Ndị Kọrẹntị Ibuzọ 5 - Ika

Isi Nke Isẹn Onyẹ-ụka Ghẹrẹni

¹ E kughọdẹ w'a nị ughẹrẹ rị imẹ igunrun ụnụ, ụdị hụn ndị a rụa mmọn ghalẹni a ghẹrẹdẹ — ebe okẹnnyẹ lẹ nwunyẹ nẹdi ẹ nọ ranhịn!

² Bụ ụnụ hụ a họnrọn! Ẹlẹ ezigbo ẹkwan nkẹ ụnụ a kwan?! Chụpụ nị onyẹ mẹ ihiẹnni imẹ igunrun ụnụ?!

³ Lee n'ẹ: ọsụọn'a nị arị m ebẹhụ elee-m, elee-i, m hụ a imẹ-mmọn; a hangbugụọlẹ m okẹnnyẹ mẹ ihiẹnni eṅẹn nọkẹ sị m hụ ebẹhụ.

⁴ Ụnụ gihụ ẹfan Di-nwọnni-ẹnyi Jizọsị gbakikomẹ — mmẹ nwẹn k'a rịzị ebẹhụ imẹ-mmọn, ikẹn Di-nwọnni-ẹnyi Jizọsị k'a rịzịkwọ ebẹhụ —

⁵ ụnụ e bu onyẹni che ẹka Ekwensụ nị wẹ hụn ụzọ tikpọ ẹhụ a, kẹni mmọn a hụn ụzọ nwọn nzụọpụha Ụhụọhịn Di-nwọnni-ẹnyi Jesu Kristi.

⁶ Isi ụnụ rị a nyan arị mma! Ụnụ amarịn nị wẹ buchehụ ẹkẹrẹ yisti, ọ ghagbarị ogbe brẹdi, fụchanrịn a?

⁷ Wepụ nị nwan yisti akan, kẹni ụnụ wụrụ ogbe brẹdi ọhụn yisti rịlẹni, hụn ụnụ wụ nke-esi. Makẹni e gbugụọ wẹ Kraịstị wụ Ebulu-nghafe ẹnyi, gi ẹ chụn ẹjan Mmẹmmẹ-nghafe.

⁸ Ya wụ, nị ẹnyi gi nwan brẹdi yisti rịlẹni, hụn wụ ịshịapụ-ẹfọ lẹ ezioku, mẹ mmẹmmẹ hụ, ẹlẹ yisti akan hụn wụ iwe lẹ eje-obibi.

⁹ A gwagụọ m ụnụ ya mbụ imẹ ẹhụhụọ-ozi sị ụnụ lẹ ndị ughẹrẹ emẹkọlẹ.

¹⁰ Ẹlẹkwọ ndị ụwa a ghẹrẹni mọbụ e mẹ ẹnya-uku mọbụ a tụnarịn ịhịan ihiẹn wẹ mọbụ a rụa mmọn kẹ m rị e ku. Omẹni uwẹ rọ, nkẹ ụnụ a gwarị gha imẹ ụwanị pụ.

¹¹ Kanị, m rị nwan e deni ụnụ ụnụ esọnlẹ onyẹ ọwụlẹ kpọ enwẹn ẹ onyẹ kwerini mẹkọ, omẹni ọ ghẹrẹ aghẹrẹ mọbụ n'o nwọn ẹnya-uku mọbụ n'ọ rụa mmọn mọbụ n'ọ kpọ iyi mọbụ n'ọ ra manya a tụ mọbụ n'ọ tụnarịn ịhịan ihiẹn ẹ. Ụnụ lẹ onyẹ nọ ẹrịra erigbamadẹlẹ.

¹² Elee hụn biri m m gi e kin ikpe ndị rị ogbe? Ẹlẹ ndị ụka kẹ ụnụ k'e kin ikpe wẹ?

¹³ Osolobuẹ ya nwọn kin ikpe ndị rị ogbe: “Chụpụ nị nwan eje-ịhịan hụ imẹ igunrun ụnụ.”