Ndị Kọrẹntị Ibuzọ 7 - Ika

Isi Nke Ẹsa

¹ Nị ẹnyi leban nwan ihiẹn ndị ahụn ụnụ de ẹnya. “Omẹni okẹnnyẹ a nọkunmẹni okpoho, ọ hụghọzị mma.”

Nke Ibuzọ: Ọlụlụ Di-lẹ-nwunyẹ

² Kanị, makẹni ughẹrẹ jun ụzọ ile, okẹnnyẹ ọwụlẹ ya lụrụ nwunyẹ; okpoho ọwụlẹ ya lụrụ di.

³ Di k'a gha e mẹni nwunyẹ ẹ ihiẹn run'ẹ imẹ ọlụlụ di-lẹ-nwunyẹ; nwunyẹ ya e mẹzini di ẹ ẹrịra.

⁴ Makẹni, ẹlẹ nwunyẹ k'e ku ihiẹn o k'e gi ẹhụ a mẹ, di ẹ nwọn ku; ẹrịrazịkwọ, ẹlẹ di k'e ku ihiẹn o k'e gi ẹhụ a mẹ, nwunyẹ ẹ nwọn ku.

⁵ Egilẹ ni ẹhụ ụnụ a jọ ibe ụnụ ẹfọ, mmanị omẹni ụnụ kwerigbama nị ụnụ ye efe ẹkẹrẹ kẹni ụnụ gi ẹ mẹ ekpere, omẹgụ ụnụ a nọgbamazị, amamgbe Ekwensụ a nwan ụnụ, makẹni ụnụ asaẹka kwọndọnsọnmẹ enwẹn ụnụ.

⁶ Kanị m rịhụ a sị onyẹ ọwụlẹ lụrụ kẹni ọ nị mẹ, ẹlẹ iwu kẹ m rị e ye;

⁷ k'ọ rị m, ịhịan ile rị kẹ mmẹ. Kanị, onyẹ-onyẹ nwọn oyiye Osolobuẹ ye ẹ: onyẹ lẹ nke ẹ, onyẹ lẹ nke ẹ.

⁸ Nke ndị kelẹni lụ lẹ ndị di wẹ mọbụ nwunyẹ wẹ nwụnhụn, m sị wẹ n'ọ hụghọ mma nị wẹ nọdị nke wẹ, nọkẹ mmẹ.

⁹ Kanị, omẹni asakọ wẹ ẹka kwọndọn enwẹn wẹ, wẹ lụrụ, makẹni ọ ka mma nị ịhịan lụrụ di mọbụ nwunyẹ karị nị ẹgụn okpoho mọbụ okẹnnyẹ a tọ a gụn a.

¹⁰ Nke ndị lụgụnị, iwu m rị e ye wẹ wụ ọnwan (kanị ẹlẹ mmẹ rị e ye wẹ ya, Di-nwọnni-ẹnyi rọ): nwunyẹ ajụlẹ di ẹ mọbụ kpechan a.

¹¹ Kanị ọ jụ di ẹ mọbụ kpechan a, y'a lụlẹ onyẹ ọzọ. Hụn nkẹ o gi lụrụ onyẹ ọzọ, ya lẹ di ẹ sụọkin. Di, ya ekpechankwọlẹ nwunyẹ ẹ mọbụ jụ a.

¹² Nke ndị ọzọ, lee ihiẹn m sị wẹ mẹ (mmẹ rị e ku ọnwan, ẹlẹ Di-nwọnni-ẹnyi): omẹni onyẹ kwerini Kraịstị nwọn nwunyẹ kwerilẹni ni Kraịstị hụn kweri n'o sọn ẹ e bi, y'e kpechanl'a mọbụ jụ a.

¹³ Omẹni onyẹ kwerini Kraịstị nwọn di kwerilẹni ni Kraịstị hụn kweri n'o sọn ẹ e bi, y'e kpechanl'a mọbụ jụ a.

