Ndị Kọrẹntị Nke Ẹbụọ 3 - Ika

Isi Nke Ẹtọ Ndị-ọrụn Nkwerigbama Ọhụnnị

¹ Ẹnyi rịdẹ nwan a ja enwẹn ẹnyi mma ra? Ẹnyi rịdẹ nwan ndị wẹ e deye ẹhụhụọ nị ụnụ hụn ụzọ nabanhan wẹ mọbụ ndị ụnụ k'e deyerịrị hụn wẹ e gi nabanhan wẹ ra?

² Mba! Ụnụ lẹ enwẹn ụnụ wụ ẹhụhụọ-ozi Osolobuẹ lẹ enwẹn ẹ deye ẹnyi, hụn o deye imẹ obi ẹnyi, hụn ịhịan ile marịn lẹ hụn ịhịan ile a gụn.

³ Ihiẹn wẹ a hụn ebe ụnụ rị a ghọsị nị ụnụ wụ ẹhụhụọ-ozi Kraịstị de, hụn ọ gha ẹka ẹnyi zihẹ. Ẹlẹ hụn wẹ gi pẹni de, kanị hụn wẹ gi Mmọn-nsọ Osolobuẹ de — Osolobuẹ hụn rị ndụn; ẹlẹ hụn wẹ deye ibe ọmụma — rịkẹ Iwu mbụ ahụn, kanị hụn wẹ deye obi ịhịan.

⁴ Ẹrịra kẹ obi ruhan ẹnyi alị ihun Osolobuẹ makẹ Kraịstị.

⁵ Ẹlẹni o nwọn hụn ẹnyi saẹka mẹ hụn ẹnyi k'a sị n'ọ gha ẹka ẹnyi bịa; Osolobuẹ haịn ẹnyi gi a saẹka.

⁶ Osolobuẹ mẹ ẹnyi gi wụrụ ndị ma rụn ọrụn nkwerigbama ọhụnnị, ẹlẹ nke Iwu wẹ de ede, kanị nke Mmọn-nsọ. Makẹni Iwu wẹ de e gbu egbu, kanị Mmọn-nsọ e ye ndụn.

Nkwerigbama Akan Lẹ Nke Ọhụn

⁷ Ofufe mbụ hụ e gbuni, ofufe wẹ deye ọmụma mmaka, e nwọnghọ ọghọ. Omẹni o nwọn ọghọ nke wụ nị ndị Izrẹlụ asanị ẹka ledẹ Mozizi ẹnya ihun makẹni ọghọ a, hụn fapụnị hụn rị Mozizi ẹhụ rị e gbukepụ,

⁸ ofufe hụnnị wẹ gha ẹka Mmọn-nsọ e fe akakọ a nwan ọghọ e nwọn ọhụnma-ọhụnma?

⁹ Omẹni ofufe hụ wẹ gi a ma ịhịan ikpe e nwọnghọ ọghọ, ya wụ nị ofufe hụnnị wẹ gi a kpọ ịhịan onyẹ ezi-omumẹ k'a ka a ọghọ e nwọn, ka a ọhụnma-ọhụnma!

¹⁰ Ezioku rị n'a wụ nị ofufe nwẹn te nwọn ọghọ mbụ enwọnzi nwan ọghọ, kaka, makẹni hụn ka ọghọ e nwọn e kpumẹgụọ a.

¹¹ O mẹ nwan nị nkwerigbama mbụ hụ tọlẹni lẹ ofufe rịn'a e nwọnghọ ọghọ, ya wụnị nke ọhụnnị hụn sikọ d'a rị jẹnrin ejẹn ka a ọghọ e nwọn ọhụnma-ọhụnma!

¹² Makẹni ẹnyi nwọn olilẹnya nọ ẹnịna, ẹnyi e ku, e kushi ikẹn;

¹³ ẹnyi anọnị kẹ Mozizi gi ẹkwa kpumẹ ihun, amamgbe ndị Izrẹlụ a hụn ebe ọghọ ahụn rị e gbukeni nọ fapụchanrịn.

¹⁴ Eziẹ, wẹ kpùmẹ nghọta wẹ ekpumẹ ogẹn hụ. D'e rukwọ nwan tannị, wẹ gha a gụn mọbụ e gọn ntịn ebe wẹ rị a gụn Ẹkụkwọ-nkwerigbama akan hụ ẹkwa hụ kpumẹhụkwọ uche wẹ — makẹni imẹ Kraịstị sụọ kẹ wẹ nọ e wepụ a.

¹⁵ Ẹghẹẹ, d'e rukwọ nwan tannị, ogẹn ọwụlẹ wẹ gi a gụnnị wẹ Iwu Mozizi, ẹkwa hụ e kpumẹchanrịn uche wẹ.

¹⁶ Kanị, ịhịan rogharị buruhẹ Di-nwọnni-ẹnyi, o wepụ a ẹkwa hụ kpumẹ uche ẹ.

¹⁷ “Di-nwọnni-ẹnyi” ahụn wẹ rị e ku oku ẹ wụ Mmọn-nsọ: ebe ọwụlẹ Mmọn Di-nwọnni-ẹnyi rị, ebẹhụ kẹ ịhịan nọ e weri enwẹn ẹ.

¹⁸ Ẹnyi ile wẹ kpupụgụ ẹkwa hụ ihun rị nwan e legha ọghọ Di-nwọnni-ẹnyi nọkẹ onyinyọn rị imẹ ughegbe; wẹ hụ e nwọnhutọ ẹnyi, e mẹ ẹnyi a rị kẹ Onyẹ ẹnyi rị e legha, e nwọn ọghọ a e nwọnwaye. Ihiẹnni gha ẹka Di-nwọnni-ẹnyi hụn wụ Mmọn-nsọ a bịa.