Ndị Kọrẹntị Ibuzọ 3 - Ika

Isi Nke Ẹtọ Ndị-ụka Rị A Zụọ Ẹka-nke!

¹ Umunẹ, asanị m ẹka gwa ụnụ oku kẹ ndị Mmọn-nsọ rị a kị; kama, m gwahụ ụnụ oku kẹ ndị wụhụ ịhịan-mmaka, rịkẹ ụmụ-ndu imẹ Kraịstị.

² Ẹran kẹ m ye ụnụ, ẹlẹ ihiẹn-oriri zeni, makẹni ụnụ eke ru ogo e ri ihiẹn-oriri zeni ogẹn hụ. Eziẹ, ụnụ eke rukwọ nwan.

³ Makẹni echẹn kẹ ụnụ rịkwọ e bi kẹ ịhịan-mmaka. Ẹghẹẹ, ebe ẹnya-ụfụ lẹ ikpe rị imẹ igunrun ụnụ, ụnụ anọnị kẹ ndị nwọnlẹni Mmọn-nsọ? Ẹlẹ agụngụn ịhịan-mmaka kẹ ụnụ rị a gụn?

⁴ Ebe ịhịan nọ sị, “Pọlụ kẹ m'e sọn;” ibe ẹ sị, “Apolọsụ kẹ m'e sọn,” ụnụ anọnị nwan kẹ ịhịan-mmaka?

⁵ Kị Apolọsụ wụdẹ? Kị Pọlụ wụdẹ? Idibo ụnụ gha ẹka wẹ kweri kẹ wẹ wụ, onyẹ-onyẹ lẹ ogbo Di-nwọnni-ẹnyi ye ẹ rụn:

⁶ Mmẹ kụn, Apolọsụ a gba a mirin; kanị Osolobuẹ mẹ ẹ sue.

⁷ Ya wụ, kẹ onyẹ kụnnị kẹ onyẹ gba mirin enwọn ihiẹn ọ wụ; Osolobuẹ sụọ hụn e mẹ ẹ e sue wụ onyẹ rị mkpa.

⁸ Onyẹ hụn kụnnị lẹ onyẹ hụn gba mirin wụ ohu. Onyẹ-onyẹ sikọ d'a narịn ụgwọ-ọrụn a k'o dọn rụn.

⁹ Makẹni ẹnyi lẹ Osolobuẹ gba a rụn; ụnụ wụ ugbo Osolobuẹ, ụlọ Osolobuẹ rị a tụn.

¹⁰ Ghahanị ikẹn Osolobuẹ ye m, e gbegụọ m iyetọ nọkẹ ọka ịtụn-ụlọ; onyẹ ọzọ rị nwan a tụnye elu ẹ. Onyẹ-onyẹ lekpọkwọ ihiẹn ọ rị a tụnye elu iyetọ ahụn,

¹¹ n'o nwọnni iyetọ ọzọ wẹ k'a saẹka gbe karị hụn rịnị, hụn wụ Jesu Kristi.

¹² Kẹ goru kẹ ịhịan gi a tụn, kẹ siliva, kẹ ọmụma ndị ọzọ pụ ichẹn e gbukeni, kẹ osisi, kẹ irurue-ọkpọnkụn, kẹ achara-ọkpọnkụn — hụn ọwụlẹ ọ wụ,

¹³ ọrụn onyẹ-onyẹ jẹnkọ d'a pụha ifọn, makẹni ụhụọhịn hụ lalanị jẹnkọ d'e wepụha a ifọn: wẹ k'e gi ọkụn ghọsị kẹ ọrụn onyẹ-onyẹ nọ; ọkụn hụ k'e lele ọrụn hụnyẹ.

¹⁴ Omẹni hụn ịhịan tụnye elu iyetọ hụ e cheghọ ọkụn, hụnyẹ a narịn ụgwọ-ọrụn a;

¹⁵ kanị, ọ dụnpụ ọkụn, iwi e ti ẹ, kanị ya nwẹn k'e nwọn nzụọpụha, kanị o k'a nọhụ kẹ onyẹ wẹ lọpụha imẹ ọkụn.

¹⁶ Ụnụ amarịn nị ụnụ wụ Ụlọ-nsọ Osolobuẹ?! Ụnụ amarịn nị Mmọn Osolobuẹ bi imẹ ụnụ?!

¹⁷ Onyẹ mẹrụ Ụlọ-nsọ Osolobuẹ, Osolobuẹ e tikpọ a, makẹni Ụlọ-nsọ Osolobuẹ rị nsọ — bụ Ụlọ-nsọ hụ kẹ ụnụ wụ.

¹⁸ Edufiekwọlẹ ni enwẹn ụnụ! Onyẹ sị n'ọ marịnka ihiẹn imẹ ụwanị ya wụrụkwọ nwan nzuzu, kẹni ọ wụrụ onyẹ marịn ihiẹn nke-esi,

¹⁹ makẹni amamihiẹn ụwanị wụ nzuzu ẹnya Osolobuẹ. Ya haịn Ẹkụkwọ-nsọ gi sị, “Ọ nwụndọn ndị marịn ihiẹn lẹ ẹro wẹ.”

²⁰ Ẹkụkwọ-nsọ sịzị, “Di-nwọnni-ẹnyi a marịnghọ nị iroro ndị marịn ihiẹn wụ ihiẹn ọlaliwi.”

²¹ Ya wụ, egizilẹ ni nwan ịhịan nyan isi, makẹni ihiẹn ile wụ nke ụnụ:

²² kẹ Pọlụ-o, kẹ Apolọsụ, kẹ Kẹfasị wụ Pita-o, kẹ ụwa ile-o; kẹ ndụn-o, kẹ ọnwụn-o; kẹ ihiẹn rị ogẹnni-o, kẹ ihiẹn rị ihun-o, wẹ ile wụ nke ụnụ;

²³ ụnụ nwẹn wụ nke Kraịstị; Kraịstị wụ nke Osolobuẹ.