Ndị Kọrẹntị Ibuzọ 4 - Ika

Isi Nke Ẹnọ Ndị-ọrụn Kraịstị

¹ O furu nwan nị ịhịan e weri ẹnyi kẹ idibo Kraịstị lẹ ndị ihiẹn-omimi Osolobuẹ rị ẹka.

² Ihiẹn w'a chọ nwan ẹka onyẹ wẹ buche ihiẹn ẹka a wụ nị o furu wẹ gi e dọn ẹnya.

³ O mẹ nke m, onwọnkẹni ihiẹn ọ wụ nị ụnụ rị e kin m ikpe mọbụ nị ọgwa ịhịan-mmaka rị e kin m ikpe; m'a ra kindẹ enwẹn m ikpe.

⁴ Obi m hụghọ ọchan, kanị ẹlẹ ọhụn kẹ ẹka m e gi rị ọchan; Di-nwọnni-ẹnyi ya nwọn kin m ikpe.

⁵ Eke hanlẹ ni nwan eṅẹn ebe ogẹn kelẹni ru. Cheri ni nị Di-nwọnni-ẹnyi bịa. O jẹnkọ d'e wepụha ihiẹn rị imẹ ishi ifọn, o kpuchanrịn obi ile oghe. Ogẹn hụ, onyẹ-onyẹ a narịn ọjịja-mma run'ẹ ẹka Osolobuẹ.

⁶ Umunẹ m, e gigụọ m mmẹ lẹ Apolọsụ kọwa ihiẹn ndịnị ile makẹ ọrịrịmma ụnụ, kẹni ụnụ mụnarịn ẹnyi ihiẹn wẹ gi a sị, “Emẹlẹ karị ihiẹn wẹ de imẹ Ẹkụkwọ-nsọ,” makẹ ụnụ gha e gi onyẹ ohu a nyan isi, e lelịa ibe ẹ.

⁷ Onyẹ gwa ị n'o nwọn ihiẹn rị ichẹn ẹgbata yụ lẹ ibe i? K'i nwọn wẹ yelẹn'i? Omẹni wẹ ye y'ẹ e ye, kị ị rị e gin'ẹ a nyan isi nọkẹ sị ẹlẹ wẹ ye y'ẹ e ye?

⁸ Enwẹn ụnụ e jungụọ nwan ụnụ ẹfọ nụ! Ụnụ e higụọlẹ ọdanfịn nụ! Ụnụ e họnringụọlẹ nwan ndị-nze ọsụọn'a nị ụnụ ajụnị ẹnyi?! Euu, omẹni ụnụ te wụ ndị-nze nke-esi, kẹni ẹnyi sọn ụnụ kị!

⁹ Makẹni, ọ rị m nọkẹ sị Osolobuẹ e wegụọ ẹnyi ndị-ozi pụ-ichẹn che azụụn-azụụn nọkẹ ndị wẹ ma ikpe ọnwụn wẹ dupụkọ d'e gbu idẹnya ịhịan ile. Makẹni, ẹnyi a wụrụgụọ ihiẹn ụwa ile a gba ile, kẹ ndị mmọn-ozi kẹ ịhịan.

¹⁰ Ẹnyi wụ ndị nzuzu makẹ Kraịstị, ụnụ nwẹn a marịnka ihiẹn imẹ Kraịstị! Ẹnyi rị alụlụa, ụnụ nwẹn ze e ze! Wẹ hụ a gbaye ụnụ, kanị wẹ hụ e lelịa ẹnyi!

¹¹ Echẹn kẹ ẹgụn ihiẹn-oriri lẹ ihiẹn-ọrịra a gụnkwọ nwan ẹnyi; ẹkwa ara zu ẹnyi ukun; wẹ hụ e mẹshi ẹnyi ikẹn; ọrụn e bu ẹnyi a tọ ụzọ.

¹² Ẹnyi hụ e gi ẹka ẹnyi a lụrụ, e gizi ọrụnnị a rụngbu enwẹn ẹnyi. Wẹ kpari ẹnyi, ẹnyi a gọzi wẹ; wẹ kpokpo ẹnyi, ẹnyi e din ẹ;

¹³ wẹ kuja oku ẹnyi, ẹnyi e gi ọnụ-ọma sọn wẹ; ẹnya ụwa, ẹnyi e họnringụọ ẹfịfịa mmaka lẹ unyin w'a chanpụ — d'e rukwọ tannị.

¹⁴ Ẹlẹ m rị e de ihiẹnni nị ifẹnrẹn mẹ ụnụ, kama, m gi ẹ a dụn ụnụ ọdụn kẹ ụmụ m rị m obi.

¹⁵ Ẹghẹẹ, ọsụọn'a nị ụnụ nwọn ndị-ndu nnụ-uku ole-lẹ-ole imẹ Kraịstị, ụnụ enwọn nẹdi bu ọda, makẹni m gi oziọma m zi ụnụ họnrin nẹdi ụnụ imẹ Kraịstị wụ Jizọsị.

¹⁶ M rị nwan a sị ụnụ leri m.

¹⁷ Ya haịn m gi zilanị ụnụ Timoti, ezi nwa m, hụn m gi e dọn ẹnya imẹ Onyẹ-nwọnni-ẹnyi. O k'a nyanhan nị ụnụ kẹ m'e mẹ ihiẹn imẹ Kraịstị Jizọsị, nyanhan nị ụnụ ya kẹ m'a kuzi ẹ imẹ ụka ile rị ebe ile.

¹⁸ O nwọnghọ ndị rị imẹ ụnụ rị a pacheni nọkẹ sị abịakọ m.

¹⁹ Kanị m lala ẹgwa, omẹni Di-nwọnni-ẹnyi a chọghọ. M bịa, a hụn m ikẹn ahụn ndịnị rị a pacheni nwọn, ẹlẹ ọnụ ahụn wẹ rị e mẹ sụọ.

²⁰ Makẹni, Alị-eze Osolobuẹ ẹlẹ oku-ọnụ sụọ, ikẹn kẹ wẹ gi a marịn a.

²¹ Elee hụn ka ụnụ mma? Nị m wẹhẹ mkpịnsịn ra nị m gi ihiẹn-ọsụsụọ lẹ ẹka-alụlụa bịa?