Ndị Kọrẹntị Ibuzọ 6 - Ika

Isi Nke Isin Ewejẹnlẹ Onyẹ Ụka Ibe I Ọgwa

¹ O ru ẹ egun a nị onyẹ kwerini wejẹn oku ya lẹ ibe ẹ ẹka ndị kwerilẹni, hụn nkẹ o gi jẹnburu ndị kwerini?

² Ụnụ a marịn nị ndị nke Osolobuẹ, jẹnkọ d'e kin ndị ụwa ikpe? Omẹni ụnụ k'e kin ụwa ikpe, ụnụ asakọ ẹka dọnzi oku mẹhụ ẹkẹrẹ?

³ Ụnụ amarịn nị ẹnyi jẹnkọ d'e kin ndị mmọn-ozi ikpe? Ọrịwụzị ikpe ihiẹn ụwanị!

⁴ O mẹdẹ nwan nị ikpe ihiẹn ụwanị seni ụnụ, kị ụnụ e bun'ẹ nwan e jẹnni ndị ọnụ wẹ rulẹni oku ụka dọnzi?

⁵ Nị m ku ẹ kẹni ifẹnrẹn mẹ ụnụ! Ya wụ, onwọnni onyẹ marịn ihiẹn imẹ ụnụ k'a s'ẹka dọnzi oku rị ẹgbata ndị kwerini —

⁶ hụn onyẹ kwerini gi e wejẹn ibe ẹ ẹka ndị kwerilẹni?!

⁷ Eziẹ, nị ikpe rịdẹ imẹ igunrun ụnụ ghọsị nị e mẹrichanrịngụọlẹ wẹ ụnụ! Y'a ra gharị wẹ mẹ i eje-ihiẹn? Y'a ra gba nkịtịn wẹ mẹgbu i?

⁸ Hụn nkẹ ụnụ e gi mẹ ẹrịra ụnụ nwẹn hụ e mẹdẹ ibe ụnụ eje-ihiẹn, e mẹgbudẹ wẹ — bụ umunẹ ụnụ rọ imẹ Kraịstị!

⁹ Ụnụ amarịn nị ndị e mẹ eje-ihiẹn abanyekọ Alị-eze Osolobuẹ? Anịkwọlẹ ni wẹ dufie ụnụ! Ndị ughẹrẹ lẹ ndị e fe ihiẹn ọzọ lẹ ndị a zọ-ụkụ-eye-ọfịa lẹ ndị wẹ lẹ nwunyẹ ịhịan a ranhịn lẹ ikẹnnyẹ wẹ lẹ ikẹnnyẹ ibe wẹ e mẹ mgba lẹ

¹⁰ ndị ohin lẹ ndị ẹnya-uku lẹ ndị manya lẹ ndị a kpọ iyi lẹ ndị a tụnarịn ịhịan ihiẹn ẹ abanyekọ Alị-eze Osolobuẹ.

¹¹ Ihiẹn ndịnị kẹ ụfọdụ imẹ ụnụ te wụ, kanị Osolobuẹ ẹnyi gi Mmọn-nsọ a chanchan ụnụ; o dọn ụnụ nsọ, gi ẹfan Jizọs Kraịstị Di-nwọnni-ẹnyi nabanhan ụnụ.

Gbanị Nị Ughẹrẹ Ọsọ

¹² “Onwọnni ihiẹn wụ njọ ẹnya m.” Ya kẹ w'e ku, kanị, ẹlẹ ihiẹn ile e ye ẹka. Ẹghẹẹ, “Onwọnni ihiẹn wụ njọ ẹnya m,” kanị emẹkọ m igbọn ihiẹn ọwụlẹ.

¹³ “Ihiẹn-oriri wụ nke ẹfọ; ẹfọ wụ nke ihiẹn-oriri.” Kanị, Osolobuẹ k'e tikpọ wẹ ẹbụọ. Ẹhụ ẹlẹ nke ughẹrẹ, nke Di-nwọnni-ẹnyi rọ; Di-nwọnni-ẹnyi wụzị nke ẹhụ.

¹⁴ Osolobuẹ gi ikẹn ẹ gha ọnwụn weli Onyẹ-nwọnni-ẹnyi; o k'e welizi ẹnyi nwẹn.

¹⁵ Ụnụ amarịn nị ẹhụ ụnụ wụchanrịn mkpamkpa ẹhụ Kraịstị? Nị m gi nwan mkpamkpa ẹhụ Kraịstị họnrin mkpamkpa ẹhụ ịgbaraja? O mẹkọ!

¹⁶ Ụnụ amarịn nị onyẹ ya lẹ ịgbaraja gba ranhịn lẹ ịgbaraja e họnringụọ ẹhụ ohu? Makẹni Ẹkụkwọ-nsọ sị, “Wẹ ẹbụọ e họnrin ẹhụ ohu.”

¹⁷ Kanị, onyẹ hụn we enwẹn ẹ cheni Di-nwọnni-ẹnyi lẹ Di-nwọnni-ẹnyi e họnringụọ ohu imẹ-mmọn.

¹⁸ Gbakwọnị nị ughẹrẹ ọsọ! Njọ ndị ọzọ ile ịhịan e mẹ ẹlẹ imẹ ẹhụ, kanị, onyẹ hụn ghẹrẹni mẹ ẹhụ a njọ.

¹⁹ Ụnụ amarịndẹ nwan nị ẹhụ ụnụ wụ Ụlọ-nsọ hụn Mmọn-nsọ rị imẹ ụnụ bi, Mmọn-nsọ Osolobuẹ ye ụnụ, nị ẹlẹ ụnụ nwọn enwẹn ụnụ?

²⁰ Wẹ ṅọn ụnụ e ṅọn; e gi ni nwan ẹhụ ụnụ e ye Osolobuẹ ọghọ.