¹⁴ Makẹni di kwerilẹni ni Kraịstị a rịọlẹ nsọ ghahanị nwunyẹ ẹ hụn kwerini Kraịstị; nwunyẹ kwerilẹni a rịọlẹ nsọ ghahanị di ẹ hụn kwerini. Omẹni ẹlẹ ẹrịra, ụmụ ụnụ arịkọ nsọ, kanị wẹ rị nwan nsọ.

¹⁵ Kanị omẹni hụn kwerilẹni ni Kraịstị a jụ hụn kwerini Kraịstị, ya rị ẹrịra. Ọ rị ẹrịra, onwọnni iwu gi hụn kwerini, makẹni udọn kẹ Osolobuẹ kpọnị ẹnyi.

¹⁶ Nwunyẹ, y'a marịnghọ kẹ ẹka ị kẹ w'a gha zụọpụha di i? Di, y'a marịnghọ kẹ ẹka ị kẹ w'a gha zụọpụha nwunyẹ i?

Nọdị Ọnọdị Ị Rị Kẹ Osolobuẹ Kpọ Ị

¹⁷ K'osilẹrị, onyẹ-onyẹ lẹ hụn Di-nwọnni-ẹnyi ye ẹ bi; onyẹ-onyẹ ya bimẹ hụn Osolobuẹ kpọ a d'e bi; ọhụn kẹ m'a kuzi imẹ ụka Kraịstị ile.

¹⁸ Omẹni ịhịan a kwagụọ ugun nị Osolobuẹ d'a kpọbanhan a imẹ Kraịstị, y'a chọlẹ n'o wepụ apa ugun ọ kwa; omẹni ịhịan akwanị ugun nị Osolobuẹ d'a kpọbanhan a imẹ Kraịstị, y'a kwalẹ ugun.

¹⁹ Ịkwa-ugun enwọn ihiẹn ọ wụ; akwanị-ugun enwọn ihiẹn ọ wụ; ihiẹn rị mkpa wụ imẹ ihiẹn Osolobuẹ ku.

²⁰ Onyẹ-onyẹ ya nọdị k'ọ rị kẹ Chuku kpọbanhan a.

²¹ Ị wụ igbọn k'ọ kpọbanhan ị? Anịlẹ ọhụn sọngbu i; kanị omẹni y'a hụn oghere y'e gi weri enwẹn i, ye e weri enwẹn i.

²² Makẹni, omẹni ịhịan wụ igbọn kẹ Osolobuẹ kpọbanhan a imẹ Di-nwọnni-ẹnyi, onyẹ nwọn enwẹn ẹ k'ọ wụ imẹ Di-nwọnni-ẹnyi. Ẹrịrazịkwọ, onyẹ hụn wụlẹni igbọn kẹ Osolobuẹ kpọbanhan a wụ nwan igbọn Kraịstị.

²³ Osolobuẹ ṅọn ụnụ eṅọn; awụrụlẹni igbọn ịhịan.

²⁴ Umunẹ m, nọdị nị nwan ọnọdị ọwụlẹ ụnụ rị kẹ Osolobuẹ kpọbanhan ụnụ e fe Osolobuẹ.

Ndị Nwọnlẹni Di Mọbụ Nwunyẹ

²⁵ Nị ẹnyi ku nwan banyeni ndị lụlẹni di mọbụ nwunyẹ. Onwọnni ihiẹn Di-nwọnni-ẹnyi sị m ku, kanị m rị e ku uche m, nọkẹ onyẹ furu wẹ gi e dọn ẹnya ghahanị omikẹn Di-nwọnni-ẹnyi.

²⁶ Makẹni elu e zekẹ, e roghọ m'a n'o furu ni ụnụ nọdị kẹ ụnụ nọ.

²⁷ Omẹni y'a lụrụgụọ di mọbụ nwunyẹ, achọlẹ n'i kpechan a; omẹni y'e nwọn nwunyẹ, achọlẹ nwunyẹ;

²⁸ kanị ị lụrụ nwunyẹ, y'e mẹni njọ; okpoho kelẹni lụ di lụrụ di, o mẹni njọ. Kanị, ndị lụ di mọbụ nwunyẹ jẹnkọ d'e nwọn nsọngbu elu ụwanị. Nsọngbu ahụn kẹ m chọkọ nị m napụ ụnụ.

