Ndị Kọrẹntị Nke Ẹbụọ 4 - Ika

Isi Nke Ẹnọ Ndị Rị A Rụnnị Ukpẹ Ọrụn

¹ Ebe o mẹ ni omikẹn Osolobuẹ kẹ ẹnyi gha nwọnhẹn ọrụnnị, ndụn ara gụ ẹnyi.

² Ẹnyi a jụgụọ ihiẹn-ifẹnrẹn ndị hụ ịhịan e zuemẹ; ẹnyi ara mẹ ẹro mọbụ tụ ntụ ye oku Osolobuẹ. Kama, ẹnyi hụ e kuchanrịn ezioku k'ọ nọ, e gi ẹ e we enwẹn ẹnyi a ghọsị ịhịan ile idẹnya Osolobuẹ, kẹni wẹ e gi akpakalị obi wẹ e lele kẹ ẹnyi nọ.

³ Omẹni echẹn kẹ oziọma ẹnyi rị e zi zueri ezueri, ndị rị a la iwi sụọ k'o zueri ẹnya.

⁴ Mmọn rị a kị ụwanị e kẹnkingụọ ẹnya ndị kwerilẹni, amamgbe w'e legha ukpẹ oziọma rị a ghọsị wẹ banyeni onyẹ Kraịstị wụ; Kraịstị hụn o mẹ ni onyẹ hụnn'a a hụngụọ Osolobuẹ.

⁵ Makẹni ẹlẹ oku ẹnyi lẹ enwẹn ẹnyi kẹ ẹnyi rị e ku; ozi ẹnyi wụ nị Kraịstị wụ Jizọsị wụ Di-nwọnni-ẹnyi, nị ẹnyi nwẹn wụ idibo ụnụ makẹ ufiri Jizọsị.

⁶ Makẹni, Osolobuẹ hụn sị, “Ukpẹ ya nwunmẹ ebe ishi rị” e nwun nwangụọ nwan imẹ obi ẹnyi hụn ẹnyi gi saẹka legha ọghọ Osolobuẹ ihun Kraịstị.

Ihiẹn Rị Mkpa W'e Buche Imẹ Ihiẹn E Tikpọnị

⁷ Kanị Osolobuẹ buche ọrụn oziọmanị rị okẹn mkpa imẹ ẹnyi, ẹnyi ndị wụhụ ite-ụrụa e tikpọnị, kẹni o we ẹnya nị ikẹnni pụ-ichẹn ẹnyi gi a rụn a wụ nke Osolobuẹ, n'ọ ghanị ẹka ẹnyi bịa.

⁸ W'e mẹshi ẹnyi ikẹn ụzọ ile, kanị w'a ra saẹka gweriẹn ẹnyi; ihiẹn a gba ẹnyi ngharị-ẹnya, kanị ara karị ẹnyi ẹka;

⁹ wẹ hụ e kpokposọnmẹ ẹnyi, kanị Osolobuẹ ajụkwọnị ẹnyi tọ; w'a kụtu ẹnyi, kanị ẹnyi ara nwụnhụn.

¹⁰ Ẹnyi hụ e sọn Jesu a nwụn ogẹn ile kẹni w'e gi ndụn ẹnyi rị a marịn nị Jesu rị ndụn.

¹¹ Makẹni, ọnwụn hụ a kpọ ẹnyi ihun ogẹn ile makẹ ufiri Jizọsị, kẹni wẹ gi ẹhụ ẹnyini jụ n'ọ nwụnkọ a hụn nị Jizọsị rị ndụn.

¹² Ya wụ nị ọnwụn rị ọrụn ẹhụ ẹnyi, kanị, ndụn k'ọ rị a rụnpụha imẹ ụnụ.

¹³ Makẹni ẹnyi nwọnzi okukwe ohu ahụn wẹ ku oku ẹ imẹ Ẹkụkwọ-nsọ, sị, “M kweri ekweri, ya haịn m gi ku ihiẹn m ku,” ẹnyi nwẹn kwerizi ekweri, ya haịn ẹnyi gi e ku oku-Chuku ẹnyi rị e ku.

¹⁴ Makẹni, ẹnyi a marịnghọ nị Osolobuẹ hụn gha ọnwụn weli Jesu Di-nwọnni-ẹnyi jẹnkọ d'e welizi ẹnyi k'o dọn weli Jesu, wẹhẹ ẹnyi lẹ ụnụ ihun ẹ.

¹⁵ Wẹ ile wụ n'ọ rịnị ụnụ mma, kẹni ndị ẹfọma Osolobuẹ rị e ru ẹka hụn ụzọ e buwaye ọda, ekele rị a bịanị Osolobuẹ a waye.

¹⁶ Ndụn agụkọ nwan ẹnyi: ọsụọn'a nị ẹhụ rị a kpọ ẹnyi nkụn, ẹnyi hụ e nwọnwaye ndụn ọhụn imẹ-mmọn ụhụọhịn-ụhụọhịn.

¹⁷ Makẹni, ẹnyi jẹnkọ d'e gi ẹkẹrẹ afụnfụnnị ghalẹni e bie ẹnyi rị a ta ogẹnni nwọnrin ọghọ itẹbitẹ ọnụ ghalẹni a saẹka e ku hụn Osolobuẹ jẹnkọ d'e ye ẹnyi.

¹⁸ Ẹghẹẹ, makẹni ẹnyi arị e lee ihiẹn ẹnya e legha, kanị ihiẹn ẹnya ghalẹni e legha; makẹni ihiẹn ẹnya e legha k'a gharị, kanị ihiẹn ẹnya ghalẹni e legha k'a rị jẹnrin ejẹn.