Ndị Kọrẹntị Ibuzọ 2 - Ika

Isi Nke Ẹbụọ Ikẹn Osolobuẹ Kẹ Wẹ Gi E Mẹ Ẹ, Ẹlẹ Amamihiẹn Ịhịan

¹ Umunẹ m, ogẹn m gi bịa d'e zi ụnụ ozi Osolobuẹ, ekuni m kẹ onyẹ ma ku oku mọbụ onyẹ wa ẹnya.

² Makẹni m kwademẹ obi m nị ebukọ m ẹnya che ihiẹn ọzọ imẹ igunrun ụnụ wezụka Jesu Kristi — Jesu Kristi wẹ kpọgbu elu obe.

³ Kama, m'e mẹ kẹ onyẹ ndụn rịlẹni, m'a kpachanpụ ẹnya ọda-ọda, e gi egun e bi.

⁴ Kẹ ebe m nọ e ku oku kẹ ebe m nọ e ku oku-Chuku, ekuni m kẹ ndị marịn ihiẹn, ekuni m n'ọ sụọ ịhịan ụsụọ ntịn, o kweyeni m. Kama, m hụ e ku ẹ, a ghọsị ụnụ nị ẹka Mmọn-nsọ lẹ ikẹn ẹ rị a.

⁵ M mẹ ẹrịra kẹni ụnụ gi ikẹn Osolobuẹ dọn ẹnya, sọnmẹ Jesu, ẹlẹ amamihiẹn ịhịan.

Amamihiẹn Osolobuẹ

⁶ Kanị, o nwọnghọ amamihiẹn ẹnyi e ku oku ẹ ebe ndị ka-ẹhụ imẹ okukwe rị hụn wụlẹni amamihiẹn eluni — mọbụ nke ndị-ọkịkị ogẹnni lakọnị.

⁷ Mba, ẹnyi rị e ku oku amamihiẹn Osolobuẹ, ịmarịn-ihiẹn nzuzue hụ Osolobuẹ kwademẹtọ n'o d'e ke ụwa n'o k'e gi ẹ ye ẹnyi ọghọ.

⁸ Onwọnni onyẹ-ọkịkị ụwanị marịn ihiẹnni; omẹni wẹ te marịn a, wẹ eke kpọgbu Onyẹ nwọn ọghọ ile.

⁹ Kanị, nọkẹ kẹ Ẹkụkwọ-nsọ dọn ku, “Ẹnya ịhịan ahụntuni, ntịn ịhịan anụtuni, ịhịan erotuni ihiẹn Osolobuẹ kwademẹni ndị ihiẹn ẹ a sụọ.”

¹⁰ Chuku a ghọsịgụọ ẹnyi ihiẹn ndịnị ghahanị Mmọn-nsọ a, makẹni Mmọn-nsọ marịn ihiẹn ile, kẹ ihiẹn nzuzue Osolobuẹ.

¹¹ Onyẹ marịn ihiẹn rị imẹ ịhịan mmanị mmọn hụn rị imẹ ịhịan? Ẹrịrazị, onwọnni onyẹ marịn obi Osolobuẹ mmanị Mmọn Osolobuẹ.

¹² Ẹnyi nwẹn, ẹlẹ mmọn ụwanị kẹ ẹnyi nwọnhẹn, kanị Mmọn ahụn gha ebe Osolobuẹ rị bịa, kẹni ẹnyi hụn ụzọ marịn ihiẹn ile Osolobuẹ gi gọzi ẹnyi.

¹³ Uwẹ kẹ ẹnyi e ku; ẹnyi ara ku wẹ kẹ ihiẹn wẹ mụnarịn ndị marịn ihiẹn kanị ihiẹn wẹ mụnarịn Mmọn-nsọ; a kọwanị ndị Mmọn-nsọ rị a kị ihiẹn imẹ-mmọn.

¹⁴ Ịhịan-mmaka nwọnlẹni Mmọn-nsọ ara nabanhan ihiẹn Mmọn-nsọ, makẹni wẹ wụ nzuzu ẹnya a. Ọ ra saẹka ghọta wẹ makẹni Mmọn-nsọ kẹ wẹ gi a ghọha wẹ.

¹⁵ Kanị onyẹ Mmọn-nsọ rị a kị a ghọtachanrịn kẹ ihiẹn ile nọ, kanị onwọnni onyẹ a saẹka a ghọta ya nwẹn.

¹⁶ Ya kẹ Ẹkụkwọ-nsọ gi sị, “Onyẹ marịn obi Di-nwọnni-ẹnyi? Onyẹ k'a saẹka dụn a ọdụn?” Kanị ẹnyi nwẹn e nwọnghọ obi Kraịstị.