²⁹ Umunẹ m, ihiẹn m gi ẹ e ku wụ nị ogẹn arịzị a; gha kikẹnni jẹnmẹ, ndị hụn nwọndẹ nwunyẹ wẹ bimẹ nọkẹ sị enwọn wẹ;

³⁰ ndị rị a kwannị, wẹ bimẹ nọkẹ sị arị wẹ a kwan; ndị rị a ghọghọnị wẹ bimẹ nọkẹ sị arị wẹ a ghọghọ; ndị e ṅọnni, wẹ bimẹ nọkẹ sị onwọnni ihiẹn wẹ nwọn;

³¹ ndị hụn gi ihiẹn ụwa e bi, wẹ ebulẹ enwẹn wẹ che imẹ ẹ. E bi ni ẹrịra makẹni ụwanị rị ogẹnni ghafekọ aghafekọ.

³² Achọnị m nị ụnụ e rogbu enwẹn ụnụ. Okẹnnyẹ gilẹni nwunyẹ e ro ihiẹn Di-nwọnni-ẹnyi, o ro k'o dọn mẹ n'ọ sụọ Di-nwọnni-ẹnyi;

³³ kanị hụn nwọn nwunyẹ e ro ihiẹn ụwa, o ro k'o dọn mẹ n'ọ sụọ nwunyẹ ẹ —

³⁴ ẹrịra kẹ obi ẹ e kebe. Okpoho mọbụ nwagbọọ nwọnlẹni di e ro ihiẹn Di-nwọnni-ẹnyi, o ro k'o dọn dọnmẹchanrịn ẹhụ a lẹ mmọn a nsọ; kanị okpoho nwọn di e ro ihiẹn ụwa, o ro k'o dọn mẹ n'ọ sụọ di ẹ.

³⁵ M rị e ku ihiẹnni n'ọ rịnị ụnụ mma, ẹlẹ ni m gi ẹ gbọndọn ụnụ, kanị, nị ụnụ hụn ụzọ bi k'o furu, buchanrịn ẹnya ụnụ zinmẹ Di-nwọnni-ẹnyi.

³⁶ Omẹni ịhịan rị e ro nị ihiẹn ọ rị e mẹ okpoho ya lẹ ịya kutọ nị wẹ k'a lụ arị mma bụ o temẹgụọ hụn okpoho mọbụ nị hụn okẹnnyẹ asakọzị ẹka din, ọ rị hụn okẹnnyẹ nị wẹ lụma, ya mẹ ihiẹn hụ ọ chọ, wẹ lụma, ẹlẹ njọ.

³⁷ Kanị onyẹ hụn kwademẹgụ obi ẹ n'ọ lụkọ okpoho hụ, bụ ọ hụ a sa ẹka e kwọndọn enwẹn ẹ, hụnyẹ e mẹzighọ ọhụnma omẹni ọ lụnị.

³⁸ Ya wụ, onyẹ hụn lụrụ di mọbụ nwunyẹ mẹ ihiẹn rị mma, kanị onyẹ hụn lụlẹni mẹ ihiẹn ka mma.

³⁹ Okpoho nwọn di y'a latọlẹ di ẹ, kasị a mẹ ni di ẹ hụ ndụn. Kanị di ẹ nwụnhụn, o nwọn ikẹn lụrụ onyẹ sụọn'a, kasị a mẹ ni onyẹ nke Di-nwọnni-ẹnyi k'ọ lụrụ.

⁴⁰ O mẹ uche m, ọ nọdị k'ọ rị, ya kẹ ọ k'a ka a mma. Ọnwan wụ uche m, kanị e roghọ m'a nị mmẹ nwẹn e nwọnzighọ Mmọn Osolobuẹ.