Ndị Kọrẹntị Nke Ẹbụọ 2 - Ika

Isi Nke Ẹbụọ

¹ Ya haịn m gi sị enwẹn m nị ẹlẹ m k'a bịazị, makẹ ọbịbịa m gha e buhẹni ụnụ ụfụ.

² Makẹni, m mẹ nwan ụnụ ihiẹn ụfụ, onyẹ k'e mẹzi ẹfọ sụọ m ụsụọ? Ụnụ m mẹgụ ihiẹn ụfụ?

³ Ihiẹn m gi deni ụnụ ẹhụhụọ-ozi hụ m de wụ amamgbe m'a bịa, ụnụ nwẹn, hụn nkẹ e mẹ m ghọghọ, e mẹ m ihiẹn k'a fụnị m. Makẹni, a marịnghọ m ụnụ ile ọhụnma-ọhụnma, nị, m ghọghọma, ụnụ ile a ghọghọma.

⁴ Ẹkwan lẹ ụfụ rị m obi kẹ m gi de ẹkụkwọ-ozi hụ. Edeni m'ẹ n'ọ fụ ụnụ, kanị m de ẹ ni ụnụ marịn nị ụnụ rị m obi ọda-ọda.

Gbagharị Nị Nwan Onyẹ Ahụn Mẹ Njọ

⁵ Omẹni o nwọn onyẹ mẹ ihiẹn ụfụ, ẹlẹ mmẹ sụọ k'o mẹ ẹ, kanị o nwọnghọ k'o dọn mẹ ezioku nị ụnụ ile k'o mẹ ẹ. M sị nị “o nwọnghọ k'o dọn mẹ ezioku” makẹni achọnị m nị m kpọyekẹnmẹ ẹ ọkụn.

⁶ Afụnfụnnị ụnụ ile gba ye hụnyẹ e higụọ a.

⁷ Gbagharị n'a nwan, gba a umẹ, amamgbe ọ fụ a ghafe okẹn, ndụn a gụ a.

⁸ Dodo ni nwan, ghọsịzịn'a ihiẹn-ọsụsụọ ụnụ.

⁹ Lee ni ihiẹn haịn m gi de ẹkụkwọ-ozi hụ: m de ẹ nị m gi ẹ lele ụnụ, marịn kẹ ụnụ k'e mẹchanrịn ihiẹn ile m sị ụnụ mẹ.

¹⁰ Onyẹ ụnụ gbagharị, a gbagharịgụọ m'a. Ihiẹn m gbagharị — omẹni o nwọnghọ ihiẹn m gbagharị — a gbagharịgụọ m idẹnya Kraịstị makẹ ufiri ụnụ,

¹¹ kẹni ẹnyi gi ẹ gbọndọn Ekwensụ, amamgbe ọ tụnarịn ẹnyi ihiẹn rị mma, makẹni ẹnyi a marịnghọ ẹro ẹ.

Nwẹnẹ i?

¹² Ogẹn m gi pụha Trasị kẹni m zi oziọma Kraịstị, m nọ hụn nị Di-nwọnni-ẹnyi a kpọpụgụọnị m ụzọ m'e gi rụn'a ọrụn ebẹhụ.

¹³ Kanị, obi eruni m alị makẹni ahụnnị m Taịtọsụ wụ nwẹnẹ m imẹ Kraịstị ebẹhụ. Ya m nọ sị wẹ nọdị ọhụnma, m nọ jẹnmẹ Masẹdonia.

Mmẹri Ghahanị Kraịstị

¹⁴ Kanị ekele ya rịnị Osolobuẹ — makẹni o yesọnmẹ ẹnyi mmẹri okpuru Kraịstị ebe-lẹ-ebe ẹnyi jẹn, e gi ẹnyi e mẹ ishin-ọma ozi Kraịstị e kungbarị ebe ile.

¹⁵ Makẹni, ebe Osolobuẹ rị, ishin Kraịstị kẹ ẹnyi wụ ebe ndị rị e nwọn nzụọpụha rị lẹ ebe ndị lakọ iwi rị.

¹⁶ Ebe ndị lakọ iwi rị, ẹnyi rị e shin ishin e gbuni; ebe ndị rị e nwọn nzụọpụha rị, ẹnyi rị e shin ishin e ye ndụn. Onyẹ k'a sa ẹka mẹ ihiẹn ndịnị?

¹⁷ Ẹnyi anọnị kẹ ndị bu ọda rị e ghoro oku-Chuku nọkẹ sị ibu-afịa rọ; kama, rịkẹ ndị rị imẹ Kraịstị, ẹnyi gi obi rị ọchan e ku kẹ ndị Chuku zi, ndị nọ idẹnya Chuku e ku.