaịsha rị nọ sị a, “Diọkpa, y'a hụnghọ nwan nị ebe obodoni rị e te rịka mma; kanị mirin rịn'a arị mma, alị nkẹ arị e mẹ ihiẹn.”

²⁰ Ọ nọ sị wẹ, “Wẹhẹni ni m afẹrẹ ọhụn, ụnụ e bu nnu che imẹ ẹ.” Ya wẹ nọ wẹhẹn'ẹ.

²¹ Ọ nọ jẹn isi-mirin ahụn, ebe ọ gha a gbapụha, hu nnu hụ ye ẹ, sị, “Lee ihiẹn Osolobuẹ ku, ‘E mẹgụọ m mirinni rị mma. O gbukọzị ihiẹn; ọ hankọzị alị emẹlẹ ihiẹn.’ ”

²² Mirin ahụn rịkwọ nwan mma d'e ru tannị. Oku Ẹlaịsha a bụnghọ.

Ihiẹn Eje-anụ Mẹ Ụmụẹka Mụ Ẹlaịja Ẹmụ

²³ Ẹlaịsha nọ gha Jẹriko shi Bẹtẹlụ. Ebe ọ ghakọ ụzọ, ikorọbịa nọ gha imẹ obodo pụha, mụma a ẹmụ, a sị, “Isi-akpan, e jẹn! Isi-akpan, e jẹn!”

²⁴ Ogẹn Ẹlaịsha gi gbehutọ, hụn wẹ, ọ nọ gi ẹfan Osolobuẹ bụ wẹ ọnụ. Ya kẹ onyẹnnyẹ eje-anụ biẹ ẹbụọ nọ gha imẹ ẹgboko hụ pụha, dọrinrin mmadụ ẹbụọ kwasị ọgụnnaị imẹ wẹ.

²⁵ Ẹlaịsha nọ gha ebẹhụ shi Ugu-Kamẹlụ, gha ebẹhụ lakin Sameria.